މެޑްރިޑް (ނޮވެމްބަރު 15) - އަނިޔާގެ ސަބަބުން ރެއާލް މެޑްރިޑްގެ ގިނަ ޑިފެންޑަރުންތަކެއް ކުޅުމާ ދުރުގައި ހުރި ވަގުތެއްގައި، އެ ޓީމުގެ ކުރީގެ ކެޕްޓަން، ސާޖިއޯ ރާމޯސް އެ ކްލަބާ ގުޅެން ޝައުގުވެރިކަން ފާޅުކުރި ކަމުގައި ވިޔަސް އޭނާ އަށް ފުރުސަތު ނުދޭން ރެއާލް މެނޭޖްމަންޓުން ނިންމާފައިވާ ކަމަށް ރިޕޯޓްތައް ބުނެފި އެވެ.

ރެއާލްގެ ގިނަ ޑިފެންޑަރުންތަކެއް ކުޅުމާ ދުރުގައި ހުރުމުން، މިއީ ރާމޯސް އަށް އެ ޓީމަށް އެހީވެވޭނެ ވަގުތެއް ކަމަށް ރެއާލްގެ ކުރީގެ ކުޅުންތެރިން ވެސް ވަނީ ބުނެފަ އެވެ.

މި ވަގުުތު އެއްވެސް ކްލަބެއްގެ ކޮންޓްރެކްޓްގައި ނެތް، ސްޕެއިނުގެ ލެޖެންޑަރީ، ޑިފެންޑަރު، ރާމޯސް، 38، އަށް ހަތަރު ގައުމެއްގެ ލީގުތަކަށް ނިސްބަތްވާ ކްލަބްތަކުން ހުށަހެޅުން ލިބިފައިވީ ނަމަވެސް އޭނާ ހުރީ ގޮތެއް ނުނިންމަ އެވެ. ސްޕެއިނުގެ މީޑިއާ ރިޕޯޓްތައް ބުނާގޮތުން، ރާމޯސް ވަނީ ރެއާލަށް އެނބުރި ދާން ބޭނުންވާކަން އެ ކްލަބަށް އަންގައިފަ އެވެ.

އެކަމަކު، ރެއާލްގެ ރައީސް ފްލޮރެންޓީނޯ ޕެރޭޒް އާއި ސީއީއޯ ޖޯސޭ އެންހެލް ސަންޗޭޒް ވަނީ، ރާމޯސްގެ އެ ހުށަހެޅުމަށް ފުރަގަސްދީފަ އެވެ.

ރާމޯސް ސީނިއާ ކުލަބު ކެރިއަރު ފެށީ ސެވިއްޔާ އިންނެވެ. އެ ކުލަބުގެ ސީނިއާ ޓީމަށް ދެ އަހަރު ކުޅުމަށް ފަހު ސްޕެއިންގެ ރެއާލް މެޑްރިޑަށް އޭނާ ބަދަލުވީ 2005 ވަނަ އަހަރު އެވެ. ރެއާލްގައި 16 އަހަރު ކުޅުމަށް ފަހު އޭނާ އެކުލަބު ދޫށްލީ 2021 ގަ އެވެ. އެ ފަހަރު، ހިލޭ ޓްރާންސްފާއެއްގައި ބަދަލުވީ، ފްރާންސްގެ ޕީއެސްޖީ އަށެވެ.

ރެއާލްގެ ޝައުގުވެރިކަން ލަޕޯޓް އަށް

ރިޕޯޓްތައް ބުނާގޮތުން، ރެއާލްގެ ޑިފެންޑަރުންގެ މި އަނިޔާގެ މައްސަލަތަކަށް ހައްލެއް ހޯދަން އެ ކްލަބުން ކުރާ މަސައްކަތުގައި، ބިޑްކުރަން ނިންމާފައިވަނީ، އަލް ނަސްރަށް ކުޅެމުން އަންނަ ސްޕެއިން ގައުމީ ޓީމުގެ ޑިފެންޑަރު އައިމެރިކް ލަޕޯޓް އެވެ.

ކުރިން މެންޗެސްޓާ ސިޓީ އަށް ކުޅުނު ލަޕޯޓް ގަންނަން ރެއާލުން 25 މިލިއަން ޑޮލަރު .މަދުވެގެން ހަރަދުކުރަން ޖެހޭނެ ކަމަށް މީޑިއާ ރިޕޯޓްތައް ބުނާއިރު، ރެއާލުން އަންނަނީ އަލް ނަސްރާ އެކު، މަޝްވަރާކޮށް އެ އަގާ މެދު އިތުރު ގޮތްތަކެއް ހޯދޭތޯ ވާހަކަ ދައްކަމުންނެވެ.