މިދިޔަ ބުރާސްފަތި ދުވަހު ހިޔާ ފްލެޓްގެ އެޕާޓްމަންޓެއްގައި މީހަކު ރަހީނުކުރި މައްސަލައާ ގުޅިގެން ހައްޔަރުކުރި 12 މީހުންނަށް ބަންދުގެ މައްދަތު ކްރިމިނަލް ކޯޓުން ޖަހައިފި އެވެ.

އެ މައްސަލައިގައި ހައްޔަރުކުރި 12 މީހުންގެ ވަނަވަރު ހާމަކޮށް ފުލުހުން ބުނީ އޭގެ ތެރެއިން ތިން މީހުންގެ ބަންދަށް ފަސް ދުވަސް އަދި ނުވަ މީހުންގެ ބަންދަށް ހަތް ދުވަސް ކޯޓުން ޖަހާފައިވާ ކަމަށެވެ.

ފުލުހުން ބުނީ ރަހީނުކޮށްފައިވާ މީހާ ސަލާމަތް ކުރެވުނީ އިނގިލި ބުރިކޮށްލަން އުޅެނިކޮށް ކަމަށާއި އޭނާގެ ބޯ ވެސް ހުރީ ކޮށާލާފައި ކަމަށެވެ.

ރަހީނުކުރި އެ މައްސަލަ ތަހުގީގު ކުރަމުންދާ ކަމަށް ފުލުހުން ބުންޏެވެ.

ހިޔާ ފްލެޓް ހިމެނޭ ސަރަހައްދުގައި ކުށް ކުރުން އިތުރުވެގެންްދާތީ ފުލުހުން ވަނީ އެ ސަރަހައްދުގައި ސެކިއުރިޓީ އިތުރުކޮށް، ފުލުހުން ވެސް އިތުރުކޮށްފަ އެވެ.

މީގެ ކުރިން ވެސް މާލޭގައި މީހަކު ރަހީނުކޮށް އިނގިލި ބުރިކޮށްލާފައިވެ އެވެ. އެ މައްސަލައާ ގުޅިގެން ވެސް ފުލުހުން ބަޔަކު ހައްޔަރުކޮށް، ތަހުގީގު ހިންގާފައިވެ އެވެ.