ރާއްޖޭގެ އިންޓަނޭޝަނަލް ބީޗްވޮލީ ރެފްރީ، ހުސައިން މުހައްމަދު (ވޮލީ ހުސެން) އަށް ގާތްގާތުގައި އިންޓަނޭޝަނަލް ތިން މުބާރާތެއްގައި އިންސާފުކުރުމުގެ ފުރުސަތު ލިބިގެންގޮސްފި އެވެ.

އެ ގޮތުން، ހުސެން ވަނީ މި މަހުގެ 5-10 އަށް އޭޝިއަން ވޮލީބޯލް ކޮންފެޑެރޭޝަން (އޭވީސީ) އިން ދިން ފުރުސަތެއްގައި ފިލިޕީންސްގެ ނުވާއީގައި ކުރިއަށްދިޔަ އޭޝިއަން ސީނިއާ ޗެމްޕިއަންޝިޕްގައި ނިއުޓްރަލް ރެފްރީއަކަށް މަސައްކަތްކޮށްފަ އެެވެ. ހުސެން، މި ވަގުތު ޗައިނާގެ ހައިކޫގައި ހުރީ، ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީން ދިން ފުރުސަތެއްގައި، ނިއުޓްރަލް ރެފްރީއެއްގެ ގޮތުގައި، އެފްއައިވީބީ ބީޕީޓީ ޗެލެންޖް މުބާރާތުގެ ނިއުޓްރަލް ރެފްރީ އަކަށެވެ. އެއީ، މި މަހު 13 އިން ފެށިގެން، 17 އަށް ކުރިއަށްދާ މުބާރާތެކެވެ.

ހުސެން އަށް ދެން އޮތް މުބާރާތަކީ، މި މަހު، 21-24 އަށް އިންޑިއާގެ ޗެންނާއީގައި ކުރިއަށްދާ އެފްއައިވީބީ ބީޕީޓީ ޗެެލެންޖް މުބާރާތެކެވެ. އެ މުބާރާތުގައި ހުސެން މަސައްކަތް ކުރާނީ އެފްއައިވީބީން ދިން ފުރުސަތެއްގައި، ނިއުޓްރަލް ރެފްރީ އަކަށެވެ.

މި އަހަރު ހުސެން ވަނީ، މީގެ ކުރިން ދެ މުބާރާތެއްގައި މަސައްކަތްކޮށްފަ އެވެ. އެއީ، ސެޕްޓެމްބަރު މަހު، ޗައިނާގެ ޝަންލޫގައި ކުރިއަށްދިޔަ، އެފްއައިވީބީ 19 އަހަރުން ދަށުގެ މުބާރާތުގައި ނިއުޓްރަލް ރެފްރީއެއްގެ ގޮތުގަޔާއި ރެފްރީ ޑެލިގޭޓެއްގެ ގޮތުގައި، އޮގަސްޓް މަހު، ބޫޓާންގައި ކުރިއަށްދިޔަ، ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ ބީޗްވޮލީ މުބާރާތުގަ އެވެ.

މީގެ އިތުރުން، ޖުލައި މަހު، ލަންކާގައި ކާވާ އިން ބޭއްވި ބީޗްވޮލީބޯލް އިންސްޓްރަކްޓާ ކޯހެއްގައި ހުސެން ވަނީ ކިޔަވައިދީފަ އެވެ. މިއީ، ކާވާ އިން ދިން ފުރުސަތެކެވެ.

އެފްއައިވީބީން ބިޗް ވޮލީ ރެފްރީން ގިންތި ކޮށްފައި އޮންނަނީ ކެންޑިޑޭޓް ލެވަލުން ފެށިގެން، ގްރޭޑް ޑީ، ސީ، ބީ އަދި އޭ އެވެ. ހުސެން، 2012 ވަނަ އަހަރު ބެންކޮކުގައި ބީޗް ރެފްރީ ކޯސް ހެއްދެވުމަށް ފަހު ދެ އަހަރު ހޭދަކުރެއްވީ އެކްރެޑިޓް މެޗުތައް ހަމަކުރުމަށެވެ. އެއީ، ކެންޑިޑޭޓް ލެވަލްގަ އެވެ. އޭނާ ޑީ އަށް ޕްރޮމޯޓްވީ 2014 ވަނަ އަހަރު އެވެ. ހުސެން ވަނީ، ބީޗް ރެފްރީންގެ ލެވަލްގެ ދެ ހަރުފަތް ކަނޑަތުކޮށްފަ އެވެ. ހުސެން، މިދިޔަ އަަހަރު ވަނީ ބޮޑު ކުރިއެރުމެއް ހޯދައި، ސީ ކެޓަގަރީ އަށް ޕްރޮމޯޓްވެފަ އެވެ.

މިދިޔަ ސަރުކާރުގައި، މޯލްޑިވްސް ސްޕޯޓްސް ކޯޕަރޭޝަންގެ ޗެއާމަންގެ މަގާމު ވެސް ފުރުއްވާފައިވާ، ވޮލީބޯލް އެސޯސިއޭޝަންގެ ކުރީގެ ޖެނެރަލް ސެކްރެޓަރީ، ހުސެން އަށް މިދިޔަ އަހަރު، އެފްއައިވީބީ ބީޗްޓުއާގެ ތިން މުބާރާތެއްގައި ރެފްރީކަން ކުރަން ފުރުސަތު ލިބުނެވެ. އެއީ، ފިލިޕީންސްގެ ނުވާލީ އާއި ތައިލެންޑްގެ ޝިއަން މާއީ އަދި އިންޑިއާގެ ގޯއާގައި ކުރިއަށްދިޔަ މުބާރާތްތަކުގަ އެވެ. މިދިޔަ އަަހަރު ރާއްޖޭގައި ބާއްވަން އޮތް ބީޗްވޮލީ ޓުއާ މުބާރާތަށް ވެސް ހުސެން އަށް ނޮމިނޭޝަން ލިބުނެވެ. އެކަމަކު، އެ މުބާރާތް ވީ ކެންސަލް އެވެ. މީގެ އިތުރުން މިދިޔަ އަހަރުގެ އޭވީސީ ސެންޓްރަލް ޒޯންގެ ކޮންޓިނެންޓަލް ކަޕްގައި ވެސް ހުސެން ވަނީ އިންސާފުކޮށްފަ އެވެ. އެއީ އޭޝިއަން ވޮލީބޯލް ކޮންފެޑެރޭޝަން (އޭވީސީ) އިން ދިން ފުރުސަތެއްގަ އެވެ.