އައްޑޫއިން ފުރައިގެން މާލެއަށް ދަތުރު ކުރަމުންދިޔަ ބޯޓެއްގައި ހުރި މީހަކު ފުވައްމުލަކާއި އައްޑޫއާ ދެމެދު ކަނޑަށް ގެއްލުމާ ގުޅިގެން އެ މީހާ ހޯދުމުގެ މަސައްކަތް އެމްއެންޑީއެފުން ފަށައިފި އެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ ގެއްލިފައި ވަނީ ނޭޕާލްގެ ރާޖު ކުމާރު ނަމަކަށް ކިޔާ މީހެއް ކަމަށެވެ. އޭނާ ދަތުރު ކުރަމުންދިޔައީ ސީމެކްސް ނަމަކަށް ކިޔާ ބޯޓަކުން ކަމަށް ވެސް ފުލުހުން ބުންޏެވެ.

އެ ބޯޓު އައްޑޫއިން ފުރީ ރޭ 11:30 ހާއިރު އެވެ. އެ ވަގުތު ރާޖު ކުމާރު ބޯޓުގައި ހުރި ކަމަށާއި އަދި ދަންވަރު 01:15 ހާއިރު ބޯޓުގެ ކެޕްޓަނާ އޭނާ ވާހަކަ ދެއްކި ކަމުގެ މައުލޫމާތު ލިބިފައިވާ ކަމަށް ވެސް ފުލުހުން ބުންޏެވެ.

ބޯޓުގައި އޭނާ ނެތްކަން އެ ބޯޓުގައި ތިބި މީހުންނަށް އެނގުނީ އައްޑޫއިން ފުރައިގެން ގޮސް ފުވައްމުލަކާ އަށް މޭލަށް ކައިރިވެފައި ވަނިކޮށް ކަމަށް ބޯޓު މީހުންނާ ހަވާލާދީ ފުލުހުން ބުންޏެވެ.

ރާޖު ކުމާރު ގެއްލިފައިވާ ކަމުގެ ރިޕޯޓު ލިބުނީ ފުލުހުންނަށް ލިބުނީ ރޭގައި ކަމަށާއި އެ މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.