އަންނަ އަހަރަށް ލަފާ ކުރާ ބަޖެޓުގެ ތަފުސީލުތަކާއި ބައެއް މާލީ ހިސާބުތައް ސިއްރު ކުރި ނަމަވެސް ޕީޕަލްސް ނެޝަނަލް ކޮންގްރެސް (ޕީއެންސީ) ސަރުކާރަކީ ހާމަކަންބޮޑު، ހަރަދު ކުޑަ ސަރުކާރެއް ކަމަށް ޕީއެންސީން ބުނެފި އެވެ.

ޕީއެންސީން ނެރުނު ނޫސް ބަޔާނެއްގައި ބުނީ ފާއިތުވި އެއް އަހަރު ދުވަހު ރައީސް ޑރ. މުހައްމަދު މުއިއްޒުގެ ސަރުކާރު ހިންގީ ޒިންމާދާރުކަމާ އެކު މާލިއްޔަތަށް އަމާނާތްތެރިވެ، ހާމަކަންބޮޑުކޮށް ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށެވެ.

"ފާއިތުވި އަހަރު ތެރޭގައި 70 އަށްވުރެ ގިނަ ނޫސްވެރިންގެ ބައްދަލުވުން ސަރުކާރުގެ ވުޒާރާތަކުން ބޭއްވި. އަދި 700 އަށްވުރެ ގިނަ ފަހަރު ސަރުކާރުގެ ވަޒީރުން އެކި މީޑިއާތަކަށް މައުލޫމާތު ދެއްވި. އެ މުއްދަތުގައި އެއްވެސް މީޑިއާއަކަށް ފިޔަވަޅު އަޅައި ދަތި ކުރުމަށް ސަރުކާރުން އެއްވެސް ކަމެއް ކޮށްފައި ނުވާނެ،" އެ ބަޔާނުގައި ބުނެފައިވެ އެވެ.

ސަރުކާރުން އަންނަ އަހަރަށް ލަފާ ކުރާ ބަޖެޓު ރައްޔިތުންގެ މަޖިލީހަށް ހުށަހެޅި ވަކިވަކި ރަށްތަކަށް ކުރާނެ ހަރަދުގެ ތަފުސީލެއް ނެތެވެ. ހަމައެކަނި ހުރީ ގެދޮރުވެރިކަން ހިމެނޭ ގޮތަށް ބައެއް ދާއިރާތަކަށް ކުރާނެ ހަރަދެވެ. ބަޖެޓު ބަހުސްގައި އިދިކޮޅު މެންބަރުން އެންމެ ބޮޑަށް ފާހަގަ ކުރި އެއް ނުކުތާއަކީ އެއީ އެވެ.

އޭގެ އިތުރުން، ފިނޭންސް މިނިސްޓްރީން ނެރެންޖެހޭ ވީކްލީ ފިސްކަލް ރިޕޯޓުތައް ހާމަނުކޮށް ވެސް ވަރަށް ގިނަ ދުވަހު ސަރުކާރު ހިންގި އެވެ. މިދިޔަ އޮކްޓޯބަރުގައި ވީކްލީ ފިސްކަލް ރިޕޯޓު އާންމު ކުރަން ފެށީ އެ ހިސާބުތައް އާންމު ނުކުރާތާ ހަތަރު މަސްދުވަސް ފާއިތުވި ފަހުންނެވެ.

ޕީއެންސީން މިއަދު ނެރުނު ބަޔާނުގައި ބުނީ މާލީ ހިސާބުތައް ހާމަނުކުރެވުނީ ކުރީ ސަރުކާރުން ހަދާފައި ހުރި ގޯސްތަކެއްގެ ސަބަބުން ކަމަށެވެ. އޭގެ އިތުރުން މައުލޫމާތު ހޯދުމުގެ ހައްގުގެ ގާނޫނުގެ ދަށުން ހޯދަން ހުށަހަޅާ މައުލޫމާތުތައް ސަރުކާރުން ފޯރުކޮށްދެމުންދާ ކަމަށް ވެސް ޕީއެންސީން ބުންޏެވެ.

"ސަރުކާރުގެ ވުޒާރާތަކާއި ދައުލަތުގެ ކުންފުނިތަކުން ވެސް އަންނަނީ އާރްޓީއައިތަކަށް ޖަވާބުދެމުން. ފާއިތުވި ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބެއް ނުދޭ. ދައުލަތުގެ ކުންފުނިތަކުން އާރްޓީއައިއަށް ޖަވާބުދޭން ޖެހޭ ކަމަށް ދިވެހިރާއްޖޭގެ ކޯޓަކުން ކަނޑައެޅުމުން ވެސް ޖަވާބުނުދީ ހިފަހައްޓާފައި އޮތް. އެ ސިޔާސަތު ނިމުމަކަށް ގެންނެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު،" އެ ބަޔާނުގައި ބުންޏެވެ.

ޕީއެންސީން އެހެން ބުނި ނަމަވެސް، އާރްޓީއައިތަކަށް އެކަށީގެންވާ އިޖާބައެއް ސަރުކާރުން ނުދޭތީ އެކަމާ އިންފޮމޭޝަން ކޮމިޝަނަރުގެ އޮފީހުން ވަނީ މީގެ ކުރިން ކަންބޮޑުވުންތަކެއް ވެސް ފާޅުކޮށްފަ އެވެ.