މިއަދު ހެދުނު ގްރީން ބިލްޑިންގްގައި އަލިފާން ރޯވެ ޖެހިގެން ހުރި އިމާރާތްތަކަށް އަލިފާންގަނޑު ފެތުރު ހިނގި ހާދިސާއާ ގުޅިގެން އެހީތެރިކަމަށް އެދުނު 50 މީހުން އެހީތެރިކަން ފޯރުކޮށްދީފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) އިން ބުނެފި އެވެ.

އެންޑީއެމްއޭއިން ސޯޝަލް މީޑިއާ ޕޯސްޓެއްގައި ބުނީ، މި 50 މީހުން އެ އިދާރާއަށް ގުޅުމާއެކު މިހާރު ވާނީ ރަޖިސްޓްރޭޝަން ހެދިފައި ކަމަށެވެ.

އެ މީހުންނަށް ބޭނުންވާ ޒަރޫރީ އެހީތެރިކަން ފޯރުކޮށްދިނުމަށް މި ހާދިސާއާ ގުޅިގެން ސޯޝަލް ސެންޓަރުގައި އިވެކުއޭޝަން ސެންޓަރެއް ތައްޔާރުކުރެވިފައިވާ ކަމަށްވެސް އެ އިދާރާއިން ބުންޏެެވެ. ނަމަވެސް އެހީތެރިކަމަށް އެދުނު މީހުންގެ އާއިލާތަކުން އެދިގެން އެ މީހުން މިހާރު ވަނީ އާއިލާގެ ގޭގެއަށް ބަދަލުކޮށްފައިވާ ކަމަށްވެ އެވެ.

އެންޑީއެމްއޭއިން ބުނީ އެ އިދާރާއިން މިހާރު ގެންދަނީ ގެއްލުން ލިބުނު އިމާރާތްތަކުގެ ރެޕިޑް އެސެސްމަންޓްއެއް ހަދަމުން ކަމަށާއި މިތަންތަނަށް މީހުން ބަދަލުވާން ރައްކާތެރިނަމަ އާއިލާތައް ބަދަލުކުރަން އެހީތެރިކަން ފޯރުކޮށްދޭނެ ކަމަށެވެ.

އަލިފާންގަނޑުގެ ސަބަބުން އިންފްރާސްޓްރަކްޗާ މިނިސްޓްރީ އާއި ހައުސިން މިނިސްޓްރީ އަދި އެންވާރަމަންޓު މިނިސްޓްރީ ހިންގަމުންދިޔަ އިމާރާތްތައް އަނދައި ހުލިވެ މަސައްކަތްތައް އެއްކޮށް ހުއްޓުމަކަށް ވަނީ އައިސްފަ އެވެ.

މީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އަދި މާލޭ ސިޓީ ކައުންސިލްގެ އޮފީސްތަކަށް ވެސް މި ހާދިސާގައި ގެއްލުންތަކެއްވެފައިވެ އެވެ.