މޯލްޑިވްސް ކަސްޓަމްސް ސާވިސްގެ ސައުތު ރީޖަނަލް ހެޑް އޮފީސް އައްޑޫ މަރަދޫގައި އިއްޔެ ރަސްމީކޮށް ހުޅުވައިފި އެވެ.

އެ އޮފީސް ހުޅުއްވައިދެއްވީ ހޯމް މިނިސްޓަރު، އަލީ އިހުސާން އާއި ކަސްޓަމްސްގެ ކޮމިޝަނާ ޖެނެރަލް ފާތިމަތު ދިޔާނާ އެވެ.

އެ ރަސްމިއްޔާތުގައި ކަސްޓަމްސްގެ އޮފިސަރުންނާ މުހާތަބު ކުރައްވައި ވާހަކަދައްކަވަމުން ދިޔާނާ ވަނީ ކަސްޓަމްސްގެ ގާނޫނު ތަންފީޒުކޮށް ބޯޑަރު ބަލަހައްޓާއިރު، އެންމެ މަތީ ފަންތީ ފެންވަރުގައި ހަރުދަނާކޮށް ޒިންމާދާރުކަމާއެކު މަސައްކަތް ކުރުމަށް ނަސޭހަތްތެރިވެފަ އެވެ.

ކަސްޓަމްސްގެ ސައުތު ރީޖަނަލް ސަރަހައްދުގައި ވަޒީފާ އަދާކުރާ އޮފިސަރުންނަށް ކޮމެންޑޭޝަން ރިބަން އެރުވުން ވެސް އެ ރަސްމިއްޔާތުގައި އޮތެވެ. ކަސްޓަމްސް އޮފިސަރުންނަށް ރިބަން އެރުވީ ކަސްޓަމްސްގެ ކޮމިޝަނަރު، ދިޔާނާ އެވެ.

ކަސްޓަމްސްގެ ސައުތު ރީޖަނަލް އޮފީސް ހުޅުވީ މަރަދޫ ބަނދަރު ސަރަހައްދުގަ އެވެ.