ހައުސިން، އިންފްރާސްޓްރަކްޗާ އަދި އެންވަރަމެންޓް މިނިސްޓްރީ އަނދައިގެންދިޔަ އަލިފާނުގެ ހާދިސާ އާ ގުޅިގެން ސުވާލުކޮށް މައުލޫމާތު ސާފުކުރުމަށް ފުލުހުންނާއި ޑިފެންސް މިނިސްޓްރީގެ ވެރިން މަޖިލީހުގެ ސަލާމަތީ ހިދުމަތްތަކާ ބެހޭ (241) ކޮމިޓީއަށް ބުރާސްފަތި ދުވަހު ހާޒިރުކުރަން ނިންމައި އެކަން މެންބަރުންނަށް އަންގައިފި އެވެ.

ސަލާމަތީ ހިދުމަތްތަކާ ބެހޭ ކޮމިޓީގައި ހިމެނޭ މެންބަރުންނަށް މަޖިލީގެ އިދާރާއިން މިއަދު ފޮނުވި މެސެޖެއްގައި ބުނީ އެ ކޮމިޓީގެ ބައްދަލުވުން އޮންނާނީ އަންނަ ބުރާސްފަތި ދުވަހުގެ ހެނދުނު 10:00 ގައި ކަމަށެވެ. އެ ބައްދަލުވުން ބާއްވަން ނިންމާފައި ވަނީ އެ ކޮމިޓީގެ މުގައްރިރު، އޭދަފުށީ ދާއިރާގެ މަޖިލިސް މެންބަރު، އަހުމަދު ސަލީމް ކަމަށް ވެސް އެ މެސެޖުގައި ބުނެފައިވެ އެވެ.

މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ ހިންގަމުންދިޔަ އިމާރާތް ވަނީ އެއްކޮށް އަނދައިގެން ގޮސްފަ އެވެ. އަދި، އެ އިމާރާތާ އިންވެގެން ހުރި އެންވަރަމެންޓް މިނިސްޓްރީގެ ވެސް ބޮޑުބައެއް ވަނީ ބޭނުން ނުކުރެވޭ ވަރަށް އަނދައިގެން ގޮސްފަ އެވެ.

އަލިފާނުގެ އެ ހާދިސާ އާ ގުޅިގެން އެެ ތިން މިނިސްޓްރީގެ ހިންގުން ވަގުތީގޮތުން މިހާރު ވަނީ ދަރުބާރުގެއަށް ބަދަލުކޮށްފަ އެވެ. ތިން މިނިސްޓްރީގެ އިތުރުން އަލިފާނުގެ ހާދިސާގައި އީޕީއޭ އާއި ސިޓީ ކައުންސިލްގެ ލޭންޑް އެންޑް ވައިޓަލްސްގެ ހިދުމަތް ދޭ ޑިޕާޓުމެންޓައް ވެސް ވަނީ ބޮޑެތި ގެއްލުންތަކެއް ވެފަ އެވެ.

އަލިފާނުގެ ހާދިސާއާ ގުޅިގެން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ފުލުހުންނާއި ޑިފެންސް މިިނިސްޓްރީގެ ބޭފުޅުން ހާޒިރު ކުރަން ނިންމާފައި މިވަނީ، އަލިފާނުގެ ހާދިސާއާ ގުޅިގެން ޖިނާއީ ތަހުގީގެއް ހިންގަން އިދިކޮޅު އެމްޑީޕީން ގޮވާލާފައި ވަނިކޮށެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުގައި އެ ޕާޓީގެ ލީގަލް ޑައިރެކްޓަރު މަހްފޫޒް ސައީދު ވިދާޅުވީ އަލިފާނުގެ ހާދިސާއާ ގުޅިގެން ޖިނާއީ މައްސަލައެއް ގޮތުގައި އެ މައްސަލަ ތަހުގީގުކޮށް އެކަން ހިނގި ގޮތް ދެނެ ގަންނަން ސިފައިންގެ އެހީތެރިކަން ހޯދުމަށް ފުލުހުންގެ އިދާރާގައި އެދި ސިޓީއެއް ފޮނުވާނެ ކަމަށެވެ.

"ފުރަތަމަ ކަމަކަށް މި ހާދިސާގައި މިނިވަން ތަހުގީގެއް ހިންގުމަކީ މުހިންމު ކަމެއް ކަމަށް ފެނޭ. އެކަމަށް އެދި އަޅުގަނޑުމެން ފުލުހުންނަށް ރިކުއެސްޓެއް އެބަ ކުރަން ޖިނާއީ މައްސަލައެއް ގޮތުގައި މައްސަލަ ތަހުގީގު ކޮށްދިނުމަށް ހާދިސާ ހިނގާފައި ވަނީ ކިހިނެއްތޯ ހޯދުމާ އެކީގައި. އަދި އޭގައި ސިފައިންގެ އެހީތެރިކަމަށް އެދުމާއި ސިފައިން ބައިވެރި ކުރުން އެއީ ވެސް އަޅުގަނޑުމެން އެދޭ ކަމެއް،" މަހުފޫޒް ވިދާޅުވި އެވެ.

އަލިފާނުގެ ހާދިސާގައި އިހުމާލުގެ އަމަލުތައް ފާހަަގަ ކުރެވޭތީ އެކަން ބަލައި ދިނުމަށް އިންޓަގްރިޓީ ކޮމިޝަންގައި އެދޭނެ ކަމަށް ވެސް މަހްފޫޒް ވިދާޅުވި އެވެ.

އޭގެއިތުރުން މަހްފޫޒް ވިދާޅުވީ މައްސަލަ ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯއްދެވުމަށް ސަރުކާރުން ނިންމިއިރު، ހާދިސާ ހިނގި ސީން ރޫޅާލައި އެތަން ސާފު ކުރުމުން ސުވާލު އުފެދޭ ކަމަށެވެ.