މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން ހުށަހަޅާފައިވާ މައްސަލައަކާ ގުޅިގެން އިންފޮމޭޝަން ކޮމިޝަނަރުގެ އޮފީހުން ބާއްވަން ތާވަލު ކުރި އަޑުއެހުމަކަށް އެ އޮފީހުން ހާޒިރުނުވެވުނީ މުވައްޒަފެއްގެ އިހުމާލުން ކަމަށް ހައުސިން މިނިސްޓްރީން މިއަދު ބުނެފި އެވެ.

އޮންލައިންކޮށް ބާއްވަން މަސައްކަތް ކުރި އެ އަޑުއެހުމަށް ހާޒިރުނުވެގެން ހައުސިން މިނިސްޓްރީ ވަނީ 350ރ. އިން ޖޫރިމަނާކޮށްފަ އެވެ. އެ ކޮމިޝަނުން އަޑުއެހުމެއް ބާއްވަންޖެހެނީ ހޯދަން ހުށަހެޅި މައުލޫމާތަކީ ދޭންޖެހޭ މައުލޫމާތެއް ނޫން ކަމަށް ފެންނަ ހާލަތްތަކުގަ އެވެ.

"މި މިނިސްޓްރީ ޖޫރިމަނާ ކުރި ކުރުމަކީ މި މިނިސްޓްރީގެ މުވައްޒަފެއްގެ އިހުމާލުން ހިނގާފައިވާ ކަމެއްކަމާއި އެހެންކަމުން އެ މުވައްޒަފާ ދޭތެރޭގައި ސިވިލް ސާވިސް ގަވާއިދުގައިވާ ގޮތުގެ މަތިން ފިޔަވަޅު އެޅުމުގެ ކަންކަން ކުރިއަށް ގެންދެވިފައިވާ ވާހަކަ ދަންނަވަން،" ހައުސިން މިނިސްޓްރީން މިއަދު ނެރުނު ބަޔާނެއްގައި ބުނެފައިވެ އެވެ.

ހައުސިން މިނިސްޓްރީ ޖޫރިމަނާކޮށްފައިވާކަން އިންފޮމޭޝަން ކޮމިޝަނަރުގެ އޮފީހުން ބުނީ ބުރާސްފަތި ދުވަހެވެ. އެ އޮފީހުން ބުނީ ޖޫރިމަނާ ކުރަންޖެހުނީ އެއްވެސް އެއްޗެއް އެންގުމަކައި ނުލައި އަޑުއެހުމަށް ހާޒިރުނުވުމުން ކަމަށެވެ.

"އިންފޮމޭޝަން ކޮމިޝަނަރުގެ އޮފީހުން ބަލަމުންދިޔަ މައްސަލައަކާ ގުޅިގެން އާންމުކޮށް ހުޅުވައިލެވިގެން ބޭއްވުމަށް ތާވަލުކުރެވުނު ބައްދަލުވުމަށް ހާޒިރުވެފައި ނުވާތީ، މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް ވަނީ -/350 ރުފިޔާއިން ޖޫރިމަނާކުރެވިފައި،" އައިކޮމްގެ އިން ބުނެފައިވެ އެވެ.

ހައުސިން މިނިސްޓްރީ ޖޫރިމަނާ ކުރީ މި ސަރުކާރަކީ ހާމަކަންބޮޑުކޮށް ހުރިހާ މައުލޫމާތެއް ރައްޔިތުންނަށް ފޯރުކޮށްދީގެން ހިންގާ ސަރުކާރެއް ކަމަށް ވެރިކަން ކުރާ ޕީއެންސީން ބުނިތާ ހަފުތާއެއް ވެސް ނުވަނީހެނެވެ.

މިދިޔަ އަންގާރަ ދުވަހު ޕީއެންސީން ނެރުނު ބަޔާނެއްގައި ބުނީ މައުލޫމާތު ހޯދުމުގެ ހައްގުގެ ގާނޫނުގެ ދަށުން ހޯދަން ހުށަހަޅާ މައުލޫމާތުތައް ސަރުކާރުން ފޯރުކޮށްދެމުންދާ ކަމަށެވެ.

"ސަރުކާރުގެ ވުޒާރާތަކާއި ދައުލަތުގެ ކުންފުނިތަކުން ވެސް އަންނަނީ އާރްޓީއައިތަކަށް ޖަވާބުދެމުން. ފާއިތުވި ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބެއް ނުދޭ. ދައުލަތުގެ ކުންފުނިތަކުން އާރްޓީއައިއަށް ޖަވާބުދޭން ޖެހޭ ކަމަށް ދިވެހިރާއްޖޭގެ ކޯޓަކުން ކަނޑައެޅުމުން ވެސް ޖަވާބުނުދީ ހިފަހައްޓާފައި އޮތް. އެ ސިޔާސަތު ނިމުމަކަށް ގެންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު،" އެ ބަޔާނުގައި ބުންޏެވެ.

ޕީއެންސީން އެހެން ބުނި ނަމަވެސް، އާރްޓީއައިތަކަށް އެކަށީގެންވާ އިޖާބައެއް ސަރުކާރުން ނުދޭތީ އެކަމާ އިންފޮމޭޝަން ކޮމިޝަނަރުގެ އޮފީހުން ވަނީ މީގެ ކުރިން ވެސް ކަންބޮޑުވުން ފާޅުކޮށްފަ އެވެ.