ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާ ގޯލްޑް ކަޕާ ދެމެދު އެއްވެސް މައްސަލަ އެއް ނެތް ކަމަށާއި، އެކަމަކު، އެ މުބާރާތާ ބައިވެރިވެވެން ނެތީ ގޯލްޑް ކަޕަކީ އެފްއޭއެމުން ބަލަން ޖެހޭ އުސޫލުތަކާ އެއްގޮތަށް ކުރިއަށްދާ މުބާރާތެއް ނުވާތީ ކަމަށް އެފްއޭއެމްގެ ނޯމަލައިޒޭޝަން ކޮމެޓީގެ ޗެއާމަން އަހުމަދު ޒުހޫރު ވިދާޅުވެއްޖެ އެވެ.

އެފްއޭއެމްގެ ނޯމަލައިޒިން ކޮމިޓީން ގޯލްޑް ކަޕާ ދެކޮޅު ކަމަށް ސޯޝަލް މީޑިއާގައި ދައުރުވާން ފެށީ، އެފްއޭއެމްގެ އިންޓާނަލް މެމޯއެއް ލީކުވުމާ ގުޅިގެންނެވެ. އެ މެމޯގައި އެފްއޭއެމްގެ ބައިވެރިވުމެއް ނެތް މުބާރާތްތަކުގައި އެފްއޭއެމްގެ ސްޓާފުންނާއި އެފްއޭއެމާ ގުޅުން ހުރި ފަަރާތްތައް ބައިވެރިނުވަން ވަނީ އަންގައިފަ އެވެ.

އެކަމަކު، ފަހުން އެ ކަންކަން މަޝްވަރާކޮށްގެން ހައްލަކާ ހަމައަށް ވަނީ އަތުވެފަ އެވެ.

އެފްއޭއެމްގެ ދަތުރެއްގައި ނޭޕާލްގައި ހުރެ އިއްޔެ، "އަދަދު ސްޕޯޓްސް" އަށް ދިން އިންޓަވިއުގައި ޒުހޫރު ވިދާޅުވީ، ގޯލްޑް ކަޕާއި އެފްއޭއެމާ މެދު މައްސަލަ އެއް ނެތް ކަމަށެވެ. އެކަމަކު، އެފްއޭއެމް އިން ބަލަން ޖެހޭ ބައިނަލްއަގުވާމީ މިންގަނޑުގެ ތެރެއިން ކުރިއަށްދާ މުބާރާތަކަށް ގޯލްޑް ކަޕް ނުވާތީ މި ކަމުގައި ރަސްމީ ހައިސިއްޔަތުން އެފްއޭއެމަށް ބައިވެރިވެވެން ނެތް ކަމަށް ޒުހޫރު ވިދާޅުވި އެވެ.

ތަކުރާރުކޮށް ޒުހޫރު ވިދާޅުވީ، މިއީ، އޭނާއާ ނޫނީ އެފްއޭއެމްއާ ބަޔަކާ އޮތް "ކްލޭޝް" އެއް ނޫން ކަމަށެވެ.

"ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަކީ ބޭރުގެ އެފިލިއޭޝަން އޮތްތަނެއް. އިންޓަނޭޝަނަލް އެފިލިއޭޝަނެއް އޮތްތަނަކުން އިންޓަނޭޝަނަލް އެފިލިއޭޝަނެއްގެ ތެރެއިން އެ މީހުންގެ ގަވާއިދުތަކާއި އުސޫލުތަކެއް އެބައޮވޭ، ދެން، ފީފާގެ ސްޓެޓިއުޓްސްތައް އެ މީހުންގެ ގަވާއިދުތަކާ އެއްގޮތަށް ލިޔެފައި އެބައޮތް. އެހެންވީމަ، އެފްއޭއެމް އިން ބައިވެރިވެވޭ ނޫނީ އެފިލިއޭޓްވެވޭ ކޮންމެ ކަމެއް ހިނގަން މި ޖެހެނީ ވަކި އުސޫލެއްގެ ތެެރެއިން. އެ އުސޫލުގެ ތެރެއަށް ނުފެތޭ ކަމަށް ވަންޏާމު އެފްއޭއެމް އަކަށް އެފިިލިއޭޓެއް ވެސް ނުވެވޭނެ ބައިވެރިއެއް ވެސް ނުވެވޭނެ. އޮފިޝަލް ހައިސިިއްޔަތަކުން އެއްވެސް ލެވަލެއްގައި ސަޕޯޓެއް ވެސް ދެވޭ ގޮތަކަށް ނޫން މި އޮންނަނީކީއެއް. އެއީ ކްލޭޝެއް ނޫން، އެއީ އެކަން ރާވާ ހިންގާ ބޭފުޅުން އެކަން އެނގިހުރެ، ނޫނީ އެކަން އިގްނޯ ކޮށްފައި ނަމަވެސް އެކަން ކުރިއަށް ގެންދިއުމަށް މެދުވެރިވީ،" ޒުހޫރު ވިދާޅުވި އެެވެ.

ކުރިން ސްޕޯޓްސް މިނިސްޓަރުކަން ވެސް ކުރައްވާފައިވާ ޒުހޫރު ވިދާޅުވީ ހަގީގަތަކީ އެފްއޭއެމްގެ އުސޫލުތަކާ ނުފެތޭތީ ގޯލްޑް ކަޕަށް އެފްއޭއެމް އިން ދެވޭނެ އެއްބާރުލުމެއް ނެތްކަން ކަމަށެވެ. އަދި، މުބާރާތެއް ބާއްވާނަމަ ބައިވެރިވާ ޓީމުތަކުން، ސްޕޯޓްސް ކޮމިޝަނުގައި ރަޖިސްޓަރީވެސް ވާން ޖެހޭނެ ކަމަށް ގަބޫލުކުރައްވާ ކަމަށާއި ހޯދި ހޯދުމުން ގޯލްޑް ކަޕްގައި ބައިވެރިވާ ޓީމުތަކުގެ މި ފަދަ ކަންކަން ވެސް ކަށަވަރުނުކުރާކަން އެނގިފައިވާ ކަމަށް ޒުހޫރު ވިދާޅުވި އެވެ.

ޒުހޫރު ވިދާޅުވީ, ގޯލްޑް ކަޕާ ހިލާފަށް ޔޫތު ކަޕަކީ އެފްއޭއެމްގެ ކަލަންޑަރުގައި ހިމެނޭ މުބާރާތެއް ކަމަށާއި, އެކަން މޯލްޑިވްސް ސޮކާ މޭޓްސް އިން ކޮށްދެއްވަނީ އެފްއޭއެމްގެ އުސޫލުތަކާ އެއްގޮތައް ކަމަށެވެ.

"އެއްވެސް ޕްރޮސީޖާ އަަކަށް އެ ނުފެތޭ. އެފްއޭއެމްގެ އުސޫލުތަކުގެ ތެރެއަށް ނުފެތޭ. ރާއްޖޭގައި އެފަދަ ކަމެއް ކުރާ ކަމަށްވަންޏާ އެކަން ކުރަން ޖެހޭ އުސޫލުތަކެއް އެބައޮވޭ. ސްޕޯޓްސް ކޮމިޝަނަރުގައި ވެސް ރަޖިސްޓްރޭޝަން އިންނަން ޖެހޭނެ، އެ އަންނަ ޓީމުތަކަކީ އެ ފަދަ ރަޖިސްޓްރޭޝަން ކަންކަން ފުރިހަމަ ވެގެން އަންނަ ޓީމުތަކެއް ނޫން ކަމަށް އަޅުގަނޑުމެން މައުލޫމާތު އޮޅުންފިލުވީމަ އެ ބޭފުޅުން ވެސް ބުނީ. އަދި އެ ބޭފުޅުން ރަޖިސްޓްރީ ނުކުރާ ކަމަށްވަންޏާ އެއްގޮތަަަކަށް ވެސް އޭގެ ތެރެއަށް އަޅުގަނޑުމެންނަށް ނުވަދެވޭނެތާ،" ޒުހޫރު ވިދާޅުވި އެވެ.

"ފީފާ/ އޭއެފްސީ ގަވާއިދުތަކުގެ ތެރެއަށް ނުފެތި، އެފްއޭއެމްގެ ސްޓެޓިއުޓްސް ތެރެއަށް ނުފެތި އަޅުގަނޑުމެންނަށް ދެވޭނެ އެއްވެސް އެއްބާރުލުމެއް ނޯންނާނެ،"

ފީފާ އާއި އޭއެފްސީ ބަލާ މިންގަނޑުގެ ތެރެއިން ކުރިއަށްދާ މުބާރާތްތަކުގައި ކުޅޭ ޓީމުތަކަކީ ކްލަބް ލައިސަންސިންގެ ބައެއް ފުރިހަމަކޮށްފައިވާ، އެ ފަަދަ ރަސްމީ ހުރިހާ ކަމެއް ފުރިހަމަވެ، އެފްއޭއެމް އަހުލުވެރިވާ ސިސްޓަމެއްގެ ތެރެއިން ކުރިއަށްދާ ޓީމުތަކަކަށް ވާން ޖެހެ އެވެ. އެކަމަކު، ގޯލްޑް ކަޕުގެ އެ ހުރިހާ ކަންކަން ކަށަވަރުނުކުރެވޭ ކަމަށް އެފްއޭއެމް އިން ހޯދި މައުލޫމާތުން އެނގިފައިވެ އެެވެ.

ރާއްޖޭގެ 17 ރަށެއް ނޫނީ ސިޓީ އަކަށް ނިސްބަތްވާ ޓީމުތައް ބައިވެރިވާ، ގޯލްޑް ކަޕް ރޭ ވަނީ ފަށައިފަ އެވެ. އަދި އަންނަ މަހުގެ 25އާ ހަމައަށް އެ މުބާރާތް ކުރިއަށްދާނެ އެވެ.

ޒުހޫރު ވިދާޅުވީ، އެންމެ ފުރަތަމަ ވެސް ގޯލްޑް ކަޕާ އެފްއޭއެމާ ދެމެދުގެ ހިޔާލުތަފާތުވުންތަކެއްގެ ވާހަކަ ދެކެވޭތީވެ، ގޯލްޑް ކަޕާ މެދު ގޮތެއް ނިންމަން އެފްއޭއެމް އިން 90 ޕްލަސްއާ ވާހަކަ ދެކެވުނު ކަމަށެވެ. އެ ގޮތުން އެފްއޭއެމްގެ ސްޓެޓިއުޓްސްގެ ތެރެއަށް ވަދެ އެ މުބާރާތް ކުރިއަށް ގެންދިޔުމަށް އިރުޝާދު ދެއްވި ކަމަށް ވެސް ޒުހޫރު ވިދާޅުވި އެވެ.

"ނައިންޓީ ޕްލަސް މި ބޭފުޅުން ކައިރީގައި ވެސް އަޅުގަނޑުމެން ދެންނެވިން އަޅުގަނޑުމެންނާ އެކު އިށީނދެގެން އަޅުގަނޑުމެންގެ މި ހުރި ސިސްޓަމްގެ ތެރެއަށް ވަދެވޭ ކަމަށްވަންޏާ ވަންނަން މަސައްކަތްކުރަމާ ހިނގާށޭ. އޭރުން މީގެ ޖެހޭނެ އެއްވެސް މައްސަލައެއް ނޯންނާނޭ. އެ ފުރުސަތު އެ ބޭފުޅުންނަށް ދެއްވިން، ވަރަށް ފަހުން ވެސް އެ ބޭފުޅުންނަށް ދެއްވިން އެ ފުރުސަތު، އެހެން ނަމަވެސް، އެ ބޭފުޅުންނަށް އެ ގަވާއިދުތައް ފޮލޯކުރެވޭނެ މަގެއް އެ ބޭފުޅުންނަށް ވެސް ނެތީމަ އެ ބޭފުޅުން އަޅުގަނޑުމެންނާ ނުގުޅި ކުރިއަށްދާން ނިންމީ. އެއީކީ ކްލޭޝެއް ނޫން،" ޒުހޫރު ވިދާޅުވި އެވެ.

ޒުހޫރު ވިދާޅުވީ, އެފްއޭއެމްގެ ބައިވަރު މުބާރާތްތައް ޒޯންތަކުގައި ވެސް އެބަހުރި ކަމަށެވެ. އެހެންވެ, ޒޯން މުބާރާތްތައް ބޭއްވުމުގެ ފުރުސަތު 90 ޕްލަސްގެ ފަރާތްތަކަށް ދެއްވި ކަމަށް ޒުހޫރު ވިދާޅުވި އެވެ.

"އަޅުގަނޑުމެން ދެންނެވިން ރާއްޖޭގެ ގިނަ ރަށްތަކުގެ ކްލަބްތައް މި އަންނަނީ، އެހެންވެ، އަޅުގަނޑުމެން ދެންނެވިން. އަޅުގަނޑުމެންގެ ޒޯން އިވެންޓްތައް ވެސް އެބައުޅޭ. އެހެންވީމަ، އެ ޒޯން އިވެންޓަށް ފެއްތޭ ކަހަލަ ގޮތަކަށް އެކަން ރާވާލެވޭނެ ކުރިއާލާ އެކަމާ އުޅުނުނަމަ އެ ގޮތަށް ރޭވިގެން ކުރިއަށްދިޔަނަމަ އެ ޒޯން އިވެންޓެއް ގޮތަށް އެފްއޭއެމްގެ ސްޓެޓިއުޓްސް ތެރެއަށް ފެތޭނެ ކަމަށާއި އެކަމަކު މުބާރާތުގެ އޮގަނައިޒަރު އެ ގޮތަށް ބޭނުންނުވާ ކަމަށްވާނަމަ ކުރެވޭނެ ކަމެއް ނޯންނާނެ ކަމަށް،" ޒުހޫރު ވިދާޅުވި އެވެ.

މޯލްޑިވްސް ސޮކަ މޭޓްސް (އެމްއެސްއެމް) އާއި އެފްއޭއެމް ގުޅިގެން ކުރިއަށް ގެންދާ ދިވެހި ޔޫތު ލީގަކީ އެފްއޭއެމްގެ ސްޓެޓިއުޓްސްގައި (ހިންގާ ގަވާއިދުގައި) ހިމަނާފައި އޮތް ކަމެއް ކަމަށް ޒުހޫރު ވިދާޅުވި އެވެ. އެ ގޮތުން، އެފްއޭއެމްގެ ސްޓެޓިއުޓްސްގައި 12 އަހަރާއި 14 އަހަރާއި 16 އަހަރުން ދަށުގެ ލީގެއް ކުރިއަށްގެންދަން އޮންނަ ކަމަށާއި އެހެންވެ، މި މުބާރާތުގައި އެފްއޭއެމްގެ ޝާމިލުވުން އޮންނަގޮތަށް އެއްބަސްވުމެއްގައި ސޮއިކުރީ މުބާރާތުގެ ހުރިހާ ކަންކަން އޮޅުންފިލުވުމަށް ފަހު ކަމަށް ޒުހޫރު ވިދާޅުވި އެވެ.