ކުޅުދުއްފުށި ސިޓީ ކައުންސިލުން ހިންގާ ނޮލެޖް ސެންޓަރަށް ދިރާގުން އެހީތެރިކަން ފޯރުކޮށްދީފި އެވެ.

ދިރާގުގެ އިޖުތިމާއީ ޒިންމާގެ ދަށުން ނޮލެޖު ސެންޓަރަށް ކޮމްޕިއުޓާ ސިސްޓަމާއި، ވީޑިއޯ ކޮންފަރެންސް ކުރިއަށް ގެންދާނެ ވަސީލަތާއި، ލައިބްރަރީއަށް ފޮތްތައް ވަނީ ހަދިޔާކޮށްފަ އެވެ.

ދިރާގު މެނޭޖަރު ކޯޕަރޭޓް ސޯޝަލް ރެސްޕޮންސިބިލިޓީ، ބިޝާރާ ހަމީދު ވިދާޅުވީ އެ ކުންފުނިން ހަދިޔާކުރި ޑިޖިޓަލް ވަސީލަތްތަކާއި ފޮތްތަކުގެ އެހީގައި, ފޮތް ކިއުމަށް ލޯބިކުރާ މުޖުތަމައުއެއް ބިނާވެގެން ދާނެ ކަމަށް އުއްމީދު ކުރައްވާ ކަމަށެވެ.

މި ވަސީލަތްތަކުގެ ބޭނުމަކީ ޓެކްނޮލޮޖީއަށް ވަސީލުވުން ފަސޭހަކޮށް، އުނގެނުމަށް ލޯބި އުފައްދައި، ޑިޖިޓަލް ލިޓަރަސީ އިތުރުން ކުރުން ކަމަށެވެ.

ދިރާގުގެ މެނޭޖާ ސޯޝަލް ރެސްޕޮންސިބިލިޓީ، ބިޝާރާ ހަމީދު ވިދާޅުވީ ކުޅުދުއްފުށި ނޮލެޖް ސެންޓަރަށް އެހީތެރިކަން ފޯރުކޮށްދެވުމަކީ ލިބޭ އުފަލެއް ކަމަށާއި މުޖުތަމައުތަކަށް އެކި ގޮތް ގޮތަށް އެހީތެރިވުމަކީ ދިރާގުގެ އަމާޒެއް ކަމަށެވެ.

ދިރާގުން އަންނަނީ އެ ކުންފުނީގެ ސީއެސްއާރްގެ ދަށުން އެކި ރަށްރަށަށް ބޭނުންވާ އެހީތެރިކަން ފޯރުކޮށްދެމުންނެވެ.

ކުޅުދުއްފުށީ ނޮލެޖް ސެންޓަރަކީ ޕަބްލިކް ލައިބްރަރީއެއްގެ އިތުރުން ވެލްނަސް ސެންޓަރަކާ އެކު ގާއިމުކޮށްފައިވާ ތަނެކެވެ.