ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެއްދި މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން ސޮއިކޮށްފައިވާ ނުވަ ސެޓްލްމަންޓް އެއްބަސްވުމެއް ބާތިލު ކަމަށް އެޓާނީ ޖެނެރަލް (އޭޖީ) އޮފީހުން ކަނޑައަޅައި، އެ އެއްބަސްވުންތަކަށް އަމަލު ނުކުރަން ކަމާ ބެހޭ އިދާރާތަކަށް މިއަދު އަންގައިފި އެވެ.

އޭޖީ އޮފީހުން ނެރުނު ނޫސް ބަޔާނެއްގައި ބުނީ އެ އޮފީހުން އެއްބަސްވުންތައް ބާތިލުކަމަށް ނިންމީ ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެއްދި މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލަކީ ގާނޫނީ ހައިސިއްޔަތާއި ބާރު ލިބޭ އުސޫލަކަށް ނުވާތީ ކަމަށެވެ.

"މި މައްސަލަތައް މި އޮފީހުން ދިރާސާކުރިއިރު، އެ އުސޫލަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއާއި، ގާނޫނާ ހިލާފަށް އެކުލަވާލާފައިވާ އުސޫލެއްކަމާއި، އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ، ދައުލަތުގެ އޮޑިޓާ ޖެނެރަލްގެ ބަހެއް ނެތި، ތައައްސުފީ ގޮތެއްގައި، ވަކި ފަރާތްތަކަކަށް ނުޙައްގު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއް ކަން ފާހަގަކުރެވިފައިވޭ،" އޭޖީ އޮފީހުން ބުންޏެވެ.

ބާތިލު ކަމަށް ނިންމައި، އަމަލު ނުކުރަން ނިންމި އެއްބަސްވުންތައް:

• ޔޫމެޓް ކޮންސްޓްރަކްޝަން ޕްރައިވެޓް ލިމިޓެޑް - ގެއްލުމުގެ ބަދަލުގެ ގޮތުގައި 26,000,000ރ. ދިނުން.
• ލެޝަރ ބީޗް ޕްރައިވެޓް ލިމިޓެޑް (ސެޓްލްމަންޓް އެގްރީމަންޓްގައި ސޮއިކުރުމުގެ ކުރިން ޑީޑް އޮފް އެސައިންމަންޓެއްގެ ދަށުން ލެޝާ ބީޗް ޕްރައިވެޓް ލިމިޓެޑްގެ ހައްގުތައް އެމްރޮކް އިންވެސްޓްމަންޓް (މޯލްޑިވްސް) ޕްރައިވެޓް ލިމިޓެޑަށް މާޗު، 16، 2023 ގައި ބަދަލުކޮށްފައި: ވ. ފޮއްތެޔޮބޮޑުފުށީގެ ވާކް ޕްލޭން މިނިސްޓްރީއަށް ހުށަހެޅި ދުވަހުން ފެށިގެން ސެޓްލްމަންޓް އެއްބަސްވުމުގައި ސޮއިކުރާ ދުވަހާ ހަމައަށް ހިނގާ މުއްދަތު 30 ދުވަހަށް ރައުންޑް-އޮފްކޮށް ލީޒް އެގްރީމަންޓަށް އިތުރުކޮށްދީ، ރަށުގެ ލީޒް އެގްރީމަންޓަށް ގެންނަ އިސްލާހެއް (އެޑެންޑަމް ޓު ދަ ލީޒް އެގްރީމަންޓް) ގައި ދެ ހަފްތާގެ ތެރޭގައި ސޮއިކުރުން.
• އެގްޒޯޓިކް ޕްރޮޕަޓީސް ޕްރައިވެޓް ލިމިޓެޑް - ނ. ރާފުށީގެ ބަދަލުގައި ނ. އެކުޅިވަރު 99 އަހަރު ދުވަހުގެ މުއްދަތަށް ކުއްޔަށް ދޫކުރުމާއެކު، އެ ރަށުގެ ކޮންސްޓްރަކްޝަން މުއްދަތުގެ ގޮތުގައި ހަ އަހަރު ދިނުން އަދި ކުރީގެ ލީޒް އެގްރީމަންޓާގުޅޭ އެއްވެސް ފައިސާއެއް ދައްކަން ނުޖެހޭގޮތަށް އެއްބަސްވުމުގައި ހިމެނުން.
• ދީބާޖާ އިންވެސްޓްމަންޓް ޕްރައިވެޓް ލިމިޓެޑް - ގެއްލުމުގެ ބަދަލުގެ ގޮތުގައި 64,000,000ރ. ދިނުން.
• އަމްސަން އެންޑް ފުޑް ބެވަރޭޖް ޕްރައިވެޓް ލިމިޓެޑް - ގެއްލުމުގެ ބަދަލުގެ ގޮތުގައި 5,100,000ރ. ދިނުން.
• ކްލިއާ ސޭންޑްސް ޕްރައިވެޓް ލިމިޓެޑް - ތ. ވަންބަދި އާއި ކަނި އަދި ފުށި، އެ ތިން ރަށް 50 އަހަރުގެ މުއްދަތަށް ކުއްޔަށް ދޫކުރުމާއެކު، ކޮންސްޓްރަކްޝަން މުއްދަތުގެ ގޮތުގައި ފަސް އަހަރު އެ ކުންފުންޏަށް ދިނުން އަދި ގެއްލުމުގެ ބަދަލުގެ ގޮތުގައި ފައިސާ ދިނުމުގެ ބަދަލުގައި، އއ. މާފަރު ފަޅު (4° 5' 4.644" N 72° 43' 27.596" E) ) 50 އަހަރަށް ކުއްޔަށް ދޫކުރުމާއެކު، ކޮންސްޓްރަކްޝަން މުއްދަތުގެ ގޮތުގައި ހަތް އަހަރު ދިނުން.
• ބްލޫ ލެގޫން އިންވެސްޓްމަންޓްސް ޕްރައިވެޓް ލިމިޓެޑް - އއ. މަޑޫގަލި އެ ކުންފުންޏަށް 50 އަހަރަށް ކުއްޔަށް ދޫކުރުމާއެކު، އެ ރަށް ތަރައްޤީކުރުމަށް ކޮންސްޓްރަކްޝަން މުއްދަތުގެ ގޮތުގައި 6 އަހަރު ދިނުމާއި، ުރީގެ ލީޒް އެގްރީމަންޓާ ގުޅިގެން އެއްވެސް ފައިސާއެއް ދައްކަން ނުޖެހޭ ގޮތަށް އެއްބަސްވުމާއި، ގެއްލުމުގެ ބަދަލުގެ ގޮތުގައި ދިނުމަށް އެއްބަސްވި 20 މިލިއަން ޑޮލަރު ފައިސާއިން ދިނުމުގެ ބަދަލުގައި، ރ. ވިލިނގިލި (4.45 ހެކްޓަރު)، ރ. ތާވަތާ (8.22 ހެކްޓަރު) ނ. އޮރިމަސްވަރު (5.84 ހެކްޓަރު) 50 އަހަރަށް ކުއްޔަށް ދޫކުރުމާ އެކު، ކޮންސްޓްރަކްޝަން މުއްދަތުގެ ގޮތުގައި ފަސް އަހަރު ދިނުން އަދި ގެއްލުމުގެ ބަދަލުގެ ގޮތުގައި ބާކީ ދޭންޖެހޭކަމަށް ކަނޑައެޅި 8,447,000 ޑޮލަރު އަކީ، ރ. ވިލިނގިލި، ރ. ތާވަތާ، އަދި ނ. އޮރިމަސްވަރުގެ އެޑްވާންސް ކުލީގެ ގޮތުގައި ހަމަޖެއްސުން.
• އަބްދުﷲ އަލީ، ހ. ގިރިތެރޭގެ (މ. ތްރީއޭވިލާ) - ހދ. ހޮނޑާފުށި 50 އަހަރު ދުވަހުގެ މުއްދަތަށް ކުއްޔަށް ދޫކުރުމަށް އާ ލީޒް އެގްރީމަންޓްގައި ސޮއިކުރުން އަދި ހދ. ހޮނޑާފުށީގެ ކުއްޔާއި ޖޫރިމަނާގެ އަދަދު މައާފުކޮށްދިނުން.
• ޖޭއެޗް ރިޒޯޓްސް ޕްރައިވެޓް ލިމިޓެޑް - ހދ. ކުޑަމުރައިދޫ 50 އަހަރަށް ކުއްޔަށް ދޫކުރުމާއެކު، އެ ރަށުގެ ކޮންސްޓްރަކްޝަން މުއްދަތުގެ ގޮތުގައި ހަ އަހަރު ދުވަސް ދިނުން އަދި ކުރީގެ އެއްބަސްވުމުގެ ދަށުން ކުއްޔާއި ޖޫރިމަނާ ދައްކަން ނުޖެހޭ ގޮތަށް އެއްބަސްވުމުގައި ހިމެނުން.

ރައްޔިތުންގެ މަޖިލީހުގެ މާލިއްޔަތު ކޮމިޓީން ވެސް ސެޓްލްމަންޓް އެއްބަސްވުންތަކުގެ މައްސަލަ ދިރާސާ ކުރުމަށްފަހު، އެ އެއްބަސްވުންތައް ބާތިލުކުރުމަށް ގާނޫނީ ގޮތުން ކުރަންޖެހޭ އެންމެހައި ކަންކަންކޮށް،، އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ، އެ ބަދަލެއް އަނބުރާ ހޯދުމުގެ ކަންކަން ކުރުމަށް އަންގާފައިވާކަން ވެސް އޭޖީ އޮފީހުން ފާހަގަ ކުރި އެވެ.

އޭގެއިތުރުން އެ ކަމުގައި ހިމެނޭ ފަރާތްތަކުގެ މައްޗަށް އަޅަންޖެހޭ ފިޔަވަޅުތައް އެޅުމަށް ބަންޑާރަނައިބަށާއި ކަމާ ގުޅުންހުރި އިދާރާތަކަށް އެންގުމަށް ފެންނަކަމަށް އެ ކޮމިޓީން ނިންމައި، މަޖިލީހުން އެންގި ކަމަށް އޭޖީ އޮފީހުން ބުންޏެވެ.