ހަނގުރާމަވެރި ޖަމާއަތްތަކުން ސީރިޔާގެ ވެރިރަށް ދިމިޝްކު ހިފައި، ދުވަސްވީ ހުދުމުހުތާރު ވެރިކަން ނިމުމަކަށް ގެނައުމާއެކު އެ ގައުމުގެ ރައީސް ކަމުން ބަޝާރުލް އަސަދު އިސްތިއުފާ ދެއްވައި، އާއިލާއާއެކު އާއިލާއާއެކު ވަޑައިގަތީ ރަޝިއާއަށް ކަމަށް ރިޕޯޓުތައް ބުނެފި އެވެ.

ސީއެންއެން އަދި ރޮއިޓާސް އިން ރިޕޯޓުކޮށްފައިވާ ގޮތުގައި އަސަދު އަދި އާއިލާ މިހާރު ތިއްބެވީ ރަޝިއާގެ ވެރިރަށް މޮސްކޯގަ އެވެ. ރަޝިއާގެ އޮފިޝަލުންނާ ހަވާލާދީ ރިޕޯޓުތައް ބުނާ ގޮތުން އެ ގައުމުން މިހާރު އަސަދު އަދި އާއިލާއަށް ވަނީ ހިމާޔަތް ދީފަ އެވެ.

ސީއެންއެން އިން ރިޕޯޓުކޮށްފައިވާ ގޮތުން، ހަނގުރާމަވެރިން ދިމިޝްކު ހިފުމާއެކު އަސަދު އެ ސިޓީ ދޫކޮށް ދިޔައީ އެ ގައުމުގައި ހުރި ރަޝިއާގެ އަސްކަރީ މަރުކަޒަކަށެވެ. އިސްތިއުފާ ދެއްވީ އެ މަރުކަޒުގައި ހުންނަވައިގެން ކަމަށް ބެލެވެ އެވެ.

އަސަދުއަށް ހިމާޔަތް ދިނުމަށްފަހު ރަޝިއާއިން މިހާރު ވަނީ އދ. ގެ ސަލާމަތީ މަޖިލީހުގެ ސިއްރު ބައްދަލުވުމެއް ބޭއްވުމަށް އެދިފަ އެވެ.

ސީރިއާގައި ރަޝިއާގެ ގިނަ އަސްކަރީ މަރުކަޒުތަކެއް ހުރި ނަަމަވެސް، އެ ތަންތަނަށާއި އެ ގައުމުގެ ޑިޕްލޮމެޓުންނަށް ގެއްލުން ނުދޭނެ ކަމުގެ ޔަގީންކަން، ސީރިއާގެ ކޮންޓްރޯލް ނަގާފައިވާ ހަނގުރާމަވެރި ޖަމާއަތްތަކުން ދީފައިވާ ކަމަށް ރިޕޯޓުތައް ބުނެ އެވެ.

ރަޝިއާ އަކީ މާޗު 2011 ގައި ސީރިއާގައި ފެށި ދާހިލީ ހަނގުރާމާގައި އަސަދު އަށް އެންމެ ބޮޑު އެހީތެރިކަމެއް ވެދިން އެއް ގައުމެވެ. ރަޝިއާގެ ސިފައިންވެސް ވޭތުވެދިޔަ ތަހަރުގެ ތެރޭގައި ސީރިއާގެ އިދިކޮޅު ގްރޫޕުތަކާ ހަނގުރާމަކުރި އެވެ.

އަސަދުގެ ވެރިކަން ނިމުކަމަށް އައުމާއެކު ގިނަ ގައުމުތަކަކުން އަންނަނީ އެކަމަށް މަރުހަބާ ކިޔާ ސީރިއާގައި އާ ސަރުކާރެއް އެކުލަވާލުމަށް ގޮވާލަމުންނެވެ.