ދެން ބާއްވާ ރިޔާސީ އިންތިހާބެއްގައި ވެސް ވާދަ ކުރައްވާނެކަން ކުރީގެ ރައީސް އަބްދުﷲ ޔާމީން މިއަދު އިއުލާނު ކުރައްވައިފި އެވެ.

މީގެ ކުރިން ނޮވެމްބަރު، 2013، އިން ނޮވެމްބަރު، 2018، އާ ހަމައަށް ރާއްޖޭގައި ވެރިކަން ކުރެއްވި ޔާމީން ވިދާޅުވީ ރާއްޖެއަށް ދިމާވެފައިވާ ބައެއް މައްސަލަތައް ހައްލު ކުރެއްވުމަށްޓަކައި ގައުމަށް ހިދުމަތް ކުރެއްވުމުގެ ފުރުސަތެއް އަދިވެސް ބޭނުންވެވަޑައިގަންނަވާ ކަމަށެވެ.

"ޝައްކެއް ވެސް ނެތް. [އިންޓަވިއުގެ ހޯސްޓް] އާމިރު [ސަލީމް] އުފަލެއް ނުވޭތޯ އަޅުގަނޑު ކުރިމަތިލާތީ؟ އަޅުގަނޑު ކުރިމަތިލަނީ އަޅުގަނޑު ހަމަ ވެރިކަން ބޭނުން ވެގެނެއް ނޫން. އަޅުގަނޑު ކުރިމަތިލުމުގައި އޮތީ މައިގަނޑު ތިން ކަމެއް އެނގޭތޯ،" ޔާމީން ވިދާޅުވި އެވެ.

ވެރިކަމަށް ވަޑައިގަންނަވަންޖެހޭ ތިން ކަމެއް އެބަ އޮތް ކަމަށް ޔާމީން ވިދާޅުވި ނަމަވެސް އެމަނިކުފާނު ފާހަގަ ކުރެއްވީ ދެ ކަމެކެވެ. އޭގެ ތެރެއިން އެންމެ ބޮޑު ކަމަކީ ފޯޅަވަހި ކަނޑުގެ ސަރަހައްދުން ގެއްލުނު ބައި އަނބުރާ ރާއްޖެއަށް ހޯދުން ކަމަށް ޔާމީން ވިދާޅުވި އެވެ.

"އެންމެ ބޮޑު ކަމަކީ ފޯޅަވަހި ކަނޑުގެ ސަރަހައްދު ހޯދުމާ އަދި ހޯދޭ ކަމަށްވަންޏާ ފޯޅަވަހި ހޯދަން ކުރަންޖެހޭ ހުރިހާ މަސައްކަތެއް ކުރުން. މި ސަރުކާރަށް އެއް އަހަރު ވެގެންދިޔައީ އިޓްލޮސްގައި ނެތް ސިޓީއެއް، ކުރީގައި ނިންމާފައި އޮތް ނިންމުމަށް ތިމަންނަމެން އިހުތިޖާޖު ކުރަމޭ ކުރީގައި ނިންމަވާފައި އޮތް ނިންމުން އެ އޮތީ ރައީސުލްޖުމްހޫރިއްޔާ އަމިއްލަފުޅަށް ނިންމަވާފައޭ،" އެމަނިކުފާނު ވިދާޅުވި އެވެ.

ވެރިކަމަށް ވަޑައިގަންނަވަން ބޭނުންވެވަޑައިގަންނަވާ އަނެއް ކަމަކީ އިންޑިއާގެ މިލިޓަރީ ރާއްޖެއިން ބޭރު ކުރުން ކަމަށް ޔާމީން ވިދާޅުވި އެވެ. އަދި ވިދާޅުވީ އެމަނިކުފާނު ނޫން އެހެން ބޭފުޅަކު އެ ދެ މަސައްކަތް ކުރައްވާނެ ކަމަށް ގަބޫލު ނުކުރެއްވޭ ކަމަށެވެ.

"ދެން އޮތީ އިންޑިއާ އަސްކަރިއްޔާ މިތަނުން ބޭލުން. މި ދެ ކަންތައް ހައްލު ކުރުމަށްޓަކައި ވެސް އަޅުގަނޑު ބޭނުންވޭ ހިދުމަތުގެ ފުރުސަތެއް ލިބުން. އެއީ އަޅުގަނޑު ގަބޫލެއް ނުކުރަން ދެން ވަޑައިގަންނަވާ އެއްވެސް ބޭފުޅަކު މިކަންކަން ކުރައްވަފާނެކަމެއް. ހުރިހާ އެންމެންނަކީ ކޮމްޕްރޮމައިޒްޑް ބޭފުޅުން،" ޔާމީން ވިދާޅުވި އެވެ.

އެ އިންޓަވިއުގައި ވާހަކަ ދައްކަވަމުން ޔާމީން ވިދާޅުވީ އަދިވެސް އިންޑިއާގެ އަސްކަރިއްޔާ ރާއްޖޭގައި އެބަތިބި ކަމަށެވެ. އިންޑިއާގެ ސިފައިން ރާއްޖޭގައި ނެތް ކަމަށް ބުނެ ސަރުކާރުން ހަދަނީ ދޮގު ކަމަށް ވެސް އެމަނިކުފާނު ވިދާޅުވި އެވެ.

"ޔުނިފޯމުގައި ނެތިއްޔާ އިންޑިއާ މިލިޓަރީ ނެތީތޯ. ޔުނިފޯމް ނޫން އެހެން އެއްޗެއްގައި ތިބޭނެ ނޫންތޯ. ސަރުކާރުން މިކަހަލަ ބޮޑެތި ކަންކަމުގައި ދޮގު އެ ހަދަނީ. އަޅުގަނޑު މުތުލަގަށް މި ދަންނަވަނީ އެ ހަދަނީ ދޮގު. އިންޑިއާގެ އަސްކަރިއްޔާ މިތަނުގައި އެބަތިބި،" ކުރީގެ ރައީސް ވިދާޅުވި އެވެ.

މިދިޔަ އަހަރު ބޭއްވި ރިޔާސީ އިންތިހާބުގައި ޔާމީންއަށް ވާދަ ނުކުރެއްވުނީ ޖަލު ހުކުމެއްގައި ހުންނެވުމުން އިންތިހާބުގައި ވާދަ ކުރެއްވުމަށް ޝަރުތު ހަމަނުވާ ކަމަށް ސުޕްރީމް ކޯޓުން ކަނޑައެޅުމުންނެވެ. އޭގެ ފަހުން އިންތިހާބު ބޮއިކޮޓް ކުރަން އެދިވަޑައިގެންނެވި ކަމަށް ވެސް ޔާމީން މިއަދު ވިދާޅުވި އެވެ.

އެކަމަކު، ޕާޓީން ގޮތެއް ނިންމައި އެގޮތުގައި ކުރިއަށް ދިޔުމަށް ވިދާޅުވި ކަމަށް ވެސް ވެސް ޔާމީން މިއަދު ވިދާޅުވި އެވެ. އެއިރުގެ ރިޔާސީ އިންތިހާބުގައި ޔާމީން ވެސް ފަހުން ތާއީދު ކުރެއްވީ މިވަގުތުގެ ރަައީސުލްޖުމްހޫރިއްޔާ ޑރ. މުހައްމަދު މުއިއްޒަށެވެ. އެކަމަކު، ރައީސް މުއިއްޒަށް ތާއީދު ކުރެއްވުނީތީ މިހާރު "ރިގްރެޓް" ނުވަތަ ހިތާމަ ކުރައްވާ ކަމަށް ވެސް ޔާމީން މިއަދު ވިދާޅުވި އެވެ.