އެމުގެ ގޮތުގައި ރާއްޖޭގައި އާންމުކޮށް ބޭނުންކޮށް އުޅޭ ނިލަމެހި އާއިލާގެ މުޅިން އާ ވައްތަރެއްގެ މަހެއް ސައިންސްވެރިން ހޯދައިފި އެވެ.

ގާތްގަނޑަކަށް 330 ފޫޓު އަޑިން ހޯދި އެ މަހަށް ދިން ނަމަކީ "އަބަދަށް ކްރޯމިސް" އެވެ. ކްރޯމިސްއަކީ ނިލަމެހި އާއިލާގެ މަސްތަކަށް އިނގިރޭސިން ކިޔާ ނަމެވެ. އެ މަސް ހޯދީ ޅ. އަތޮޅުންނެވެ.

އެ މަސް ހޯދުމުގެ މަސައްކަތް ކުރި ފަސް މީހުންގެ ތެރޭގައި ދިވެހި ބަޔަލޮޖިސްޓު އަހުމަދު ނަޖީބު ވެސް ހިމެނެ އެވެ. ނަޖީބަކީ މީގެ ކުރިން ވެސް އާ ވައްތަރުތަކުގެ މަސް ހޯދާފައިވާ މީހެކެވެ.

އަލަށް ހޯދި "އަބަދަށް ކްރޯމިސް" ފެނުމުން ސައިންސްވެރިން ވަނީ އެ މަސް ކުޑަ ނެޓެއް ބޭނުންކޮށްގެން ހިފައި، ވަގުތުން ލެބޯޓަރީއަށް ގެންގޮސް ޓެސްޓުތައް ހަދައިފަ އެވެ.

ނިލަމެހި އާއިލާއަކީ އެންމެ ބާވަތްތައް ގިނަ އާއިލާ އެވެ. އެ އާއިލާއަށް ނިސްބަތްވާ 78 ސްޕީޝީސް މިހާތަނަށް ހޯދިފައިވެ އެވެ.

ނިލަމެހި އާންމުކޮށް ދިރިއުޅެނީ ކަނޑުގެ މެސޮފޮޓިކް ޒޯނުގަ އެވެ. އެއީ ކަނޑުގެ ސަތަހަ ނުވަތަ މަތީ ފަށަލަ އާއި އެންމެ ފުނާ ދެމެދެވެ. އެ ހިސާބުގަނޑު ވަކި ކުރަނީ އިރުގެ އަލި ފޯރާ މިންވަރަށް ބަލައިގެންނެވެ.

ހަވާއީ އަދި ކެރީބިއަންގައި ކަނޑުގެ މެސޮފޮޓިކް ޒޯނުގެ ދިރާސާތައް ހެދުނަސް އިންޑިއާ ކަނޑު އަދި ދުނިޔޭގެ އެހެން ހިސާބުތަކުގައި މެސޮފޮޓީކް ޒޯނުގެ ދިރާސާތައް ހެދެނީ މަދުންނެވެ.