ސަރުކާރުން ގާނޫނުއަސާސީ ބަދަލުކޮށް ރައްޔިތުންގެ މަޖިލީހުގެ މެންބަރުކަމުން ވަކިވާ ހާލަތްތަކަށް ބަދަލު ގެނައުމާ ގުޅިގެން އެކަމުގައި އެންމެ ރަނގަޅު ގޮތަކީ ޕާޓީން ވަކިކޮށްފި ހާލަތެއްގައި އެންމެ ރަނގަޅީ ރިކޯލް ވޯޓަކަށް ދިޔުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.

ސަރުކާރުން އިއްޔެ ވަނީ 10 ވަރަކަށް ގަޑިއިރު ތެރޭ ގާނޫނުއަސާސީއަށް ބަދަލުތަކެއް ގެނެސްފަ އެވެ. އެކަމާ މެދު ކަންބޮޑުވުން ފާޅުކުރުމުގެ ގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ފައްޔާޒް ވިދާޅުވީ ޕާޓީގެ އިތުރުން އެ މެންބަރަކު ހޮވި ރައްޔިތުން ވެސް އެކަމަށް ގޮތް ނިންމަން ފުރުސަތު ދޭން ޖެހޭނެ ކަމަށް ގަބޫލުކުރައްވާ ކަމަށެވެ.

"އަޅުގަނޑު ގަބޫލުރާ ގޮތުގައި އޮންނަންވާނީ ޑިއު ޕްރޮސެސްއެއް. އަޅުގަނޑު ގަބޫލުކުރާ ގޮތުގައި މެންބަރުގެ ގޮނޑި ގެއްލެންވާނީ ވަކީ ހާލަތްތަކެއް މެދުވެރިވެ، އޭނައަށް އެޕީލް ކުރުމުގެ ފުރުސަތުތަކެއް ލިބިގެން. ނުވަތަ ރިކޯލް ވޯޓަކަށް ރައްޔިތުންނާ ހިސާބަށް ދިޔުމުގެ ފުރުސަތު. އެއީ އެންމެ ރަނގަޅު ގޮތް އަޅުގަނޑު ދެކޭ ގޮތުގައި،" ފައްޔާޒް ވިދާޅުވި އެވެ.

ޑިމޮކްރަސީ ގަބޫލުކުރާ ހުރިހާ ގައުމެއްގައި އެންޓި ޑިފެކްޝަންއަކީ އޮތުން ރަނގަޅު ކަމެއްކަން ފާހަގަކުރައްވާ ފައްޔާޒް ވިދާޅުވީ ގޮނޑި ގެއްލޭ ގޮތަށް އެމްޑީޕީން ބަދަލުތައް ގެނައީ ވަރަށް ފުޅާ ދާއިރާއެއްގައި މަޝްވަރާ ކުރުމަށް ފަހު މެންބަރުގެ ވެސް ހައްގުތައް ނުގެއްލޭ ގޮތަށް ކަމަށެވެ.

އެމްޑީޕީގެ ވެރިކަމެއްގައި މި ސަރުކާރުން ބޭއްވި ގޮތަށް އެންޓި ޑިފެކްޝަންގެ ގާނޫނު ނުބާއްވާނެ ކަމަށާއި ނަމަވެސް ގޮނޑި ގެއްލޭ ހާލަތްތަކެއް އޮންނަން ޖެހޭނެ ކަމަށް ގަބޫލުކުރައްވާ ކަމަށް ފައްޔާޒް ވިދާޅުވި އެވެ.

އޭގެއިތުރުން ފައްޔާޒު ވިދާޅުވީ މިހާރު އޮތްގޮތުން ޕީއެންސީ މެންބަރެއް ޕާޓީން ވަކިވެ ގޮނޑީ ގެއްލުމަކީ އެކަށީގެންވާ ކަމެއް ކަމަށާއި ނަމަވެސް މިހާތަނަށް ފެންނަ ފެނުމުން ރައީސް ޑރ. މުހައްމަދު މުއިއްޒު ދެކެ ޖެހިލުންވާތީ އެފަދަ މެންބަރެއް ހުރިހެން ހީނުވާ ކަމަށެވެ.

ރައްޔިތުންނަށް އުނދަގޫވެ ހަރަދު ބޯޑުވި ނަމަވެސް އިންތިހާބުތައް ބާއްވަން ޖެހޭނެ ކަމަށާއި އެއީ ރައްޔިތުންގެ ހައްގުތައް އެފަދަ އިންތިހާބުތަކުން ކަށަވަރު ކުރެވޭތީ ކަމަށް ވެސް ފައްޔާޒް ވިދާޅުވި އެވެ.

ރައްޔިތުންގެ މަޖިލީހުގެ ސުޕަ މެޖޯރިޓީ އޮތް ޕީއެންސީގެ މެންބަރުންގެ ފުރިހަމަ ތާއިދާއެކު ގާނޫނުއަސާސީގެ ފަސް މާއްދާއަކަށް އިއްޔެ ބަދަލު ގެނަ އެވެ.

އެ ބަދަލުތަކުގެ ތެރޭގައި ގާނޫނުއަސާސީގެ 73 ވަނަ މާއްދާއަށް އަކުރެއް އިތުރުކޮށް، މެންބަރުން ވަކިކުރެވޭނެ ގޮތް ލިޔުނެވެ. މި ބަދަލާއެކު އިންތިހާބުވާ މެންބަރަކު މަޖިލީހުގެ އުމުރުގެ ތެރޭގައި އެހެން ސިޔާސީ ޕާޓީއަކަށް ބަދަލުވުން، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން މަޖިލީހުގެ ގޮނޑި ގެއްލޭނެ އެވެ.