މި މަހުގެ 15، އިން 30، އަށް ރިސެސްއަށް ދިޔުމަށް ކްރިމިނަލް ކޯޓުގެ ގާޒީންގެ މަޖިލީހުން ނިންމައިފި އެވެ.

އެ ކޯޓުން މިއަދު ނެރުނު ބަޔާނެއްގައި ބުނީ ޑިސެމްބަރު މަހު އެއްކޮށް ރިސެސްއަށް ނުދާން ނިންމީ، އެ ކޯޓަށް ދިމާވެފައިވާ ޖާގައިގެ ދަތިކަމުގެ ސަބަބުން ކަމަށެވެ.

އެގޮތުން މިހާރު ވެސް އެ ކޯޓުގައި އަޑުއެހުންތައް ބާއްވަނީ ޝަރީއަތްކުރާ މާލަންތައް އެކި ދުވަހު އެކި ގާޒީންނަށް ބަހާލައިގެން ކަމުން އެންމެ ބޭނުންވާ މިންވަރަށް އަޑުއެހުންތައް ނުބޭއްވޭކަން ކްރިމިނަލް ކޯޓުގެ ބަޔާނުގައި ބުނެފައިވެ އެވެ.

ރިސެސްއަށް ދާ ދެ ހަފުތާއެއްހާ ދުވަހުގެ ތެރޭގައި ވެސް ހާއްސަ ބައެއް މަސައްކަތްތައް ކުރާނެ ކަމަށް ކްރިމިނަލް ކޯޓުން ބުންޏެވެ.

އެގޮތުން، ކޯޓުގެ އިމާރާތް ބަދަލުކުރުމުގެ މަސައްކަތާއި ބަންދުގެ އަޑުއެހުންތަކާއި ކޯޓު އަމުރު ދޫކުރުމުގެ އިތުރުން ހޭބިއަސް ކޯޕަސް އަމުރުތަކާއި މުދާ ދޫކުރުމަށް އެދި ހުށަހަޅާ މައްސަލަތަކުގެ ވާނުވާ ބަންދުގައި ތިބި މީހުންގެ މައްސަލަތަކާއި މައްސަލަތައް ނިންމަން މުއްދަތެއް ކަނޑައަޅާފައިވާ މައްސަލަތަކުގެ މަސައްކަތް މި މުއްދަތުގައި ކްރިމިނަލް ކޯޓުން ކުރާނެ އެވެ.

ދަތިތަކާއެކު ވެސް މި އަހަރު ނޮވެމްބަރުގެ ނިޔަލަށް ކުރެވިފައިވާ މަސައްކަތްތަކުގެ ތަފާސްހިސާބުތައް ވެސް ކްރިމިނަލް ކޯޓުން މިއަދު ވާނީ އާންމުކޮށްފަ އެވެ.

ކްރިމިނަލް ކޯޓުން މި އަހަރު ނޮވެމްބަރުގެ ނިޔަލަށް ކުރި މަސައްކަތްތައް

• 7958 ގަޒިއްޔާގެ އަޑުއެހުން ތާވަލުކުރި.
• 515 ގަޒިއްޔާ ކޯޓުން ނިންމި.
• 2615 މީހުންގެ ބަންދާ މެދު ގޮތެއް ނިންމި.
• 2043 ތަފާތު އެކި ކޯޓު އަމުރު ދޫކުރި.

ކްރިމިނަލް ކޯޓުން ރިސެސްއަށް ދާން ނިންމާފައިވާއިރު، މިއަދުން ފެށިގެން ޑިސެމްބަރު މަހުގެ ނިޔަލަށް ހައިކޯޓުވެސް ވަނީ ރިސެސްއަށް ގޮސްފަ އެވެ.