ގަވާއިދާ ހިލާފަށް ރާއްޖޭގެ ސަރަހައްދަށް ވަދެ އުޅުނު ބޭރުގެ މަސްބޯޓެއް ސިފައިން އަތުލައިގެންފި އެވެ.

އެކްސްގައި އެމްއެންޑީއެފުން ކުރި ޕޯސްޓެއްގައި ބުނީ އެ ބޯޓު އަތުލައިގަތީ ކޯސްޓު ގާޑުގެ ސިފައިން ކަމަށެވެ. ބޯޓު އަތުލައިގަތީ ރާއްޖޭގެ ސަރަހައްދުގައި ގަވާއިދާ ހިލާފު ކަންތައްތަކެއް ކުރަމުންދާ ކަމަށް ތުހުމަތު ކުރެވުމުން ކަމަށް އެމްއެންޑީއެފުން ބުންޏެވެ.

އެ ބޯޓުގައި ތިބީ ކިތައް ފަޅުވެރިން ކަމެއް ނުވަތަ އެއީ ކޮން ގައުމަކަށް ނިސްބަތްވާ ބޯޓެއް ކަމެއް ސިފައިން ނުބުނެ އެވެ. އަދި ބޯޓާ ގުޅޭ އިތުރު ތަފުސީލެއް ވެސް އަދި ހާމައެއް ނުކުރެ އެވެ.

ގަވާއިދާ ހިލާފަށް ރާއްޖެއަށް އެތެރެވެ އުޅުނު މަސް ބޯޓެއް ކޯސްޓު ގާޑުން މިއަދު އަތުލައިގެންއިރު، މި މަހު 16 ގައި ވެސް ގަވާއިދާ ހިލާފަށް ރާއްޖެއަށް ވަދެ އުޅުނު މަސް ބޯޓެއް ސިފައިން އަތުލައިގަތެވެ. އެދުވަހު އެބޯޓު އަތުލައިގަތީ ޑްރޯންގެ އެހީގަ އެވެ.