އެމްއެމްއޭއިން އަލަށް އެކުލަވާލައި އާންމުންގެ ހިޔާލު ހޯދަން ހުޅުވާލާފައިވާ ބޭރު ފައިސާއާ ބެހޭ ބިލަކީ ޑޮލަރުގެ ދަތިކަމަށް އޮތް ހައްލުގެ ގޮތުގައި ރައީސް ޑރ. މުހައްމަދު މުއިއްޒު ސިފަކުރައްވައިފި އެވެ.

އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ މި ބިލުގެ ނަތީޖާއަކަށް ވެގެންދާނީ އާންމު ރައްޔިތުންނަށާއި ވިޔަފާރިވެރިންނަށް ޑޮލަރުގެ ތިޔާގިކަން ލިބިގެން ދިޔުން ކަމަށެވެ.

"މި ފަހި ބަދަލުތަކުގެ ނަތީޖާއަކަށް ވެގެންދާނީ އާންމު ރައްޔިތުންނަށާއި ކުދި އަދި މެދުފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެން ދިޔުން،" ރައީސް ވިދާޅުވި އެވެ.

އެމަނިކުފާނުގެ ޕޯސްޓުފައި ވަނީ ބިލު ގާނޫނަކަށްވެ އަމަލު ކުރަން ފެށުމުން ބަދަލު ގެންނަވާނެ ހަތަރު ކަމެއްގެ ޓައިމްލައިން ދެއްވައިފަ އެވެ.

ގެންނާނެކަމަށް އިއުލާނު ކުރެއްވި ބަދަލުތައް

• ސަރުކާރު ކުންފުނިތަކުން ޕެރެލަލް މާކެޓަށް ނުގޮސް ރަސްމީ ރޭޓުގައި ޑޮލަރު ލިބޭނެ އިންތިޒާމު ގާއިމު ކުރުން - ޖުލައި 1، 2025
• ދިވެހި ވިޔަފާރިވެރިންނަށް ތަކެތި އިމްޕޯޓު ކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރު ކުރުން - ޖުލައި 1، 2025
• ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ލިބޭ 500 ޑޮލަރު ދެގުނަކޮށް އެ އަދަދު 1000 އަށް އިތުރު ކުރުން - މާޗު 31، 2026
• ކްރެޑިޓް ކާޑު ލިމިޓުތައް ބޮޑުކުރުން - މާޗު 31، 2026

އާންމުންގެ ހިޔާލު ހޯދުމަށް ރޭ އެމްއެމްއޭއިން ހުޅުވާލި ބިލުގެ ޑްރާފްޓުގައި ރަށްރަށުގައި ހިންގާ ހޮޓާތަކާއި ސަފާރީތައް ވަނީ 500 ޑޮލަރު މާރުކުރަން ޖެހޭ އޭ ކެޓަގަރީގެ ތަންތަނުން، 25 ޑޮލަރު މާރުކުރަން ޖެހޭ ބީ ކެޓަގަރީއަށް ބަދަލުކޮށްފަ އެވެ.

ޑްރާފްޓު ބިލުގައި ޑޮލަރު މާރުކުރުމުގައި ރިސޯޓުތަކަށް ވެސް ލުއިތަކެއް ދޭން ހިމަނާފައި ވެ އެވެ. އެއީ ރިސޯޓުގައި 24 ގަޑިއިރު ހޭދަނުކުރާ ޓޫރިސްޓުންނާއި ދެ އަހަރުން ދަށުގެ ކުޑަކުދިންނާއި އަދި ހިލޭ ނުވަތަ ކޮމްޕްލިމެންޓަރީ ޕެކޭޖުގައި އަންނަ ޓޫރިސްޓުންނަށް ޑޮލަރު މާރުކުރަން ނުޖެހޭ ގޮތަށެވެ. އެ ނޫން ކޮންމެ ޓޫރިސްޓަކަށް 500 ޑޮލަރު މާރުކުރަން ބިލުގެ ޑްރާފްޓުގައި ވެސް ވަނީ ހިމަނައިފަ އެވެ.

ރައީސް މިއަދު ކުރެއްވި ޕޯސްޓުގައި ވިދާޅުވެފައި ވަނީ 500 ޑޮލަރު މާރު ކުރަންޖެހޭ ގޮތަށް ބޭރު ފައިސާއާ ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށެވެ. އަދި އެކަމަށްޓަކައި އެމްއެމްއޭއަށް ރައީސް ވަނީ ޝުކުރު އަދާ ކުރައްވައިފަ އެވެ.