ލ. މާމެންދޫގައި ކަރަންޓު ފޯރުކޮށްދޭ ދެ ޖަނަރޭޓަރު ހަލާކުވުމާ ގުޅިގެން އެ ރަށުން ކަރަންޓާއި ފެނުގެ ހިދުމަތް މެދުކެނޑިފައި އޮންނަތާ ދެ ދުވަސްވެއްޖެ އެވެ.

މާމެންދޫ ކައުންސިލުގެ ރައީސް ހަސަން ރަމީޒު "އަދަދު" ނޫހަށް ވިދާޅުވީ ކަރަންޓާއި ފެނުގެ ހިދުމަތް މެދުކެނޑުމުން އާންމުންނަށް ބޮޑެތި ދަތިތައް ދިމާވެ، ވިޔަފާރިތަކަށް ވެސް ގެއްލުންތައް ވަމުންދާ ކަމަށެވެ.

އެރަށުން ކަރަންޓާއި ފެނުގެ ހިދުމަތް މެދުކެނޑުނީ 400 ކިލޯވޮޓްގެ ދެ ޖެނެރޭޓަރު ހަލާކުވުމުގެ ސަބަބުންނެވެ. އެ ދެ ޖެނެރޭޓަރު ހެދުމުގެ މަސައްކަތް އެ ރަށަށް ކަރަންޓު ފޯރުކޮށްދޭ ފެނަކަ ކޯޕަރޭޝަނުން ދަނީ ކުރަމުންނެވެ.

"ރައްޔިތުން އުޅެމުން ދަނީ ވަރަށް ދަތިހާލުގައި. މައްސަލަ އަވަހަށް ހައްލުކޮށް ދިނުމަށް ސަރުކާރުގެ ކަމާބެހޭ އިދާރާތަކުގައި އަޅުގަނޑުމެން މިދަނީ ބުނަމުން. ދިމާވި މައްސަލަ ހައްލުކުރަން ފެނަކައިން ވެސް މަސައްކަތް އެބަ ކުރޭ،" ހަސަން ރަމީޒު ވިދާޅުވި އެވެ.

ނަމަވެސް މައްސަލަ ހައްލުކުރެވި، ކަރަންޓާއި ފެނުގެ ހިދުމަތް ދެވެން ފެށޭނެ ވަގުތެއް ނޭނގޭ ކަމަށް ރަމީޒު ވިދާޅުވި އެވެ.

މާމެންދޫގައި 400 ކިލޯ ވޮޓްގެ ދެ ޖެނެރޭޓަރާއި 260 ކިލޯ ވޮޓްގެ ޖެނެރޭޓަރެއް ހުރެ އެވެ. އޭގެ ތެރެއިން 400 ކިލޯ ވޮޓްގެ އެއް ޖެނެރޭޓަރު މީގެ ދުވަސްތަކެއް ކުރިން ހަލާކުވެ، 400 ކިލޯ ވޮޓްގެ ދެ ވަނަ ޖެނެރޭޓަރު ހަލާކުވީ ދެ ދުވަހެއް ކުރިންނެވެ.

މާމެންދޫގައި ދިރިއުޅޭ އާބާދީއަކީ 700 އެވެ. އެރަށުގެ ރަޖިސްޓްރީގައި ގާތްގަނޑަކަށް 1400 މީހުން ހިމެނެ އެވެ.