ބަންގްލަދޭޝްގެ މައިނޯރިޓީގެ ރައްކާތެރިކަމާ މެދު އިންޑިއާގެ ފޮރިން ސެކްރެޓަރީ ވިކްރަމް މައިސީރީ ކަންބޮޑުވުން ފާޅު ކުރައްވައިފި އެވެ.

ބަންގްލަދޭޝްގައި އުޅޭ ހިންދޫ މީހުންނަށް ދޭ ހަމަލާތައް ފަހަކަށް އައިސް އިތުރުވަމުން ދިޔުމާ ގުޅިގެން އިންޑިއާ އިން އަންނަނީ އެކަމާ ގުޅިގެން ކަންބޮޑުވުން ފާޅުކުރަމުންނެވެ. އެހެންވެ، މައިނޯރިޓީންގެ ހައްގުތައް ރައްކާތެރިކަން ކަށަވަރު ކުރުމަށް އިންޑިއާ ވަނީ ގޮވާލައިފަ އެވެ.

މިއީ ބޮޑުވަޒީރު ޝައިހް ހަސީނާގެ ވެރިކަން ނިމުނު ފަހުން އިންޑިއާގެ އިސްވެރިޔަކު ބަންގްލަދޭޝްއަށް ކުރައްވާ ފުރަތަމަ ރަސްމީ ދަތުރެވެ.

މި ދަތުރުގައި މީޑިއާ ވާހަކަ ދައްކަވަމުން މައިސީރީ ވިދާޅުވީ ބަންގްލަދޭޝްގައި ތިބި މައިނޯރިޓީންގެ ރައްކާތެރިކަމާއި ވެލްފެއާ މެދު ކަންބޮޑުވުންތަކާ ގުޅިގެން އެ ގައުމުގައި އޮތް ވަގުތީ ސަރުކާރުގެ އިސްވެރިންނާ އެކު މަޝްވަރާތަކެއް ކުރެވިފައިވާ ކަމަށެވެ.

"އިންޑިއާ އިން ބަންގްލަދޭޝްގެ ވަގުތީ ސަރުކާރާ ގާތް ގުޅުމެއް ބާއްވައި އެކީގައި މަސައްކަތް ކުރަން ބޭނުންވޭ. ބަންގްލަދޭޝްއާ އެކު ކުރެވުނު މަޝްވަރާތަކުގައި މައިނޯރިޓީންގެ ރައްކާތެރިކަމާއި ވެލްފެއާއާ ގުޅިގެން ހުރި ކަންބޮޑުވުންތައް ހިއްސާކޮށް މަޝްވަރާ ކޮށްފައިވާނެ،" އޭނާ ވިދާޅުވި އެވެ.

މައިސީރީ ވިދާޅުވީ އިންޑިއާ އާއި ބަންގްލަދޭޝްއާ ދެމެދު އޮތް ހާރިޖީ ގުޅުން ބަދަހި ކުރުމަށް ވެސް މަޝްވަރާ ކުރެވުނު ކަމަށެވެ.