މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދެނީ ސަރުކާރުގެ މަސް ކުންފުނި، މިފްކޯގެ ބޭންކު އެކައުންޓު އޯވާ ޑްރޯކޮށް ނެތް ފައިސާ ނަގައިގެންކަން "އަދަދު" ނޫހަށް އެނގިއްޖެ އެވެ.

މި ނޫހަށް އެނގިފައިވާ ގޮތުގައި ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް މަސްވެރިންނަށް ފައިސާ ދިނުމަށް އެ ބޭންކުން މިފްކޯއަށް 700 މިލިއަން ރުފިޔާ އޯވާޑްރޯ ފެސިލިޓީއެއް ވަނީ ހަމަޖައްސައިދީފަ އެވެ. އެ ފެސިލިޓީ މެދުވެރިކޮށް ނަގާ ފައިސާ އަނބުރާ ދެއްކުމަށް ޝަރުތުކޮށްފައިވަނީ ޑޮލަރުންނެވެ.

މިފްކޯއިން ބޭރުކުރާ މަހަށް ޑޮލަރުން އާމްދަނީ ލިބެ އެވެ.

މިކަމާ ގުޅިގެން ބީއެމްއެލްގެ ބަހެއް ނުލިބެ އެވެ.

މަސްވެރިންނަށް 48 ގަޑިއިރުގެ ތެރޭގައި ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދު ނުފުއްދި ދިގުލައިގެން ދާތީ މަސްވެރިންގެ ކަންބޮޑުވުންތައް އޮތީ ބޮޑުވެފަ އެވެ.

ރައީސްގެ ވައުދާ އެއްގޮތަށް މިއަދުން ފެށިގެން ފައިސާ ދޫކުރަން ފަށާނެ ކަމަށް ރައީސް ވިދާޅުވީ، ގާނޫނުއަސާސީގެ ދިފާއުގައި ރައްޔިތުންގެ ނަމުގައި، އެމްޑީޕީން އިސްވެ މާލޭގައި މިރޭ ބާއްވާ ބޮޑު ޖަލްސާއަށް ތައްޔާރުވަމުން ދަނިކޮށް އެވެ.

މިއީ ފިނޭންސް މިނިސްޓްރީ އާއި ބީއެމްއެލް އާއި މިފްކޯ މެދުވެރިވެގެން ހަދާފައިވާ އެރޭންޖުމަންޓެއް ކަމަށް ރައީސް އިއްޔެ ވިދާޅުވީ ކ. ގާފަރުގައި ވާހަކަ ދައްކަވަމުންނެވެ. މައުލޫމާތު ލިބޭ ގޮތުގައި މި އޯވާ ޑްރޯ އެގްރީމެންޓަށް ގެރެންޓީ ދީފައިވަނީ ސަރުކާރުންނެވެ.

ބީއެމްއެލްއާއެކު ވި އެއްބަސްވުމުގެ ދަށުން، އިއްޔެއާ ހަމައަށް މަސްވެރިންނަށް ދޫނުކޮށް ހުރި 38 މިލިއަން ރުފިޔާ މިހާރު ޖަމާކޮށްފައިވާ ކަމަށް ވެސް ރައީސް ވިދާޅުވި އެވެ.

މިފްކޯއިން ވަނީ މަސް ގަންނަ އަގު ވެސް 5ރ. އާއި 16ރ. ދެމެދުގެ ރޭޓަކަށް ތިރިކޮށްފަ އެވެ. ނަމަވެސް، ރައީސް މުއިއްޒުގެ ރިޔާސީ ވައުދަކީ މަސްކިލޯއެއް 20ރ. ގައި ހިފެހެއްޓުމެވެ.