"ފުދިއްޖެ-ފުނޑިއްޖެ" ނަމުގައި އިދިކޮޅު މައި ޕާޓީ އެމްޑީޕީން މާދަމާ ރޭ އާޓިފިޝަލް ބީޗުގައި ޖަލްސާއެއް ބާއްވަން ނިންމައިފި އެވެ.

އެމްޑީޕީން ބުނީ އެ ޖަލްސާ ފަށާނީ މާދަމާ ރޭ 8:30 ގައި ކަމަށާއި ވީހާ ވެސް ގިނަ މީހުން ޖަލސާގައި ބައިވެރުވުމަކީ ވަރަށް ބޮޑު އެދުމެއް ކަމަށެވެ. މި ޖަލްސާއަށް ތައްޔާރުވުމުގެ ގޮތުން އެމްޑީޕީން ރޭ އެ ޕާޓީގެ ހަރުގެއަށް މެންބަރުން އެއްކޮށްގެން އެކި ހަރަކާތްތައް ވެސް ކުރިއަށް ގެންދިޔަ އެވެ.

އެމްޑީޕީން އަންނަނީ ފަހަކަށް އައިސް މަގުމަތީ ހަރަކާތްތައް އިތުރު ކުރަމުންނެވެ. އެ ޕާޓީން ވަނީ ޑިމޮކްރަސީ އާއި ހައްގުތަކާއި މިިނިވަންކަން ގެއްލޭ ގޮތަށް ބައެއް ގާނޫނުތަކަށް ބަދަލު ގެންނަން ރައީސް ޑރ. މުހައްމަދު މުއިއްޒު ހުށަހަޅުއްވާފައިވާ ކަމަށް ބުނެ އެކަމާ ދެކޮޅަށް ރައްޔިތުންގެ މަޖިލިސް ދޮށަށް އެއްވެ އަޑު އުފުލާފަ އެވެ.

އޭގެ އިތުރުން އެމްޑީޕީން ކޮންމެ ހަފްތާއެއްގެ ބުރާސްފަތި ދުވަހު ސިލްސިލާކޮށް ހަރުގެ ޖަލްސާ ބާއްވަމުން އަންނައިރު، ހަފްތާއަކު އެއްފަހަރު ރައްޔިތުންނާ ގުޅޭ މުހިންމު މައްސަލަތަކަށް ޕެނަލް ޑިސްކަޝަން ވެސް އަންނަނީ ބާއްވަމުންނެވެ.