ޕާޓީ ބަދަލުކޮށްފި ނަމަ އިސްތިއުފާ ދޭންޖެހޭނެ ކަމަށް ބުނާ އެންޓި ޑިފެކްޝަން ގާނޫނުގެ މާއްދާ އުވާލަން ހައި ކޯޓަށް މައްސަލައެއް ހުށަހެޅުމާއި، ވެރިކަން ކުރާ ޕީއެންސީގެ މަޖިލިސް މެންބަރުންގެ ތެރެއިން ބައެއް މެންބަރުން އެ ޕާޓީން ވަކިވާން އުޅޭކަމުގެ އަޑުތަކެއް ފެތުރުމާއެކު، ޕާޓީ ބަދަލު ނުކުރެވޭ ގޮތަށް، އަދި ޕާޓީގެ މެންބަރުކަމުން ވަކިކޮށްފި ނަމަ މަޖިލީހުގެ ގޮނޑި ގެއްލޭ ގޮތަށް ގާނޫނުއަސާސީ ބަދަލުކުރަން ނިންމައިފި އެވެ.
އެ އިސްލާހު މަޖިލީހަށް ހުށަހަޅަން ނިންމިކަން، ސަރުކާރު ހިންގާ މައި ޕާޓީ، ޕީއެންސީގެ މެންބަރުންނަށް އެންގީ، މެންބަރުންނާއި ބައެެއް މިނިސްޓަރުންނާއެކު މުލިއާގޭގައި ރައީސް ޑރ. މުހައްމަދު މުއިއްޒު މިއަދު މެންދުރު ފަހު ބޭއްވި ބައްދަލުވުމުގަ އެވެ.
ޕީއެންސީގެ ބައެއް މެންބަރުން "އަދަދު" ނޫހަށް ވިދާޅުވީ ގާނޫނުއަސާސީ އިސްލާހުކުރުމުގެ އެ ބިލު މިރޭ މަޖިލީހަށް ފޮނުވައި، މާދަމާގެ ޖަލްސާއަށް އެޖެންޑާކުރާނެ ވާހަކަ ބައްދަލުވުމުގައި ވިދާޅުވި ކަމަށެވެ.
އެ ބިލް ކުރިއަށް ގެންދާނީ މަޖިލީހުގައި ބިލްތައް އާންމުކޮށް ކުރިއަށް ގެންދާ ތަރުތީބާއި ވަގުތު ކުރުކޮށްލުމަށް ފަހު، މާދަމާއިން މާދަމާ އަށް ބިލް ނިންމާ ގޮތަށް ކަމަށް ވެސް އެ މެންބަރުން ވިދާޅުވި އެވެ.
އެ އިސްލާހު ގެންނަން ބޭނުން ނުވާ މެންބަރުން ތިއްބެވިޔަސް، މިއަދުގެ ބައްދަލުވުމުގައި އެކަން ފާޅުގައި ވިދަލުވީ މަދު މެންބަރެއް ކަމަށްވެ އެވެ.
މިފަދަ އިސްލާހެއް ގެނައުމަށް ރައީސް ނިންމެވީ ރާއްޖޭގެ ޓޫރިޒަމް ދާއިރާގައި އެންމެ ފުޅާ ދާއިރާއެއްގައި ވިޔަފާރި ކުރައްވާ ބޭފުޅުންނާ ޗެލެންޖު ކުރެއްވިތާ ދެ ދުވަސް ފަހުންނެވެ.
ޓޫރިސްޓު ފެސިލިޓީތަކުން ބޭންކުތަކަށް ޑޮލަރު މާރުކުރުން މަޖުބޫރު ކުރި ނަމަވެސް އެ ގަވާއިދަށް އަމަލު ނުކުރެވޭނެ ކަމަށް ޓޫރިޒަމް ވިޔަފާރިވެރިން އަންގާފައިވަނިކޮށް، މިދިޔަ އާދީއްތަ ދުވަހުގެ ރޭ ރައީސް މުއިއްޒު ވިދާޅުވީ ގަވާއިދު ބަދަލު ނުކުރާނެ ކަމަށާއި ޖެހޭނީ 500 ޑޮލަރު މާރުކުރަން ކަމަށެވެ.
"އަޅުގަނޑުމެން ނެތިން މި ގަވާއިދު ބަދަލުކުރާކަށް. ނުކުރާނަން ބަދަލެއް. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. ވަރަށް ސާފުކޮށް މި ދެންނެވީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނެއޭ. ގަވާއިދަށް އަމަލުކުރުމަކީ އެންމެންގެ މައްޗަށް ލާޒިމު ކަމެކޭ،" ޓޫރިޒަމް ވިޔަފާރިވެރިންނަށް ރައްދު ދެއްވައި ހަރުއަޑުން ރައީސް ވިދާޅުވި އެވެ
އެ ކަމަކީ ގާނޫނުއަސާސީއާ އެއްގޮތަށް ކުރާ ކަމެއް ކަމަށާއި އެކަމަށް ގާނޫނީ ގޮތުން ބާރު ދިނުމަށް މަޖިލިސް ތެރެއިން ފޮރެކްސް ގާނޫނެއް ވެސް ފާސް ކުރައްވާނެ ކަމަށް ރައީސް ވިދާޅުވި އެވެ.
ޕާޓީ ބަދަލު ނުކުރެވޭ ގޮތަށް ގާނޫނުއަސާސީ އިސްލާހުކުރަނީ ވެސް ވިޔަފާރިވެރިންގެ ކިބައިން ސަލާމަތް ވުމަށް ކަމަށް، މުލިއާގޭގައި ބޭއްވި ބައްދަލުވުމުގައި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި ކަމަށް އެ ޕާޓީގެ ބައެއް މެންބަރުން ވިދާޅުވި އެވެ.
ޕާޓީ ބަދަލު ނުކުރެވޭ ގޮތަށް 19 ވަނަ މަޖިލީހުގެ ފަހު ދުވަސްކޮޅުގައި ފާސްކުރި އެންޓި ޑިފެކްޝަން ގާނޫނު ތަސްދީގު ކުރެއްވީ ރައީސް މުއިއްޒެވެ. އެ ގާނޫނުގެ ތިން ވަނަ މާއްދާ އުވާލަން އިއްޔެ ހައި ކޯޓަށް ހުށަހެޅީ އެއްވެސް ޕާޓީއަކަށް ނިސްބަތްނުވާ ދަފުތަރު ނަންބަރު ރސ 4800، މުހައްމަދު އަނީސް އެވެ.
އެ މައްސަލައިގައި ބުނެފައި ވަނީ ޕާޓީ ބަދަލުކޮށްފި މެންބަރަކު އިސްތިއުފާ ދޭންޖެހޭނެ ކަމަށް ގާނޫނުގައި ބުނެފައި ވަނީ ގާނޫނުއަސާސީއާ ހިލާފަށް ކަމަށެވެ.
ގާނޫނުއަސާސީގެ 261 ގައި ބަޔާންކޮށްފައިވާ ގޮތުން ގާނޫނުއަސާސީ އަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމުލަ މެންބަރުންގެ ހަތަރުބައިކުޅަ ތިންބައިގެ އަގުލަބިއްޔަތުންނެވެ. އެހެންވެ، ޕާޓީ ބަދަލު ނުކުރެވޭ ގޮތަށް ގާނޫނު އަސާސީ ބަދަލުކުރެވޭނީ 70 މެންބަރުންގެ ވޯޓުންނެވެ.
މަޖިލިސް ބެހިފައިވާ ގޮތް
- ޕީއެންސީ 75
- އެމްޑީޕީ 12
- އެމްޑީއޭ 2
- މިނިވަން 2
- ޖޭޕީ 1
- އެމްޑީއޭ 1
