އައްޑޫ ސިޓީގައި ހުރި ވެލިތަކެއް އިންފްރާސްޓަރަކްޗާ މިނިސްޓްރީގެ ބެލުމުގެ ދަށަށް ގެންދިޔުމުން އައްޑޫ ސިޓީގެ މޭޔަރު އަލީ ނިޒާރު ހިތްހަމަ ނުޖެހުން ފާޅުކޮށް، ހަމަ އާއި އުސޫލުން ބޭރުން އަންގާ އެންގުމަކަށް އަމަލު ނުކުރާނެ ކަމަށް ވިދާޅުވެއްޖެ އެވެ.

މައްސަލަ ބޮޑުވެފައިވާ ވެލި ފުންޏަކީ އައްޑޫ ސިޓީ ހަންކެޑެ ބްރިޖް އެޅުމަށް ހެދި ވަގުތީ ފަސްގަނޑުގައި ހުރި ވެއްޔެވެ. އައްޑޫ އަކީ ވެލި ލިބުން އުނދަގޫ އަތޮޅަކަށް ވުމާއެކު، އައްޑޫ ސިޓީ ކައުންސިލުން މަސައްކަތް ކުރީ ރައްޔިތުންގެ ބޭނުންތަކަށް އެ ވެލި ބޭނުން ކުރުމަށެވެ. ސަރުކާރުން ބޭނުންވީ ލިންކް ރޯޑު ހެދުމަށް އެ ވެލި ބޭނުން ކުރުމަށެވެ.

އައްޑޫ މޭޔަރު ނިޒާރު އެކްސްގައި ކުރެއްވި ޕޯސްޓެއްގައި ވިދާޅުވީ އެއްވެސް މަޝްވަރާއެއް ކުރުމެއް ނެތި އެ ވެލިފުނި މިނިސްޓްރީގެ ބެލުމުގެ ދަށަށް ގެންދެވިފައިވާ ކަމަށް އެންގެވުމަކީ ދައުލަތް ހިންގަން ހެދިފައި ހުރި ގާނޫނުތަކާއި ފުށުއަރާ "ޖާހިލު ނިންމުމެއް" ކަމަށެވެ.

އެއީ ރައްޔިތުންނާއި ''ތޮޅެން'' މަގުފަހި ކުރަން ހިންގާ އަމަލެއް ކަމަށާއި ލާމަރުކަޒީ ގާނޫނު ފުނޑާލަން އިތުރު ކުރި ބޮޅެއް ކަމަށް ވެސް، ކުރިން ރައްޔިތުންގެ މަޖިލީހުގެ މެންބަރުކަން ވެސް ކުރެއްވި ނިޒާރު ވިދާޅުވި އެވެ.

"ގާނޫނާއި ހަމަ އާއި އުސޫލުން ބޭރުން އަންގާ އެންގުންތަކަށް އައްޑޫ ސިޓީ ކައުންސިލްއިން އަމަލު ނުކުރާނެކަން މައުލޫމާތައް ޓަކައި ދަންނަވަން. ކަންކަން ނިންމުމުގައި މަޝްވަރާ އިސްކޮށް ދައުލަތް ހިންގުމުގެ ޒަމާނީ ހަމަތަކަށް ފަރިތަވުމަށް ވެސް ދަންނަވަން،" ނިޒާރު ވިދާޅުވި އެވެ.

އިންފްރާސްޓަރަކްޗާ މިނިސްޓަރު އަބްދުﷲ މުއްތޮލިބު ދެއްވި ރައްދުގައި ވިދާޅުވީ މިނިސްޓްރީގެ ހުއްދަ ނެތި އެވެލި ބޭނުން ނުކުރުމަށް އެދުނީ އައްޑޫ ސިޓީގެ ލިންކު ރޯޑު އަލުން ހެދުމުގައި ގިނަ އަދަދަކަށް ވެލި ބޭނުން ވެދާނެ ކަމަށް ފެންނާތީ ކަމަށެވެ.

މިވަގުތު އައްޑޫ ސިޓީގެ ލިންކު ރޯޑު އަލުން ހެދުމަށްވުރެ އައްޑޫ ސިޓީގެ ރައްޔިތުންނަށް އެވެލި ބޭނުންކުރަން ޖެހޭ އެހެން މުހިއްމު ކަމެއްވާ ނަމަ ކައުންސިލުން އެދުމުން އެވެލި ދޫކުރުމަށް މިނިސްޓްރީ އިން ދެކޮޅެއް ނުހަދާނެ ކަމަށް މުއްތޮލިބް ވިދާޅުވި އެވެ.