ލ. މާމެންދޫގައި އެކަށީގެންވާ މިންވަރަށް ކަރަންޓު ނުއުފެއްދޭތީ ފެނުގެ ހިދުމަތް މެދުކެނޑިފައި ހުންނަތާ މަހެއްހާ ދުވަސްވެއްޖެ އެވެ.

މާމެންދޫ ކައުންސިލުގެ ރައީސް ހަސަން ރަމީޒު ވިދާޅުވީ ރަށުގެ ކަރަންޓުގެ ހާލަތު އޮތީ ވަރަށް ދަށްކޮށް ކަމަށާއި މީގެ ތިން ދުވަހެއް ކުރިން ކަރަންޓުގެ ހިދުމަތް މެދުކެނޑުމަށްފަހު މުޅި ރަށަށް ކަރަންޓުގެ ހިދުމަތް ދޭން ފެށީ އިއްޔެ ހަވީރުން ފެށިގެން ކަމަށެވެ.

"މައްސަލަ އެއްކޮށް ހައްލެއް ނުވޭ. ކަރަންޓުގެ ހިދުމަތް ދޭން ފެށީ އިއްޔެ ހަވީރު. ފެނުގެ ހިދުމަތް އަދިވެސް ނުލިބޭ. މަހެއްހާ ދުވަސް ވެދާނެ ނުލިބޭތާ،" ހަސަން ރަމީޒު ވިދާޅުވި އެވެ.

މާމެންދޫ ފެނަކައިގައި މަސައްކަތް ކުރާ އޮފިޝަލަކު ބުނީ ކަރަންޓުގެ މައްސަލައަށް މިވަގުތު ގެނެސްފައި ވަނީ ވަގުތީ ހައްލެއް ކަމަށާއި ލޯޑު ބޮޑުވުމުގެ ސަބަބުން އެކަށީގެންވާ މިންވަރަށް ކަރަންޓުގެ ނުއުފެއްދޭ ކަމަށެވެ.

އެގޮތުން އެންމެ ޖެނަރޭޓަރަކަށް ވެސް މައްސަލައެއް ދިމާވެއްޖެ ހާލަތެއްގައި މުޅި ރަށުން ކަރަންޓުގެ ހިދުމަތް ދާނެ ކަމަށާއި ފެނުގެ ހިދުމަތް މެދުކެނޑިފައި ހުރީ ވެސް އޭގެ ސަބަބުން ކަމަށް އޭނާ ބުންޏެވެ.

"ފެނުގެ ހިދުމަތް މެދުކެނޑިފައި އެއިނީ މިވަގުތު މިތަނުގައި ހުރި ޖަންކްޝަންތަކުގައި ހުރިހާ އެއްޗެއްގެ ބޭނުން ކޮށްފައި ރަށަށް ދެވޭ ވަރަށް ކަރަންޓުގެ ހިދުމަތް ދެވޭ ވަރަށް ބާރު ނެތީމަ،" މައުލޫމާތު އެނގޭ އޮފިޝަލް ބުންޏެވެ.

މާމެންދޫގައި މިހާރު ބޭނުން ކުރަމުން އަންނަނީ 400 ކިލޯ ވޮޓުގެ ދެ ޖެނެރޭޓަރާއި 260 ކިލޯ ވޮޓުގެ ޖެނެރޭޓަރެކެވެ.

އޭނާ އިތުރަށް ބުނީ މާމެންދޫގައި ފެން ޕްލާންޓަކާއި، އައިސް ޕްލާންޓަކާއި، ބައިވަރު އެކި މެޝިންތައް ހުރުމުން އެ ތަކެއްޗަށް ފުރިހަމައަށް ކަރަންޓު ދިނުމަށް މަދުވެގެން 800 މެގަވޮޓްގެ ޖެނަރޭޓަރެއް ބޭނުންވާ ކަމަށެވެ.

ޖެނަރޭޓަރު ނުލިބި ލަސްވަނީ ސްޓޮކް ނެތިގެންކަން ފާހަގަކޮށް އޮފިޝަލް ބުނީ ވީހާވެސް އަވަހަށް ޖެނަރޭޓަރެއް ފޯރުކޮށްދިނުމަށް އެދިފައިވާނެ ކަމަށެވެ. އެގޮތުން އެކަމަށް ފެނަކައިގެ ހެޑް އޮފީހުން މަސައްކަތްތަކެއް ކުރަމުންދާ ކަމަށް އޭނާ ބުންޏެވެ.