ކެފޭ/ރެސްޓޯރެންޓްތަކުގައި ދުންފަތުގެ އިސްތިއުމާލު ކުރުން މަނާ ސަރަހައްދުތަކުގައި އެކަން ކުރާނަމަ، އެތަނެއްގެ ވިޔަފާރި ހުއްދަ ބާތިލު ކުރެވޭ ގޮތަށް ގާނޫނު ބަދަލުކުރަން ނިންމާފައިވާކަން ހެލްތު މިނިސްޓްރީން ހާމަ ކޮށްފި އެވެ.

ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑެޕިއުޓީ ޑިރެކްޓަރު ހަސަން މުހައްމަދު ވިދާޅުވީ ކެފޭ/ރެސްޓޯރެންޓްތަކުގެ މަނާ ސަރަހައްދުތަކުގައި ދުންފަތުގެ އިސްތިއުމާލު ކޮށްގެން އެ ތަނެއް ޖޫރިމަނާ ކުރެވޭ ފައިސާ ނުދައްކައިފިނަމަ، އެ ތަނަކަށް ހެލްތުން ދޫކޮށްފައިވާ ހުއްދައިގެ އިތުރުން ވިޔަފާރީގެ ހުއްދަ ވެސް ބާތިލު ކުރެވޭނެ ކަމަށެވެ.

ނަމަވެސް, ހަސަން ވިދާޅުވީ ނަތީޖާ ފެންނަން ފަށާނީ ގާނޫނު ރަނގަޅަށް ތަންފީޒު ކޮށްގެން ކަމަށެވެ.

"މި ގާނޫނުގައި އެބަހުރި އެ ތަނަށް ހެލްތުން ދޫކޮށްފައި ހުންނަ ހުއްދަ ބާތިލު ކުރުމުގެ ފުރުސަތު އެބައޮތް މިހާރު ގާނޫނުން. އަދި އެ ވަރުން ވެސް އެ ތަން އިސްލާހު ނުވެއްޖެނަމަ އެތަނަށް ދޫކޮށްފައި އޮތް ވިޔަފާރީގެ ހުއްދަ ވަގުތީ ގޮތުން ހުއްޓުވައި، ވަކި ހިސާބަކުން ބާތިލު ކުރުމުގެ ފުރުސަތު ވެސް އެބަ އޮތް،" އޭނާ ވިދާޅުވި އެވެ.

އާންމު ތަންތަނުގައި ދުންފަތުގެ އިސްތިއުމާލު ކުރުމަކީ ކަންބޮޑުވާ ކަމެއްކަން ފާހަގަ ކުރައްވާ ހެލްތު މިނިސްޓަރު އަބްދުﷲ ނާޒިމް ވިދާޅުވީ ގާނޫނުތައް ތަންފީޒު ކުރުމުގައި ގޮންޖެހުންތަކެއް ހުރި ކަމަށެވެ.

އެގޮތުން އެ ގާނޫނު ތަންފީޒު ކުރެވޭނެ މަގުތައް މިހާރު ކުރެވެމުންދާ މަސައްކަތުގެ ދަށުން ކުރެވި، ކުރިއަށް އޮތް ތަނުގައި އެންމެން ގުޅިގެން އެކަން ކުރެވޭނެ ކަމަށް ނާޒިމް ވިދާޅުވި އެވެ.

"މިފަދަ ކޮންމެ ކަމެއްގައި ތަންފީޒު ކުރުމުގައި ގޮންޖެހުންތަކެއް ހުރޭ. އަޅުގަނޑުމެން އެންމެ ފުރަތަމަ މިކަން ތަންފީޒު ކުރަން އެދޭ މުއައްސަސާއެއްގެ ހައިސިއްޔަތުން ވަރަށް ބޮޑަށް ކަންބޮޑުވާ ވެސް ކަމެއް އެނގޭތޯ،" ނާޒިމް ވިދާޅުވި އެވެ.

"މިފަދަ ކޮންމެ ކަމެއް އެންމެ ސެކްޓާއެއް ގުޅިގެން އަޅުގަނޑުމެންނަށް ހާސިލު ނުވާނެކަން އެއީ އެނގޭ ކަމެއް. ކަށަވަރުވާ ކަމެއް. މީގައި ތަންފިޒީ އިދާރާތަކާއި އާންމު މުޖުތަމައުގެ އެއްބާރުލެއްވުމާއި ކޮންމެ ފަރުދަކީމެ މިފަދަ ކަމެއްގައި އެހީތެރިކަން ހުރި ފަރުދެއްކަމުގެ ވިސްނުން މުޅި މުޖުތަމައުއަށް އަޅުގަނޑުމެން ގެންނަން އެބަޖެހޭ."

ސަރުކާރުން ވަނީ ދުންފަތް ކޮންޓްރޯލް ކުރުމަށް ފަސް އަހަރުގެ މާސްޓާ ޕްލޭނެއް އެކުލަވާލުމުގެ މަސައްކަތް ފަށައި، އެކަމަށް ހިޔާލު ހޯދުމުގެ މަސައްކަތް ވެސް ފަށާފަ އެވެ.

ސަރުކާރުން އަންނަނީ ދުންފަތް ކޮންޓްރޯލް ކުރުމަށް އެކި ގޮތް ގޮތުން މަސައްކަތްތަކެއް ކުރަމުންނެވެ. އެގޮތުން ދުންފަތުން ނަގާ ޑިއުޓީ ބޮޑުކޮށް، ދުންފަތުން ދުރު ކުރުމަށް ފަރުވާ ދެވޭނެ ނިޒާމު ހަރުދަނާ ކުރުމަށް ވެސް އަންނަނީ މަސައްކަތް ކުރަމުންނެވެ.