އަންނަ އަހަރަށް ލަފާކޮށް މަޖިލީހަށް މިހާރު ހުށަހަޅާފައިވާ ބަޖެޓުގައި ރާއްޖޭގެ ރަށްރަށުގައި ހިންގާ ޕްރޮޖެކްޓުތަކަށް ހަރަދު ކުރަން ކަނޑައަޅާފައިވާ ފައިސާ ހަރަދު ކުރާނެ ގޮތުގެ ތަރުތީބެއް އަދި ނޭނގޭ ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެ އެވެ.

އަންނަ އަހަރު ސަރުކާރުން ހިންގަން ނިންމާފައިވާ މަޝްރޫއުތަކާއި މިހާރު ހުއްޓިފައި ހުރި މަޝްރޫއުތައް އަންނަ އަހަރު ފެށޭނެ ތާރީހާ ގުޅޭ ގޮތުން އެކި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މުއްތަލިބު ވިދާޅުވީ އަންނަ އަހަރަށް ލަފާކުރާ ބަޖެޓުގައި މަޝްރޫއުތައް ހިންގަން ހިމަނާފައިވާ ފައިސާ ހަރަދު ކުރާނެ ތަރުތީބެއް އޭނާއަށް އަދި ނޭނގޭ ކަމަށެވެ.

"އަޅުގަނޑަށް މިވަގުތު ބަޖެޓުގެ ޕްރޮޖެކްޓުތައް ހިންގަން ކަނޑައަޅާފައި އޮތް ތަރުތީބެއް ދަންނަވާކަށް ނޭނގޭ. އެއީ މި ދެންނެވި ގޮތަށް ނީޑް ބޭސިސް އާއި އެ ކަން ކުރަންޖެހޭ ތަރުތީބަށް ބަލާފައި ކުރިއަށް ގެންދާނީ، ދެން އޭގެ ތަފުސީލު އަޅުގަނޑަށް ގަބޫލު ކުރެވެނީ ވީހައިވެސް އަވަހަކަށް މަޖިލީހަށް ސަބްމިޓް ކުރާނެ ކަމަށް ސަރުކާރުން އެކަން ކަނޑައަޅައި ފައިނަލް ކޮށްފައި،" މުއްތަލިބު ވިދާޅުވި އެވެ.

އޭނާ ވިދާޅުވީ އަންނަ އަހަރު އަލަށް ފަށާ މަޝްރޫއުތައް ވެސް އަދި މިހާރު ހުއްޓިފައި ހުރި މަޝްރޫއުތައް ވެސް ކުރިއަށް ގެންދާނީ އެންމެ އިސްކަން ދޭ ތަރުތީބެއްގެ ތެރެއިން ކަމަށެވެ. އެގޮތުން ތަރުތީބެއް ކަނޑައެޅުމުގައި ބަލާނީ އެންމެ ގިނަ ރައްޔިތުންނަށް ފައިދާ ލިބޭނެ މަޝްރޫއުތަކަށް ކަމަށް މުއްތަލިބު ވިދާޅުވި އެވެ،

"ސޮއިކޮށްފައި ހުރި މަޝްރޫއުތައް ގިނަކަމުން އަޅުގަނޑުމެން ތަރުތީބެއްގެ ތެރެއިން ވީހައިވެސް ގިނަ ރައްޔިތުންނަށް އޭގެ މަންފާ އުސޫލުން ޕްރޮޖެކްޓުތައް ކުރިއަށް ގެންދާނީ، އެހެންވީމާ އެ އުސޫލުން އަޅުގަނޑުމެންނަށް އޮންނަ ޕްރައޮރިޓީ ލިސްޓެއްގެ ތެރެއިން މަޝްރޫއުތައް ކުރިއަށް ގެންދާނެ ވާހަކަ ދަންނަވައިލަން،" މުއްތަލިބު ވިދާޅުވި އެވެ.

މުއްތަލިބު އެހެން ވިދާޅުވިއިރު، ރަށްރަށުގައި ހިންގަން ނިންމާފައިވާ މަޝްރޫއުތަކުގެ ތަފުސީލު އަންނަ އަހަރަށް ލަފާކޮށް މަޖިލީހަށް ހުށަހަޅާފައިވާ ބަޖެޓުގައި ހިމަނާފައި ނުވާތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އެކަމާ ކަންބޮޑުވުން ފާޅު ކުރާ ގިނަ މީހުން ބުނަނީ އެގޮތަށް ކަން ކުރުމަކީ ކޮރަޕްޝަނަށް މަގުފަހިވާ ކަމެއް ކަމަށެވެ.

އެ ކަންބޮޑުވުންތަކާ ގުޅިގެން ބަޖެޓު ދިރާސާ ކުރި ކޮމިޓީން ވަނީ ސަރުކާރުން ހިންގާ ޕަބްލިކް ސެކްޓާ އިންފްރާސްޓްރަކްޗާ ޕްރޮގްރާމު (ޕީއެސްއައިޕީ) ގައި ހިމެނޭ މަޝްރޫއުތަކުގެ ތެރެއިން އަންނަ އަހަރުގެ ތެރޭގައި އަމަލީ މަސައްކަތް ފަށާ މަޝްރޫއުތަކުގެ ލިސްޓެއް އެ އަހަރުގެ ފެބްރުއަރީ މަސް ނިމުމުގެ ކުރިން ރައްޔިތުންގެ މަޖިލީހަށް ހުށަހަޅަން ނިންމައިފަ އެވެ.

އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގެ ރިކޮމެންޑޭޝަނެއްގެ ގޮތުގައި މަޖިލީހުގެ ނައިބު ރައީސް، އަހުމަދު ނާޒިމް ހުށަހެޅުއްވި ހުށަހެޅުއްވުމުގައި އޮތީ ޕީއެސްއައިޕީ ޕައިޕްލައިންގައިވާ މަޝްރޫއުތައް ހަމައަށް އަގުކޮށް، ރޭޝަނަަލައިޒްކޮށް ތަރުތީބު ކުރުމަށް ފަހު ތިން ކަމެއް ކުރަން ސަރުކާރަށް އަންގާށެވެ.

އެއް ކަމަކީ އަންނަ އަހަރު އަލަށް ފަށާ މަޝްރޫއުތަކުގެ ލިސްޓެއް، ރަށްތައް އެނގޭނެހެން، މަޖިލީހާ ހިއްސާކުރުމެވެ. ދެވަނަ ކަމަކީ އެކިއެކި ކުންފުނިތަކާ ހަވާލުކޮށްގެން ހިންގާ މަޝްރޫއުތަކުގެ ތެރެއިން ކުރިއަށް ދާނެ މަޝްރޫއުތަކާއި ކުރިއަށް ނުދާނެ މަޝްރޫއުތަކުގެ ލިސްޓެއް މާޗު މަސް ނިމުމުގެ ކުރިން މަޖިލީހާ ހިއްްސާކުރުމެވެ.

ތިން ވަނަ ކަމަކީ ޕީއެސްއައިޕީގެ ތެރެއިން ކުރިއަށް ގެންދާ މަޝްރޫއުތަކުގެ ޕްރޮގްރެސް ރިޕޯޓެއް އަންނަ އަހަރުގެ ކޮންމެ ކުއާޓަރެއްގައި މަޖިލީހަށް ހުށަހެޅުމެވެ.