ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް ހިޔާނާތްތެރިވުމުގެ ކުށުގެ ދައުވާ އާއި މަނީލޯންޑަރިންގެ ކުށުގެ ދައުވާތައް ކުރުމުގެ އިތުރުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި 1.2 މިލިއަން ޑޮލަރު ނަގައިދޭން ޕްރޮސެކިއުޓާ ޖެނެރަލް އޮފީސް (ޕީޖީ) އިން މިއަދު ކްރިމިނަލް ކޯޓަށް ފޮނުވައިފި އެވެ.

ބައްސާމްގެ މައްޗަށް ދައުވާ އުފުލީ އެފްއޭއެމްއަށް އެކި ފަރާތްތަކުން ދޭ ފައިސާއަށް ހިޔާންތްތެރިވެ، އެފްއޭއެމްއަށް ބޭރުގެ ފަރާތްތަކުން އެހީގެ ގޮތުގައި އެމެރިކާ ޑޮލަރުން ލިބޭ ފައިސާ އެ އެސޯސިއޭޝަންގެ އިސްވެރިންނާއި އެސޯސިއޭޝަނާއި ގުޅުން އޮންނަ ފަރާތްތަކާއި، ކުންފުނިތަކުގެ އެކައުންޓްތަކަށް ޖަމާކޮށް ނަހަމަގޮތުގައި ބޭނުންކޮށް މަނީލޯންޑްރިންގެ އަމަލުތަކެއް ހިންގާފައިވާ މައްސަލައިގަ އެވެ.

ބައްސާމްގެ މައްޗަށް ހިޔާނާތުގެ ދައުވާ އުފުލީ އަމީން ކޮންސްޓްރަކްޝަންގެ އަމީން އެވެނިއު އިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި، އެފްއޭއެމްގެ 1,200,000 ޑޮލަރަށް ހިޔާނާތްތެރިވެފައިވާތީ އެވެ.

ޕީޖީން އެދެނީ ހިޔާނާތުގެ މައްސަލައިގައި ބައްސާމްގެ މައްޗަށް އެއް އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށް ލައި ދިނުމަށެވެ.

ދެވަނައަށް ކުރި މަނީ ލޯންޑަރިން ދައުވާ ބައްސާމްގެ މައްޗަށް އުފުލީ އަމީން އެވެނިއުގެ ބްލޮކް A ގެ 12 އަދި 13 ވަނަ ފަންގިފިލާގެ އަށް ކޮޓަރިއާއި 10 ފާހަނައިގެ ނަންބަރު A1205 އާއި A1206 އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން އަމީން ކޮންސްޓްރަކްޝަންއަށް ޖީއެސްޓީ ހިމެނޭ ގޮތަށް ދައްކަންޖެހޭ ޖުމްލަ 25,000,000ރ. ގެ ތެރެއިން ބުކިން ފީ އާއި ކޮމިޓްމަންޓް ފީ ހިމެނޭ ގޮތަށް އެތަނުގެ އަގަށްވާ ފައިސާގެ ގޮތުގައި އެފްއޭއެމްގެ ޑޮލަރު އެކައުންޓުން އެކި އެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާތީ އެވެ.

މަނީ ލޯންޑްރިން މައްސަލައިގައި ޕީޖީން އެދެނީ ބައްސާމް އެއްލައްކަ ރުފިޔާ އާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމާ އެކު ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށް ލައި ދިނުމަށެވެ.

މީގެއިތުރުން ދައުވާތަކާ ގުޅިގެން ބައްސާމް އަތުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ 1.2 މިލިއަން އެމެރިކާ ޑޮލަރު ނަގައިދީ، ލޯންޑާ ކޮށްފައިވާ ފައިސާ ބޭނުންކޮށްގެން ބައްސާމު ލިބިގަނެ ބޭނުންކުރަމުން ގެންދިޔަ އަމީން އެވެނިއު އެޕަރޓްމަންޓް A1205 އަދި A1206 ދައުލަތަށް ނަގައިދިނުމަށެވެ.

ބައްސާމްގެ ހިޔާނާތުގެ މައްސަލައިގައި ކުރިން ތަހުގީގު ކުރީގެ ބައިގައި އޭނާގެ މައްޗަށް އުފުލި ހިޔާނާތްތެރިވުމާއި މަނީ ލޯންޑަރިން ކުށުގެ ދައުވާގެ އަޑު އެހުންތައް ކްރިމިނަލް ކޯޓުގައި ދަނީ ކުރިއަށެވެ.

ޕީޖީން ބުނީ ބައްސާމް ހިންގި އަމަލުތަކުގައި ބައިވެރިވި އެފްއޭއެމްގެ މުވައްޒަފުންނަށް ދައުވާ ކުރުމަށް ތައްޔާރުވަމުންދާ ކަމަށާއި އެ މައްސަލަ ފުލުހުން ދަނީ ތަހުގީގު ކުރަމުން ކަމަށެވެ.

މީގެއިތުރުން ފުލުހުންގެ ތަހުގީގަށް ކުރިއެރުން ލިބޭ ވަރަކުން، ހެކކި ގަރީނާ ވަޒަންކޮށް، މައްސަލައިގައި އިތުރު ދައުވާތައް ކޯޓަށް ހުށަހަޅާނެ ކަމަށް ވެސް ޕީޖީން ބުންޏެވެ.