ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓަކީ ރައްޔިތުންގެ މަންދޫބުންގެ އަތުން ސަރުކާރު ޖަވާބުދާރީ ކުރުވުމުގެ ފުރުސަތު ގެއްލުވާލާ ގޮތަށް ހުށަހަޅާފައިވާ ބަޖެޓެއް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއީލު އަހްމަދު ނަސީމް ވިދާޅުވެއްޖެ އެވެ.

މަޖިލީހުގައި މިއަދު ބަޖެޓު ބަހުސް ފަށާފައިވާއިރު އިދިކޮޅު އެމްޑީޕީއަށް ނިސްބަވްތާ މީކާއިލް ވަނީ ބަޖެޓާ ގުޅޭ އެއްވެސް ތަފްސީލެއް ސަރުކާރުން ހިއްސާކޮށްފައި ނުވާތީ ކަންބޮޑުވުން ފާޅުކުރައްވާފަ އެވެ. އަދި, ސަރުކާރުން ހުށަހަޅާފައިވާނީ ގާނޫނާ ހިލާފު ބަޖެޓެއް ކަމަށް މީކާއިލް ވިދާޅުވި އެވެ.

"ލާމަރުކަޒީ އުސޫލުން ދިވެހިރާއްޖެ ހިންގުމާ ބެހޭ ގާނޫނުގައި ކަނޑައެޅިގެން ވަކި ގޮތަކަށް ވަކި އަދަދެއް ބްލޮކް ގްރާންޓްގެ ގޮތުގައި ކައުންސިލްތަކަށް ދޭން ޖެހޭނެ ކަމަށް ބުނެ ގާނޫނުގައި, މިއީކީ އޭރެއްގައި ހުންނަ ރައީސުލްޖުމްހޫރިއްޔާގެ ހެޔޮފުޅުކަމުން, ފިނޭންސް މިނިސްޓަރު އަރިހަށް ކުރާ ޒިޔާރަތަކުން ކަނޑައެޅޭ އަދަދެއް ނޫން ކަމަށް މަޖިލީހުން ނިންމީ މުހިންމު ބޭނުމަކަށް. ނަމަވެސް ދައުލަތުގެ ބަޖެޓު ހުށަހެޅިގެންދާއިރު ކަނޑައެޅިގެން ގާނޫނާ ހިލާފު އަދަދުތަކެއް ކައުންސިލްތަކުގެ ބްލޮކް ގްރާންޓުގެ ގޮތުގައި އޮތީ," ގާނޫނާ ހިލާފު ކަމަށް ދެކެވަޑައިގަންނަވާ ސަބަބު ހާމަކުރައްވަމުން އޭނާ ވިދާޅުވި އެވެ.

ސަރުކާރަށް އަހަރެއް ވާން ދާއިރު މި ސަރުކާރުގެ އޮއްޓަރެއް ނެތް, ދެއުޅިއެއްނުވާ ސަރުކާރެއް ނުދެކޭ ކަމަށް މީކާއިލް ވިދާޅުވި އެވެ. އަންނަ އަހަރުގެ ބަޖެޓު ހަތް ބިލިއަން ރުފިޔާ އިތުރު ކަމަށާއި ހަރަދު ކުޑަ ކުރުމަށް ކުރި އެއްވެސް ކަމެއް ބަޖެޓުން ނުފެންނަ ކަމަށް އޭނާ ވިދާޅުވި އެވެ.

މުވައްޒަފުންނަށް ކުރާ ހޭދަ އަންނަ އަހަރު 37 ޕަސެންޓު އިތުރުވާ ކަމަށާއި މި ސަރުކާރުގައި 2,200 އަށްވުރެ ގިނަ ސިޔާސީ މުވައްޒަފުން ތިބިކަން ބަޖެޓުން ސާފުވާ ކަމަށް މީކާއިލް ފާހަގަކުރެއްވި އެވެ. ސަބްސިޑީތައް ކަނޑާލުމާއެކު އާންމު ރައްޔިތުންގެ ޖީބަށް އަސަރު ކުރާނެ ކަމަށް އޭނާ ވިދާޅުވި އެވެ.

"ޓާގެޓެޑް ސަބްސިޑީތަކަށް ދިޔުމަށް ސަރުކާރުން ކުއްލިއަކަށް މިސްރާބު އަނބުރާލާއިރު އެކަމަށް އެއްވެސް ރޭވުންތެރިކަމެއް ނެތް. އެކަން ކުރާނެ ޕްލޭނެއް ނެތް. މިހާތަނަށް ޓާގެޓެޑް ސަބްސިޑީތައް ދޭނީ ކޮން ބަޔަކަށްތޯ ކަނޑައަޅާނެ ދަފްތަރެއް ވެސް ސަރުކާރަށް އެކުލަވާލެވިފައި ނެތް. އެހެންވީމާ ކުއްލި ގޮތަކަށް އަންނަ އަހަރު ކަރަންޓުން ސަބްސިޑީ ކަނޑާލާއިރު, ކާބޯތަކެތިން ސަބްސިޑީ ކަނޑާލާއިރު ޑައިރެކްޓް ސަބްސިޑީ ދެން ދޭނީ ކޮން ބަޔަކަށްތޯ ރައްޔިތުންނަކަށް ނޭނގޭ," މީކާއިލް ވިދާޅުވި އެވެ.

"އެއްވެސް މައުލޫމާތެއް ނެތް. 2025 ވަނަ އަހަރަށް ރައްޔިތުން މިދަނީ ކަނު އަނދިރީގައި ތިބެގެން."

މި އަހަރު ޕީއެސްއައިޕީ މަޝްރޫއުތަކަށް ބަޖެޓު ކޮށްފައިވާ 12 ބިލިއަން ރުފިޔާއަށް ކުރީ ކޮން ކަމެއްތޯ ވިދާޅުވެ މީކާއިލް ސުވާލު އުފެއްދެވި އެވެ. އަންނަ އަހަރަށް ބަޖެޓެއް ފާސްކުރަން ހުށަހެޅިއިރު މިދިޔަ އަހަރު ފާސްކުރި ބަޖެޓުން ހޭދަކުރި ގޮތުގެ ތަފްސީލުތައް ނެތް ކަމަށް މީކާއިލް ވިދާޅުވި އެވެ.

"އަޅުގަނޑުމެން ކިހިނެއްތޯ މި ބަޖެޓަށް ފާރަވެރި ވާނީ. ކިހިނެއްތޯ މި ބަޖެޓުގައި ޖަހާފައި ހުރި ތަފާސްހިސާބުތަކަށް ސަރުކާރު ޖަވާބުދާރީ ކުރުވާނީ. އެއްވެސް މަގެއް ނެތް. މި ބަޖެޓަކީ ދިވެހިރާއްޖޭގެ ހަޔާތުގައި ވެސް ރައްޔިތުންގެ މަންދޫބުންގެ އަތުން ސަރުކާރު ޖަވާބުދާރީ ކުރުވުމުގެ ބާރު, މަގު, އެ ފުރުސަތު ގެއްލުވާލާ ފުރަތަމަ ބަޖެޓު," މީކާއިލް ވިދާޅުވި އެވެ.

ސަރުކާރުން ބަޖެޓު އެކުލަވާލާފައިވަނީ 2025 ވަނަ އަހަރު ސަރުކާރުގެ މަސައްކަތްތައް ވަޒަން ނުކުރެވޭ ގޮތަށް ވަރަށް ހީލަތްތެރިކޮށް ކަމަށް މީކާއިލް ވިދާޅުވި އެވެ.

އަންނަ އަހަރަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުން ސަރުކާރުން ދޭ އެހީ އާއި ސަބްސިޑީގެ އަދަދު އޮތީ މިއަހަރަށް ވުރެ މަދުކޮށްފަ އެވެ. މި އަހަރުގެ ބަޖެޓުން އެކަމަށް 10.9 ބިލިއަން ކަނޑައަޅާފައި އޮތްއިރު، އަންނަ އަހަރުގެ ބަޖެޓުގައި އޮތީ 7.9 ބިލިއަން ރުފިޔާ އެވެ.