ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރު އަންނަ ޑިސެމްބަރު 15 އާ ހަމައަށް ދިގު ދަންމައިލަން މިއަދު ފާސްކޮށްފި އެވެ.

މަޖިލީހުން ނިންމަންޖެހޭ މުހިންމު މަސައްކަތްތަކެއް ހުރުމުން ދައުރު ފާސްކުރުމަށް ހުުށަހެޅުއްވީ މަޖިލީހުގެ ރައީސް، އަބްދުއްރަހީމް އަބްދުﷲ އެވެ. ދައުރު ދަންމައިލަން މަޖިލީހަށް ހުށަހެޅުއްވީ މުހިންމު މަސައްކަތްތަކެއް ނުނިމި ހުރުމުން ކަމަށް އަބްދުއްރަހީމް ވިދާޅުވި އެވެ.

މަޖިލީހުގެ ތިންވަނަ ދައުރު ދަންމައިލަން ފާސްކުރީ 68 މެންބަރުންގެ ވޯޓުންނެވެ. އެގޮތަށް ފާސްކުރަން ނުފެންނަ ކަމަށް 11 މެންބަރުން ވޯޓު ދެއްވި އެވެ.

ގާނޫނުއަސާސީގެ 83 ވަނަ މާއްދާގައިވާ ގޮތުން މަޖިލީހުގެ ޖަލްސާތައް އަހަރެއްގެ ތެރޭގައި ބެހިގެންދާނީ ތިން ދައުރުގެ މައްޗަށެވެ. ދައުރުތަކުގެ ތަފުސީލުގެ ގޮތުގައި އޮންނަނީ މަޖިލީހުގެ ގަވާއިދުގައި ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ކޮންމެ އަހަރެއްގެ ވެސް ޖެނުއަރީން ފެށިގެން މޭ މަހުގެ 15 އާ ހަމައަށެވެ.

ދެވަނަ ދައުރު ހިނގާނީ ޖޫން މަހުން ފެށިގެން އޯގަސްޓު މަހުގެ 15 ވަނަ ދުވަހުގެ ނިޔަލަށް ކަމަށް އެ ގަވާއިދުގައި ބަޔާން ކޮށްފައި އޮންނައިރު، މަޖިލީހުގެ ތިންވަނަ ދައުރު ހިނގާނީ އޮކްޓޫބަރު މަހުން ފެށިގެން ނޮވެމްބަރު މަހުގެ ނިޔަލަށެވެ.

ނަމަވެސް މިއަދު މަޖިލީހުން ގެނައި ބަދަލާއެކު މި އަހަރުގެ ފަހު ދައުރު ނިމޭނީ ޑިސެމްބަރު 15 ގަ އެވެ.