އިޒްރޭލު ޕާސްޕޯޓުގައި ރާއްޖެއަށް މީހުން އައުން މަނާ ކުރުމަށް، އެ ގައުމުގެ ޕާސްޕޯޓު މަނާ ކުރުން އަވަސް ކުރުމަށް ގޮވާލައި މަޖިލީހަށް ހުށަހެޅި ގަރާރު ބޭރުކޮށްލައިފި އެވެ.

އެ ގަރާރު މަޖިލީހަށް ބަލައިގަންނަން ފެންނަ ކަމަށް ވޯޓު ދެއްވީ އެންމެ 15 މެންބަރުންނެވެ. ގަރާރު ބޭރުކޮށްލަން މަޖިލީހުގެ 63 މެންބަރުން ވޯޓު ދެއްވި އެވެ.

އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުން ހުށަހަޅާފައިވާ ބިލު އަވަހަށް ފާސް ކުރުމަށް ބާރު އަޅައިދިނުމަށް ސަރުކާރަށް ގޮވާލައި ގަލޮޅު އުތުރު ދާއިރާގެ މަޖިލިސް މެންބަރު މުހައްމަދު އިބްރާހިމް ހުށަހެޅުއްވި ގަރާރާ ދެކޮޅުކަން އެ ގަރާރަށް ބަހުސް ކުރައްވަމުން ޕީއެންސީގެ ގިނަ މެންބަރުން ވިދާޅުވި އެވެ.

އެގޮތުން އިޒްރޭލު ޕާސްޕޯޓު މަނާކުރުން އަވަސް ކުރުމަށް ވަކާލާތު ކުރުމުގެ ބަދަލުގައި ޕީއެންސީގެ މެންބަރުން ވިދާޅުވަމުން ގެންދެވީ އިޒްރޭލުގެ ޕާސްޕޯޓު މަނާކޮށްފި ނަމަ ރާއްޖޭގެ ފަތުރުވެރިކަމަށް ގެއްލުން ވެދާނެ ކަމަށެވެ. އަދި ފަލަސްތީނުގެ ވަށައިގެން ތިބި ގައުމުތަކުން ނުކުރާ ކަމެއް ރާއްޖެއިން ކުރާއިރު ވިސްނަން ޖެހޭ ކަމަށް ވެސް އެ މެންބަރުން ވިދާޅުވި އެވެ.

"އަޅުގަނޑުމެންނަކީ ފަލަސްތީނުގެ ރައްޔިތުންނާ ދީނީ ގޮތުން އެއްބަނޑުއެއްބަފާ ބައެއް، އެހެން ނަމަވެސް ފަލަސްތީނުގެ ވަށައިގެން އެތިބަ އަރަބީންނަކީ އާއިލީ ގޮތުން ވެސް ދަރިފަސްކޮޅުގެ ގޮތުން ވެސް އަދި ދީނީ ގޮތުން ވެސް އެއްބަނޑުއެއްބަފާ ބައެއް، އެހެންކަމުން އަޅުގަނޑުމެންނަށް ވުރެ މާމުއްސަނދި، މާ ފުދުންތެރި އަދި ފަލަސްތީނު ރައްޔިތުންނާ އެހައި ގާތް ބަޔަކު ނާޅާ ފިޔަވަޅެއް އަޅުގަނޑުމެން އަޅާއިރު، އަޅުގަނޑުމެންގެ ރައްޔިތުންނާ ދޭތެރޭ ވެސް އަޅުގަނޑުމެން ވިސްނަންޖެހޭ،" ތިނަދޫ އުތުރު ދާއިރާގެ ޕީއެންސީ މެންބަރު ސައުދުﷲ ހިލްމީ ވިދާޅުވި އެވެ.

"އަޅުގަނޑުމެންގެ ގައުމުގެ ހާލަތު މިއޮތީ އެހެން އެއްވެސް ގައުމަކާ ޖެހިގަނެގެން އަދި އެހެން އެއްވެސް ރައްޔިތަކާ ޖެހިގަނެގެން އުޅެވޭ ފަދަ ހާލަތެއްގައެއް ނޫން، އަޅުގަނޑުމެންގެ ހާލަތީ ހުރިހާ ކަމަކަށް ވެސް ހުރިހާ ގޮތަކަށް ވެސް ބަލައިގެން ފިޔަވަޅު އަޅަންޖެހޭ ހާލަތެއް އިއްޒަތްތެރި ރައީސް،"

އޭގެ އިތުރުން އިޒްރޭލުގެ ޕާސްޕޯޓު މަނާކުރުމުގެ ވާހަކަދައްކާއިރު، އެ ގައުމުގައި މުސްލިމުން ވެސް އުޅޭ ކަމަށާއި އިޒްރޭލު ޕާސްޕޯޓު މަނާ ކުރުމުގެ ސަބަބުން އެމީހުންގެ ހައްގު ގެއްލިގެން ނުވާނެ ކަމަށް ވެސް ޕީއެންސީ މެންބަރުން ވިދާޅުވި އެވެ.

މިއަދުގެ ބަހުސްގައި ވާހަކަދައްކަވަމުން ބާރަށު ދާއިރާގެ މެންބަރު، އިބްރާހިމް ސުޖާއު ވިދާޅުވީ ރާއްޖެއަކީ ފަތުރުވެރިކަމަށް ބަރޯސާވެފައި އޮތް ގައުމެއް ކަމަށާއި ދުނިޔޭގެ އެއް ގައުމު އަނެއް ގައުމާ އޮތީ ގުޅިލާމެހިފައި ކަމަށެވެ. އަދި އިޒްރޭލާ މެދު ފިޔަވަޅެއް އަޅައިފި ނަމަ، އެ ގައުމާ ގުޅުންހުރި އެހެން ގައުމުތަކުން ރާއްޖެއާ މެދު ފިޔަވަޅެއް އަޅައިފާނެ ކަމަށް ވެސް ވިސްނަން ޖެހޭ ކަމަށް ސުޖާއު ވިދާޅުވި އެވެ.

އިޒްރޭލު ޕާސްޕޯޓުގައި ރާއްޖެއަށް މީހުން އެތެރެވުން މަނާ ކުރަން މިދިޔަ ޖޫން ގައި މަޖިލީހަށް ބިލެއް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް ނަސީމް އެވެ. އެ ބިލު ބަލައިގަނެ ކޮމިޓީއަށް ފޮނުވަން މަޖިލީހުން ނިންމީ ޖޫން 10 ގަ އެވެ.