އެމްޑީޕީގެ ލީޑާޝިޕުގެ ބޭފުޅުން ހައްޔަރު ކުރަން މިއަދު އޮތް މަޖިލީހުގެ ޖަލްސާގައި މަޑަވެލި ދާއިރާގެ ޕީއެންސީ މެންބަރު މުހައްމަދު ޝަމީޒު ގޮވައިލުމަކީ ގިނަ ސިޔާސީ ފިކުރު އެކުލެވޭ ޑިމޮކްރެސީގެ ނިޒާމަށް ދިން ހަމަލާއެއް ކަމަށް އެމްޑީޕީގެ ރައީސް، އަބްދުﷲ ޝާހިދު މިއަދު ވިދާޅުވެއްޖެ އެވެ.

އެކްސްގައި ޝާހިދު ކުރެއްވި ޕޯސްޓެއްގައި ވިދާޅުވީ އެމްޑީޕީގެ ލީޑަރުން ހައްޔަރު ކުރަން ގޮވައިލުމުން ދޭހަވަނީ ރާއްޖޭގެ ޑިމޮކްރެސީ އޮތީ ނުރައްކަލެއްގެ ތެރޭގައި ކަމަށެވެ.

"ރޭ ބޭއްވި ޖަލްސާއަށް ފަހު ވެރިކަން ކުރާ ޕާޓީއަށް ނިސްބަތްވެވަޑައިގަންނަވާ މެންބަރުން ދަނީ އެމްޑީޕީގެ ލީޑަޝިޕުގައި ހިމެނޭ ބޭފުޅުން ހައްޔަރު ކުރަން ހާމަކަން ބޮޑުކޮށް ގޮވައިލަމުން، މިއީ ޑިމޮކްރެސީގެ އެންމެ މައިގަނޑު ބިންގާ ކަމުގައިވާ ސިޔާސީ ގިނަ ފިކުރު އެކުލެވޭ ނިޒާމަށް ދޭ ހަމަލާއެއް،" ޝާހިދުގެ ޕޯސްޓުގައި ވިދާޅުވި އެވެ.

މިއަދު އޮތް މަޖިލީހުގެ ޖަލްސާގައި ބަޖެޓު ބަހުސްގައި ބައިވެރިވެ ވާހަކަ ދައްކަވަމުން ޝަމީޒު ތުހުމަތު ކުރެއްވީ ރާއްޖޭގެ ދެކުނުން އޮންނަ ޗާގޯސްގެ ޖަޒީރާ ރަށްތައް ކުރީ ސަރުކާރުން ވިއްކައިލި ކަމަށެވެ. އަދި އެއީ ރޯމާދުވާލު ކުރި ބޮޑު ވައްކަމެއް ކަމަށާއި އެކަން ކުރި ބަޔަކު ހައްޔަރު ކުރަންޖެހޭނެ ކަމަށް ޝަމީޒު ވިދާޅުވި އެވެ.

"އިއްޒަތްތެރި ރައީސް މިކަން ކުރި މީހުން ހިފައި ހައްޔަރު ކުރަން އަޅުގަނޑު ގޮވައިލަން، އަބްދުﷲ ޝާހިދު ހައްޔަރު ކުރަންވީ، އިބްރާހިމް މުހައްމަދު ސޯލިހު ހައްޔަރު ކުރަންވީ، ފައްޔާޒު ހައްޔަރު ކުރަންވީ، ފިނޭންސް މިނިސްޓަރަކަށް ހުރި އަމީރު ހައްޔަރު ކުރަންވީ، ކީއްވެތޯ ގާނޫނު ތަންފީޒު ނުކުރެވެނީ އިއްޒަތްތެރި ރައީސް، ގާނޫނު ތަންފީޒު ކުރެވެން ޖެހޭނެ،" ޝަމީޒު ވިދާޅުވި އެވެ.

އެ ވާހަކައަށް ރައްދު ދެއްވައި ޝާހިދު ކުރެއްވި ޕޯސްޓުގައި ވިދާޅުވީ ގައުމަށް ހައްގުވާ މިނިވަންކަމާއި އިންސާފާއި ޑިމޮކްރެޓިކް ހަމަތައް ހޯދަން ކުރާ މަސައްކަތް ހައްޔަރު ކުރާނެ ކަމަށް ބުނެ ބިރުދައްކައިގެން ނުހުއްޓުވޭނެ ކަމަށެވެ.