ސްޕެއިންގެ ވެލެންސިއާގައި ފެންބޮޑުވެ މަރުވި މީހުންގެ އަދަދު 211 އަށް އަރާފައިވާއިރު، އެތައް ބަޔަކު ގެއްލިގެން ހޯދުމުގެ މަސައްކަތް ކުރަމުންދާ ކަމަށް އެ ގައުމުގެ ކަމާބެހޭ ފަރާތްތަކުން ބުނެފި އެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވިދާޅުވީ ވެލެންސިއާގައި ފެންބޮޑުވުމުގެ ހާދިސާއާ ގުޅިގެން އިތުރު 5،000 ސިފައިންނާއި 5،000 ފުލުހުން ފޮނުވުމުގެ މަސައްކަތް ކުރަމުންދާ ކަމަށާއި ފެންބޮޑުވުމުގެ ހާދިސާގައި ގިނަ ބަޔަކު ގެއްލުމާ ގުޅިގެން ހޯދުމުގެ މަސައްކަތް ކުރަމުންދާ ކަމަށެވެ.

ހާދިިސާގައި ހާލުގައި ޖެހުނު ފަރާތްތަކަށް އެހީތެރިވެ، ވެލެންސިއާ އާންމު ހާލަތަކަށް ގެނައުމަށް ކަމާ ބެހޭ ފަރާތްތަކުގެ އިތުރުން އެތައް ހާސް ވޮލަންޓިއަރުންނެއް އަންނަނީ ހަރަކާތްތެރިވަމުންނެވެ.

މިދިޔަ ހަފްތާގައި ވެލެންސިއާގައި ފެންބޮޑުވުމުގެ ހާދިސާ ހިނގިއިރު ދުރާލައި އެއްވެސް އިންޒާރެއް ދީފައެއް ނުވެ އެވެ. އެއާއެކު ސްޕެއިންގެ ސަރުކާރަށް އަންނަނީ އެކަމާ ގުޅިގެން ފާޑު ކިޔުންތައް އަމާޒުވަމުންނެވެ.

ހާދިސާގައި އެކި ސަރަހައްދުތަކަށް ލިބުނު ގެއްލުންތަކާ ގުޅިގެން އެހީތެރިކަން ފޯރުކޮށްދިނުމަށް އަންނަނީ ބޮޑެތި ދަތިތައް ދިމާވަމުންނެވެ. މިގޮތުން، މަރުވި މީހުންގެ އަދަދު ބޮޑުތަނުން އިތުރުވެގެންދާނެ ކަމަށް ވަނީ ލަފާ ކޮށްފަ އެވެ.

މިއީ ފަހުގެ ތާރީހެއްގައި މުޅި ޔޫރަޕަށް ވެސް ދިމާވި ފެންބޮޑުވުމުގެ އެންމެ ބޮޑު އެއް ކާރިސާ އެވެ.