މާލެ އާއި ވިލިމާލޭގެ ހުރިހާ މަގުތަކެއް ތަރައްގީ ކުރަން ސަރުކާރުން ހިންގަން ނިންމާފައިވާ މަޝްރޫއުއަށް ބޭނުންވާ ފީސިބިލިޓީ ޓެސްޓާއި ހަދަން ފެށި ދިރާސާގެ މަސައްކަތް އެއްކޮށް ނިންމާލައިފި އެވެ.

އިންފްރާސްޓްރަކްޗާ މިނިސްޓަރީން އެކްސްގައި ކުރި ޕޯސްޓެއްގައި ބުނީ ކަމާ ގުޅުންހުރި ފަރާތްތަކާ އެކު މަޝްވަރާކޮށް ރާއްޖޭގެ މަގުތަކުގެ ހާލަތު ދެނެގަތުމުގެ މަސައްކަތް މިދިޔަ ބުރާސްފަތި ދުވަހުގެ ނިޔަލަށް ނިންމާލާފައިވާ ކަމަށެވެ. އަދި މަގުތައް ތަރައްގީކުރުމަށް ބޭނުންވާ ފީސިބިލިޓީ ޓެސްޓު ވެސް ބުރާސްފަތި ދުވަހުގެ ނިޔަލަށް ނިމިފައިވާ ކަމަށް އެ މިނިސްޓަރީން ބުންޏެވެ.

ދެން ކުރިއަށް އޮންނާނީ މަގުތައް ތަރައްގީ ކުރުމަށް ބޭނުންވާ ޑިޒައިން ތައްޔާރު ކުރުމުގެ މަސައްކަތް ކަމަށް ވެސް އެ މިނިސްޓަރީން ބުންޏެވެ.

މާލެ އާއި ވިލިމާލޭގެ މަގުތައް ހެދުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.

މާލޭގެ މަގުތަކުގައި ފެންބޮޑުވުމާއި ތަރައްގީނުކޮށް ގިނަދުވަސްވުމުގެ ސަބަބުން ރައްޔިތުންނަށް ގިނަ ދަތިތަކެއް ތަކުރާރުކޮށް ދަނީ ކުރިމަތިވަމުންނެވެ. މި މައްސަލަތައް ހައްލުކުރަން ހިންގާ މަޝްރޫއުގެ އަގު 100 އެތައް މިލިއަން ޑޮލަރަކަށް އަރާނެ ކަމަށް މިނިސްޓަރު މުއްތަލިބު މި އަހަރު ޖެނުއަރީ މަހު ވިދާޅުވި އެވެ.

އޭގެ ފަހުން، މަޖިލިސް އިންތިހާބުގެ ކެމްޕޭނު ތެރޭގައި ރައީސް މުއިއްޒު ވަނީ އެ މަޝްރޫއު ޗައިނާއިން ހިލޭ ކުރިއަށް ގެންދަން ހަމަޖެހިފައިވާ ކަމަށް ވިދާޅުވެފަ އެވެ.