އަންނަ އަހަރު ކުރިއަށްދާ ބާލިން މެރެތަންގައި ބައިވެރިވުމުގެ ފުރުސަތު އެތުލެޓިކްސް އެސޯސިއޭޝަން އޮފް މޯލްޑިވްސް އިން ހުޅުވާލައިފި އެވެ.

މީގެ ކުރިން ވެސް ރާއްޖޭގެ ގިނަ އެތުލީޓުންތަކެއް ވަނީ ބާލިން މެރެތަންގައި ވާދަކޮށް ގައުމީ ރެކޯޑްތައް އާކޮށްފަ އެވެ.

މި ފަހަރުގެ ބާލިން މެރެތަންގައި ބައިވެރިވުމުގެ ފުރުސަތު އެތުލެޓިކްސް އެސޯސިއޭޝަން ހުޅުވާލައިފައިވަނީ ނޮވެމްބަރު 27-30 އަށެވެ. އަދި 1-2 ޑިސެމްބަރަށް ފޯމުތައް ޗެކުކޮށް ތަރުތީބުކުރުން ކުރިއަށްދާއިރު, 3-12 އަށް ކުރިއަށްދާނީ ފައިސާ ބަލައިގަތުމެވެ.

ދުނިޔޭގެ ގިނަ ގައުމުތަކުން ގިނަ ބަޔަކު ބައިވެރިވާ، ބާލިން މެރަތަން އޮތީ އަންނަ އަހަރުގެ ސެޕްޓެމްބަރު މަހު އެވެ.

އެތުލެޓިކްސް އެސޯސިއޭޝަން އިން އަންނަނީ ރާއްޖޭގެ އެތުލީޓުން ބޭރު ގައުމުތަކުގެ މެރަތަންގައި ބައިވެރިވުމަށް ފޯރުކޮށްދޭން ޖެހޭ އެހީތެރިކަން ދެމުންނެވެ. އެގޮތުން، ފާއިތުވި އަހަރުތަކަށް ބަލާއިރު، ރާއްޖޭގެ އެކި އުމުރުފުރާގެ އެތުލީޓުން ވަނީ އެތުލެޓިކްސް އެސޯސިއޭޝަންގެ އެހީތެރިކަމާ އެކު، ދުނިޔޭގެ މަޝްހޫރު މެރަތަންތަކުގައި ބައިވެރިވެފަ އެވެ.

ދިގު ދުވުންތަކަކީ، މި ވަގުުތު ރާއްޖޭގައި ގިނަ ބަޔެއްގެ ޝައުގުވެރިކަން އޮތް ކަމަކަށްވާއިރު، މި ކަމަށް އަމާޒުކޮށްގެން ރާއްޖޭގައި ވެސް ގިނަ އިވެންޓްތަކެއް ކުރިއަށް ދެ އެވެ.