ސަރުކާރުން ހިންގާ ޕަބްލިކް ސެކްޓާ އިންފްރާސްޓްރަކްޗާ ޕްރޮގްރާމު (ޕީއެސްއައިޕީ) ގައި ހިމެނޭ މަޝްރޫއުތަކުގެ ތެރެއިން އަންނަ އަހަރުގެ ތެރޭގައި އަމަލީ މަސައްކަތް ފަށާ މަޝްރޫއުތަކުގެ ލިސްޓެއް އެ އަހަރުގެ ފެބްރުއަރީ މަސް ނިމުމުގެ ކުރިން ރައްޔިތުންގެ މަޖިލީހަށް ހުށަހަޅަން ސަރުކާރަށް އަންގަން ބަޖެޓު ދިރާސާ ކުރާ ކޮމިޓީން އިއްޔެ ނިންމައިފި އެވެ.

ބަޖެޓު ދިރާސާ ކުރާ ކޮމިޓީން މި ގޮތަށް ހުށަހަޅަން ފާސްކުރީ އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގެ ރެކޮމެންޑޭޝަނެއްގެ ގޮތުގަ އެވެ. މި ރެކޮމެންޑޭޝަން ހުށަހެޅުއްވީ ދިއްގަރު ދާއިރާގެ މެންބަރު އަދި މަޖިލީހުގެ ނައިބު ރައީސް އަހުމަދު ނާޒިމެވެ.

ނާޒިމްގެ ހުށަހެޅުއްވުމުގައި އޮތީ ޕީއެސްއައިޕީ ޕައިޕްލައިންގައިވާ މަޝްރޫއުތައް ހަމައަށް އަގުކޮށް، ރޭޝަނަަލައިޒްކޮށް ތަރުތީބު ކުރުމަށް ފަހު ތިން ކަމެއް ކުރަން ސަރުކާރަށް އަންގާށެވެ.

އެއް ކަމަކީ އަންނަ އަހަރު އަލަށް ފަށާ މަޝްރޫއުތަކުގެ ލިސްޓެއް، ރަށްތައް އެނގޭނެހެން، މަޖިލީހާ ހިއްސާކުރުމެވެ. ދެވަނަ ކަމަކީ އެކިއެކި ކުންފުނިތަކާ ހަވާލުކޮށްގެން ހިންގާ މަޝްރޫއުތަކުގެ ތެރެއިން ކުރިއަށް ދާނެ މަޝްރޫއުތަކާއި ކުރިއަށް ނުދާނެ މަޝްރޫއުތަކުގެ ލިސްޓެއް މާޗު މަސް ނިމުމުގެ ކުރިން މަޖިލީހާ ހިއްްސާކުރުމެވެ. ތިން ވަނަ ކަމަކީ ޕީއެސްއައިޕީގެ ތެރެއިން ކުރިއަށް ގެންދާ މަޝްރޫއުތަކުގެ ޕްރޮގްރެސް ރިޕޯޓެއް އަންނަ އަހަރުގެ ކޮންމެ ކުއާޓަރެއްގައި މަޖިލީހަށް ހުށަހެޅުމެވެ.

"މިއީ ބަޖެޓުގައި ހިމެނިފައި ނެތް ކަމަށް، މަޝްރޫއުތައް ނެތީމައި، އަޅުގަނޑުމެންނަށް އަންނަ އަހަރު ފެށޭ ތަނުން މަޖިލިސްއަށް ގެންނަން ބޭނުންވެގެން ހުށަހަޅާ ހުށަހެޅުމެއް. އެއިރަށް ކަން އޮތް ގޮތް އަޅުގަނޑުމެންނަށް ސާފު ވާނެ," މި ރެކޮމެންޑޭޝަންތައް ހުށަހެޅުއްވި ސަބަބު ސާފުކޮށްދެއްވަމުން ނާޒިމް ކޮމިޓީގައި ވިދާޅުވި އެވެ.

ނާޒިމްގެ މި ހުށަހެޅުއްވުން ހިމެނޭހެން ބަޖެޓަށް ހުށަހެޅުއްވި ނުވަ ރެކޮމެންޑޭޝަން ފާސްކުރީ ބަޖެޓު ދިރާސާކުރާ ކޮމިޓީ ބައްދަލުވުމުގައި ބައިވެރިވި 18 މެންބަރުންގެ އިއްތިފާގުންނެވެ.

މަޝްރޫއުތަކުގެ ތަފުސީލުތައް އަންނަ އަހަަރުގެ ތެރޭގައި މަޖިލީހާ ހިއްސާކުރުމަށް ސަރުކާރަށް ޝަަރުތުކުރަން ކޮމިޓީން ނިންމިއިރު، މި އަހަރަށް ހުށަހެޅިފައިވާ ބަޖެޓުގައި މި ތަފުސީލުތައް ނެތުމަކީ ބަޖެޓާ މެދު އޮތް އެންމެ ބޮޑު އެއް ކަންބޮޑުވުމެވެ. މިކަމާ ގުޅިގެން އިދިކޮޅު އެމްޑީޕީގެ މަޖިލިސް މެންބަރުންނާއި އާންމުން ވެސް ކަންބޮޑުވުން ފާޅުކޮށްފައި ވެ އެވެ.

އަންނަ އަހަރަށް ލަފާކޮށް ހުށަހަޅާފައިވާ ބަޖެޓުގައި ޕީއެސްއައިޕީ ހިންގަން އޮތީ 12.3 ބިލިއަން ރުފިޔާގެ ބަޖެޓެކެވެ. މި ހަރަދުގެ ބޮޑު ބަޔެއް ކުރަނީ ލަފާ ފުރުމުގެ ދަތިކަން ހައްލުކުރުމުގެ ދާއިރާގެ ކަންކަމަށެވެ. އޭގެ ތެރޭގައި ހިމެނެނީ ބަނދަރުތަކާއި ވައިގެ ބަނދަރުތަކާއި ބްރިޖު އެޅުމުގެ އިތުރުން ދަތުރުފަތުރެވެ.