ބަޖެޓުން ހަރަދު ކުރާނެ ގޮތުގެ ތަފުސީލު އަންނަ އަހަރަށް ލަފާ ކުރާ ބަޖެޓުގައި ޖަހާފައި ނެތުމުން އެކަމާ ނުރުހުން ފާޅު ކުރެއްވުމަށްފަހު ބަޖެޓު އަނބުރާ ގެންދަން މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު ހުށަހަޅުއްވައިފަ އެވެ.

އަންނަ އަހަރަށް ލަފާ ކުރާ ބަޖެޓު މަޖިލީހަށް ހުށަހެޅިއިރު، ހުރީ ދާއިރާތަކަށް ކަނޑައެޅި އަދަދެވެ. މިސާލަކަށް ގެދޮރުވެރިކަމަށް 2.7 ބިލިއަން ރުފިޔާ ޖަހާފައި އޮތެވެ. ނަމަވެސް އެ ފައިސާ ހަރަދު ކުރަނީ ކޮން ރަށެއްގެ ކޮން ޕްރޮޖެކްޓަކަށް ކަން ހިމަނާފައެއް ނެތެވެ. ސިޔާމް ކަންބޮޑުވުން ފާޅު ކުރީ އެ މައްސަލައިގަ އެވެ.

"ޓޯޓަލް މި އޮތީ 56 ބިލިއަން ރުފިޔާ. އޮތް އިރުގައި އަޅުގަނޑުމެންނަކަށް ނޭނގޭ [އެ ފައިސާ] ހަރަދު ކުރަނީ ކޮން ކަމަކަށް ކަމެއް. އެހެންވީމަ އަޅުގަނޑު ހަމަ ގައުމުގެ ރައްޔިތުންގެ ހައްގުގައި އަޅުގަނޑު ހުށަހަޅަން މި ބަޖެޓު މުޅިން ބަދަލު ކުރައްވައި، ތަފުސީލު އެނގޭނެހެން އަޅުގަނޑުމެންނަށް އަލުން މި ފޮތް ދެއްވުން،" ސިޔާމް ވިދާޅުވި އެވެ.

"އެހެން ނޫނީ އަޅުގަނޑުމެންނަށް ނޭނގި ހުރެ އެއްޗަކަށް ވޯޓު ދެވުނީމާ ގިޔާމަތް ދުވަހުން ވެސް އެކަމުގެ އަޒާބު އަޅުގަނޑުމެންނަށް ﷲ ސުބްހާނަހޫ ވަތައާލާ ދެއްވާނެ."

މަޖިލީހުގައި އިތުރަށް ވާހަކަ ދައްކަވަމުން ސިޔާމް ވިދާޅުވީ ބަޖެޓަކީ 100 ޕަސެންޓު ރަނގަޅު އެއްޗެކޭ ބުނަން ހެޔޮ ވެސް ނުވާނެ ކަމަށެވެ.

"މި ބަޖެޓަކީ ސައްތައިން ސައްތަ ރަނގަޅު އެއްޗެކޭ ބުނަން ހެޔޮ ވެސް ނުވާނެ. އަޅުގަނޑު ހަމަ އާދޭހާއެކު ދަންނަވަން އިއްޒަތްތެރި ރައީސް މި ބަޖެޓު ގެންދަވާ. ގެންގޮސް އަޅުގަނޑުމެންނަށް ތަންދޮރު އެނގޭނެ ގޮތަކަށް އަޅުގަނޑުމެންނަށް ބަޖެޓު ހުށަހަޅައިދެއްވާ،" ސިޔާމް ވިދާޅުވި އެވެ.

ރައްޔިތުންގެ މަޖިލީހުގައި ބަޖެޓަށް ބަހުސް ކުރުމުގެ މަސައްކަތް މިއަދު ނިންމާލާނެ އެވެ. ފިނޭންސް މިނިސްޓަރު މޫސާ ޒަމީރު ރައްޔިތުންގެ މަޖިލީހަށް ބަޖެޓު ހުށަހެޅީ އޮކްޓޯބަރު 31، ގަ އެވެ. އޭގެ ފަހުން މަޖިލީހުގެ ތެރެއިން ބަޖެޓުގެ އެކި މަސައްކަތް ދަނީ ކުރަމުންނެވެ. އޭގެ ތެރޭގައި ތަޅުމުގައި ބަޖެޓަށް ބަހުސް ކުރުމާއި ކޮމީޓީއިން ކުރަންޖެހޭ ދިރާސާތައް ހިމެނެ އެވެ.

ވެރިކަން ހިންގާ ޕީއެންސީގެ މެންބަރުން ބުނަމުންދަނީ އަންނަ އަހަރަށް ލަފާކޮށް ހުށަހަޅާފައިވާ ބަޖެޓަކީ ވަރަށް ރަނގަޅު ބަޖެޓެއް ކަމަށެވެ. ނަމަވެސް އިދިކޮޅު އެމްޑީޕީގެ މެންބަރުން ދަނީ ބަޖެޓަށް ވަރަށް ބޮޑަށް ފާޑުކިޔަމުންނެވެ.

ބަޖެޓުގެ އެންމެ ބޮޑު އެއް މައްސަލައިގެ ގޮތުގައި އިދިކޮޅު މެންބަރުން ފާހަގަ ކުރަނީ ވަކިވަކި ރަށްރަށަށް މަޝްރޫއުތަކުން ހަރަދު ކުރާނެ މިންވަރު ނުޖަހާ އޮތުމުންނެވެ. އަދި އެވަރުގެ ބޮޑު ބަޖެޓެއް ހުށަހެޅިއިރު ސަބްސިޑީތަކަށް ކަނޑައެޅި އަދަދު މަދުވުމުން ވެސް އިދިކޮޅު މެންބަރުން ފާޑުކިޔެވެ.

ސަބްސިޑީތައް ދިނުމަށް ބަޖެޓުގައި ހިމަނާފައި އޮތީ އެންމެ 7.9 ބިލިއަން ރުފިޔާ އެވެ. މި އަހަރުގެ ބަޖެޓުގައި 10.9 ބިލިއަން ރުފިޔާ އެވެ. ބަޖެޓުގައި އޮތީ މަސްވެރިކަމާއި ތެލާއި ކަރަންޓާއި ބޭސްފަރުވާ އާއި މަސްވެރިންނަށް ދޭ ސަބްސިޑީ ވެސް ކުޑަކުރަން ހުށަހަޅައިފަ އެވެ.

ރައީސް ޑރ. މުހައްމަދު މުއިއްޒު ވިދާޅުވެފައި ވަނީ އަންނަ އަހަރަށް ދައުލަތުން ހުށަހަޅާފައި އޮތީ ގެދޮރުވެރިކަމުގެ ބަޖެޓެއް ކަމަށެވެ. އެކަމަކު، ގެދޮރުވެރިކަމަށް ކަނޑައަޅާފައި ވަނީ މި އަހަރު ބަޖެޓު ކުރި އަދަދަށްވުރެ ވެސް މަދުންނެވެ. މި އަހަރުގެ ބަޖެޓުގައި ގެދޮރުވެރިކަމަށް 3.4 ބިލިއަން ރުފިޔާ ކަނޑައެޅި އެވެ. ނަމަވެސް އަންނަ އަހަރަށް ކަނޑައެޅީ އެންމެ 2.7 ބިލިއަން ރުފިޔާ އެވެ.

ބަޖެޓުން ކައުންސިލްތަކަށް ދިނުމަށް ކަނޑައަޅާފައި އޮތް އަދަދު ބޮޑުތަނުން މަދު ކުރުމުން ވެސް ދަނީ ފާޑުކިޔުން އަމާޒުވަމުންނެވެ. ކައުންސިލްތަކަށް ދޭން ކަނޑައަޅާފައި އޮތީ އެންމެ 1.4 ބިލިއަން ރުފިޔާ އެވެ. އެކަމަކު ދައުލަތުގެ އާމްދަނީގެ ވަކި މިންވަރެއް ކައުންސިލްތަކަށް ކަނޑައަޅަންޖެހޭއިރު މަދުވެގެން 2.1 ބިލިއަން ރުފިޔާ ބަޖެޓުގައި ކައުންސިލްތަކަށް ހާއްސަ ކުރަންޖެހެ އެވެ.