އައްޑޫ ސިޓީ ކިނބިވައު ބީޗު ސަރަހައްދަށް މުއްދަތު ހަމަވެފައިވާ ގިނަ އަދަދެއްގެ ކްލޮރިން އެޅުމުގެ ސަބަބުން އެ ސަރަހައްދުގެ ދިރުންތައް މަރުވާން ފަށައިފި އެވެ.

އައްޑޫ ނޭޗާ ޕާކުގެ ޕާކް ރޭންޖާ އަބްދުލް ހާދީ "އަދަދު" އަށް ވިދާޅުވީ އައްޑޫ ސިޓީ ހިތަދޫ ރީޖަނަލް ހޮސްޕިޓަލް ކައިރީ ބީޗު ސަރަހައްދަށް ގިނަ އަދަދެއްގެ ކްލޮރިން އެޅުމުގެ ސަބަބުން ގޮނޑު ދޮށަށް މަރުވެފައިވާ ގިނަ އަދަދެއްގެ މަސްތައް ލައްގައި މުޅި ސަރަހައްދު އެއްކޮށް މަރުވެފައިވާ ކަމަށެވެ.

"ބޮޑު ގެއްލުމެއް އެއީ. ފަރެއްގެ ތަންކޮޅެއް ދިރެން އެބަ ނަގާ އެތައް އަހަރު. އެ ސަރަހައްދު އެއްކޮށްހެން މަރުވެފައި އެ އޮތީ. އެ ލެވެލްގައި މަސްތަކާ އެއްޗެހި މަރުވެގެން ލައްގާނީ ވަރަށް ބޮޑު އިމްޕެކްޓެއް ކުރީމަ،" އޭނާ ވިދާޅުވި އެވެ.

އެ ސަރަހައްދުގެ ފަރުގެ ބޮޑު ބައެއް ވެސް ހުދުވެފައިވާކަން ފާހަގަކުރައްވާ ހާދީ ވިދާޅުވީ އެ ސަރަހައްދުގައި ހުރި ފެހި ކުލަައިގެ މަށާ ވެސް އެއްކޮށް ހުދުވެފައިވާ ކަމަށެވެ.

"އެ ސަރަހައްދުގެ މަސްތަކަށް ބަލާއިރު ވަރަށް ކުދި ކުދި މަހުން ފެށިގެން ބޮޑެތި މަސްތައް ވެސް މަރުވެފައި ހުރި. ބޯވަދިލަ މަހާއި ބޯވަ އާއި ކުދި ކުދި ޑިނގާ ކަހަލަ އެއްޗެހި ވެސް މަރުވެފައި ހުރީ. އެ ސަރަހައްދު އެއޮތީ ރައްކާތެރި ސަރަހައްދެއް ނޫން ގޮތުގައި މިހާރު،" އޭނާ ވިދާޅުވި އެވެ.

ހާދީ ވިދާޅުވީ ސީދާ އެ ސަރަހައްދަށް ލިބުނު ގެއްލުން ދެނެގަނެވޭނީ ކްލޮރިންގެ އަސަރު ކެނޑުމުން ކަމަށެވެ. އެގޮތުން ކްލޮރިން އަސަރު ކެނޑުމުން އެ ސަރަހައްދަށް ފައިބައި ލިބުނު ގެއްލުން ބަލާނެ ކަމަށް އޭނާ ވިދާޅުވި އެވެ.

ކިނބިވައު ސަރަހައްދުން 25 ކިލޯގެ 15 ވަރަކަށް ކްލޮރިން ޓައްޕު ފެނިފައިވާއިރު، އެއީ އިންޑަސްޓްރިއަލް ބޭނުންތަކަށް ބޭނުންކުރާ ތަކެތި ކަމަށް ބެލެވޭ ކަމަށާއި ނަމަވެސް އެއީ ކޮން ބައެއް ކުރި ކަމެއްކަން ނޭނގޭ ކަމަށް ހާދީ ވިދާޅުވި އެވެ.

އެ ސަރަހައްދަށް ކްލޮރިން އެޅި މައްސަލަ ތަހުގީގު ކުރުމަށް އެދި އައްޑޫ ނޭޗާ ޕާކުން ވަނީ ފުލުހަށް ހުށަހަޅާފަ އެވެ.