ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އެސޯސިއޭޝަން ކަޕުގެ ފިރިހެން ޑިިވިޝަނުގެ ފައިނަލުގައި ފަސް ސެޓު ކުޅެ، ދިވެހި ސިފައިންގެ މައްޗަށް ކުރިހޯދައި، ކްލަބް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފުރަތަމަ ފަހަރަށް އެސޯސިއޭޝަން ކަޕް ކާމިޔާބު ކޮށްފި އެވެ.

މި މުބާރާތުގެ ގްރޫޕް ސްޓޭޖުގައި މި ދެ ޓީމުގެ ކުރިމަތިލުމުން ކުރިހޯދީ ސިފައިންނެވެ. ފައިނަލެކޭ އެއްގޮތަށް އެ މެޗުގައި ވެސް ފަސް ސެޓު ކުޅެން ޖެހުނެވެ.

ޒުވާނުންގެ މަރުކަޒު އެތެރޭ ކޯޓުގައި މިރޭ ކުރިއަށްދިޔަ ފައިނަލް މެޗު އެޗްޑީސީން ކާމިޔާބުކުރީ 3-2 ސެޓުންނެވެ. މި މެޗުގެ ސެޓުތައް ދިޔައީ, 25-20, 29-31, 20-25, 25-17 އަދި 13-15 އިންނެވެ.

މި މެޗުގެ ފުރަތަމަ ސެޓުގައި, ސިފައިން ވަނީ މުޅި ސެޓު ކަހަލަ ގޮތަކަށް ޑޮމިނޭޓްކޮށް ލީޑުގައި އޮވެގެން ކުޅެފަ އެވެ. މި ސެޓުގައި ސިފައިންގެ ކްލަބްގެ އިތުބާރު ދެ ކުޅުންތެރިންކަމަށްވާ އާދަމް ނަސީމް (އެޑަމް) އަދި ހުސެއިން ރަޒާންގެ މޮޅު ކުޅުން ފެނިގެންދިޔައިރު, މި ސެޓު ސިފައިން ކާމިޔާބުކުރީ 25-20 އިންނެވެ.

މުޅި މެޗުގައި އެންމެ ވާދަވެރިކޮށް ފެނިގެންދިޔައީ މެޗުގެ ދެވަނަ ސެޓެވެ. މި ސެޓުގެ ފަހުކޮޅު ދެ ޓީމަށް ވެސް ސެޓު ނިންމަން ފުރުސަތުތަކެއް ލިބުނެވެ. އެކަމަކު، ފަހު ވަގުތު އެޗްޑީސީން ސެޓު ކާމިޔާބުކުރީ އެ ޓީމުގެ ތަޖުރިބާކާރު ކުޅުންތެރިންގެ ބޭނުން ހިފައެވެ.

އެ ގޮތުން މި ސެޓުގެ ފަހު ކޮޅު އެޗްޑީސީގެ އިސްމާއިލް ސާޖިދު (ކުޑަ ކާއްޓޭ) އާދަމް ފައިރޫޒް އަދި ބިދޭސީ ކުޅުންތެރިޔާ, ޒެހީންބެކްގެ މޮޅު ކުޅުމާއެކު މި ސެޓު އެޗްޑީސީން ކާމިޔާބުކުރީ 31-29 އިންނެވެ.

އެސޯސިއޭޝަން ކަޕް ފައިނަލުގައި ސިފައިން އާއި އެޗްޑީސީ ބައްދަލުކުރި މެޗުގެ ތެރެއިން - ފޮޓޯ: އަތޫފް އާތިފް / އަދަދު

ތިން ވަނަ ސެޓުގައި ސިފައިން ފެނިގެންދިޔައީ ދަށްކޮށެވެ. އޭގެ ފައިދާ ނަގާ އެޗްޑީސީން ވަނީ މި ސެޓު 20-25 އިން ކާމިޔާބު ކޮށްފަ އެވެ.

އެކަމަކު ހަތަރުވަނަ ސެޓުގައި ސިފައިންގެ އެޓޭކްތައް ރިސީވްކުރުމުގައި އެޗްޑީސީ އަށް އުނދަގޫތަކެއްވެ, މި ސެޓު އެ ޓީމަށް ގެއްލުނީ އެވެ. މި ސެޓު ސިފައިން ކާމިޔާބުކުރީ 25-17 އިންނެވެ.

ފަހު ސެޓު ފަށައިގެން ވާދަވެރި ކުޅުމެއް ފެނިގެންދިޔައިރު, މި ސެޓުގެ ފަހުކޮޅު އެޗްޑީސީގެ ތަފާތަކަށްވީ ކުޑަކާއްޓޭގެ ބާރު އެޓޭކުތަކެވެ. އެއާއެކު, އެޗްޑީސީން މި ސެޓު ގެންދިޔައީ, 15-13 އިންނެވެ.

ފައިނަލް މެޗުގެ މޮޅު ކުޅުންތެރިއާގެ މަގާމާއި މުބާރާތުގެ މޮޅު ކުޅުންތެރިއާގެ މަގާމު ހޯދީ ކުޑަކާއްޓެ އެވެ.

މުބާރާތުގެ ޑްރީމް ޓީމުގައި ހިމެނެނީ އެޗްޑީސީގެ މުހައްމަދު އަހުސަން، އާދަމް ފައިރޫޒް، އިސްމާއިލް ސާޖިދު (ކުޑަކާއްޓެ) އަދި ސައުދު އަހުމަދުގެ އިތުރުން، ސިފައިންގެ ހުސެއިން ޝާހިދު (ޝާޑު)، ހުސެއިން ރަޒާން އަދި އާދަމް ނަސީމް (އެޑަމް) އެވެ.

އެންމެ މޮޅު ކޯޗަކަށް އެޗްޑީސީގެ ހުސެއިން ޝަރީފް (ނަލަ ޝަރީފް) އެވެ. އެންމެ އުންމީދީ ކުޅުންތެރިއަކަށް ޕޮލިހުގެ ޝާމިލް މުހައްމަދު ހޮވުނުއިރު، އެންމެ މޮޅު ބިދޭސީ ކުޅުންތެރިއަކީ، އެޗްޑީސީގެ ޒަންޓިމީރް އެވެ.

އެޗްޑީސީން ފައިނަލަށް ދަތުރުކުރީ ތިން ވަނަ ސެމީ ފައިނަލުގައި ސިޓީ ސްޕޯޓްސް ކްލަބް ބަލިކޮށްގެންނެވެ. އެ މެޗު ސިޓީން ދޫކޮށްލީ، ދިވެހި ސިފައިންގެ ކްލަބުން ގަވާއިދާ ހިލާފަށް ދެ ކުޅުންތެރިން ކުޅުވި މައްސަަލަ، ސިޓީން އެސޯސިއޭޝަނަށް ހުށަހެޅުމުން، އިޖުރާއަތް ފުރިހަމަނުވާ ކަމަށް ބުނެ، އެ އަށް ޖަވާބު ނުދޭތީ އެވެ.