ދައުލަތުގެ ބަޖެޓުން ނުހިންގޭނެހައި ގިނަ މަޝްރޫއު ހިންގަން މިދިޔަ ސަރުކާރުން ސޮއިކޮށްފައި އެބަހުރި ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބި ވިދާޅުވެއްޖެ އެވެ.

މަޖިލީހުގެ މެންބަރަކު ކުރެއްވި ސުވާލަކަށް ޖަވާބު ދެއްވަމުން މުއްތަލިބު ވިދާޅުވީ މިދިޔަ ސަރުކާރުން ސޮއިކޮށްފައި ހުރި މަޝްރޫއުތަކުގެ ތެރެއިން ކޮންސްޓްރަކްޝަން މިނިސްޓަރީގައި ހުރި މަޝްރޫއުތަކުގެ އަގު އެކަނި ވެސް 39 ބިލިއަން ރުފިޔާއަށް އަރާ ކަމަށެވެ.

"ހަމައެކަނި ކޮންސްޓްރަކްޝަން މިނިސްޓަރީގައި އެބަހުރި 39 ބިލިއަން ރުފިޔާގެ މަޝްރޫއު ސޮއިކޮށްފައި. މިއީ ދައުލަތުގެ އެއްވެސް ބަޖެޓެއްގެ ތެރެއިން ކުރެވޭނެ އަދަދެއްގެ މަސައްކަތެއް ނޫން. 39 ބިލިއަން ރުފިޔާ އަޅުގަނޑުމެންނަށް އާމްދަނީގެ ގޮތުގައި ވެސް ނުލިބޭ އަހަރެއްގެ ތެރޭގައި، އެހެންވީމާ ކިހިނެއްތޯ އަޅުގަނޑުމެން 39 ބިލިއަން ރުފިޔާގެ މަޝްރޫއު ހިންގާނީ،" މުއްތަލިބު ވިދާޅުވި އެވެ.

"2023 ވަނަ އަހަރު ވަރަށް ގިނަ މަޝްރޫއުތަކެއް ސޮއިކޮށްފައި ފަށާފައި އެބަހުއްޓޭ، އެއީކީ ދައުލަތެއްގެ ބަޖެޓެއްގެ ތެރެއިން ހަރަދު ކުރެވޭނެ ވަރުގެ އަދަދެއް ނޫނޭ."

މުއްތަލިބު ވިދާޅުވީ މަޝްރޫއުތައް ކުރިއަށް ގެންދާއިރު ދިވެހި ދައުލަތަށް ލިބޭ އާމްދާނީ އާއި ލޯނުތަކުން ލިބޭ ފައިސާއަށް ވެސް ބަލަންޖެހޭ ކަމަށެވެ.

މިދިޔަ ސަރުކާރުން ބަޖެޓު ފާސްކޮށްފައި އޮތީ ކޮންމެ މަޝްރޫއުއަކަށް ވެސް ކުޑަ އަދަދެއް ޖަހައިގެން ކަމަށް މި ސަރުކާރުން ބުނާ ވާހަކަ މުއްތަލިބު ވެސް ތަކުރާރު ކުރެއްވި އެވެ. ނަމަވެސް އަންނަ އަހަރަށް ލަފާކޮށް މަޖިލީހަށް މިހާރު ހުށަހަޅާފައި އޮތް ބަޖެޓުގައި އެކަންކަމަށް ވިސްނާފައިވާނެ ކަމަށް އޭނާ ވިދާޅުވި އެވެ.

"2025 ވަނަ އަހަރުގެ ބަޖެޓު އަޅުގަނޑުމެން ހަދާފައި އެއޮތީ މި ދެންނެވި ގޮތަށް އެންވެލޮޕެއްގެ ތެރެއިން މަޝްރޫއު ކުރިއަށް ގެންދެވޭ ގޮތަށް، އެހެންވީމާ އަޅުގަނޑުމެންނަށް ކުރިއަށް ގެންދަން ފުރުސަތު ލިބޭ ވަރަކަށް ހުރިހާ މަޝްރޫއުއެއް ވެސް ކުރިއަށް ގެންދާ ގޮތަށް،" މުއްތަލިބު ވިދާޅުވި އެވެ.

މި ސަރުކާރުން ކުރިއަށް ގެންދާނެ ކަމަށް ބުނި ވަރަށް ގިނަ ޕްރޮޖެކްޓު ނުހިނގާ ކަމަށް މީގެ ކުރިން މުއްތަލިބު ވަނީ އެއްބަސްވެވަޑައިގެންފަ އެވެ.

"ސުވާލަކީ ކީއްވެތޯ ޕްރޮޖެކްޓުތައް ނުހިނގަނީ؟ އާދެ، ވަރަށް ބައިވަރު ޕްރޮޖެކްޓުތައް އެބަ ހިނގާ. އެހެން ނަމަވެސް ވަރަށް ބައިވަރު ޕްރޮޖެކްޓުތައް ނުހިނގާ ތަން ވެސް ފެންނާނެ. އޭގެ ސާފު ޖަވާބަކީ، ސޮއިކޮށްފައި ހުރި މަޝްރޫއުތައް ކުރިއަށް ގެންދިޔުމަށް ބޭނުންވާ މި ދެންނެވި ގޮތަށް ބައިކުޅަބަޔަށް ބަޖެޓުގައި ހިމެނިފައި އޮތުން،" މުއްތަލިބު ވިދާޅުވި އެވެ.