އޭއެފްސީ ޗެލެންޖް ލީގުގައި ގްރޫޕް ސްޓޭޖުގައި މާޒިޔާ ސްޕޯޓްސް އެންޑް ރެކްރިއޭޝަނުން ކުޅުނު ފަހު މެޗުން ކިރްގިސްތާންގެ އަބްދީޝް އަތުން ވެސް ބަލިވެއްޖެ އެވެ.

ކުވައިތު ސްޕޯޓްސް ކްލަބްގެ ދަނޑުގައި ކުޅުނު މި މެޗުން މާޒިޔާ ބަލިވީ 3-0 ގެ ނަތީޖާ އަކުންނެވެ. މި ނަތީޖާއާއެކު މި ގްރޫޕުން މި މުބާރާތުގެ ކުއާޓާ ފައިނަލުގެ ފުރުސަތު ހޯދީ، އަލް އަރަބި އާއި ތުރުކުމެނިސްތާން ޗެމްޕިއަން އަރްކަޑަގް އެވެ.

މިރޭގެ މެޗު ފަށައިގެން ނުވަ ވަނަ މިނިޓުގައި އަބްދީޝް ވަނީ ގޯލު ޖަހާ ލީޑު ނަގައިފަ އެވެ. މި ލަނޑު އެޓީމަށް ޖަހާދިނީ ކީރާތު ޒީރަލްބެކް އެވެ. މިއީ މާޒިޔާގެ އޭރިއާ ތެރެއަށް މުސަބޭކޮކް ނަގާދިން ހުރަހަކުން އޭނާ ކާމިޔާބުކުރި ގޯލެކެވެ.

މި ލަނޑަށް ފަހު މާޒިޔާ އިން ވަނީ ގޯލު ޖަހަން ރަނގަޅު ދެ ފުރުސަތެއް ތަނަވަސްކޮށްފަ އެވެ. ފުރަތަމަ ހާފު ނިމެން ފަސް މިނިޓަށްވެފައި ވަނިކޮށް މާޒިޔާގެ ހަމްޒާ މުހައްމަދު (ހަމްޕު) ދެ ކުޅުންތެރިން ކައިރިން ނައްޓާލުމަށް ފަހު ފޮނުވާލަން އުޅުނު ހަމަލާއެއްގައި އޭނާ ވަނީ ވެއްޓިފަ އެވެ. ހަމްޕު ވަނީ އަބްދީޝްގެ ކީޕަރު އޭނާ އަށް ފައުލު ކުރިކަމަށް ވަރަށް ބޮޑަށް އެޕީލްކޮށްފަ އެވެ.

އޭގެ ފަހުން މާޒިޔާގެ އަހުމަދު އައިހަމް (ފަތޯ) މުޅިން ހުސްކޮށްލާފައި އަލީ ފާސިރު (ސެންޓޭ) އަށް ދިން ޕާހެއް އޭނާ ފޮނުވާލިނަމަވެސް މި ހަމަލާ ވަނީ އަބްދީޝްގެ ޑިފެންޑަރު ބްލޮކްކޮށްފަ އެވެ.

އަބްދީޝްގެ ލީޑު ފުޅާ ކޮށްދިނީ މެޗުގެ 63 ވަނަ މިނެޓުގައި އަޓާއި ޖަހައިދިން ގޯލުންނެވެ. މިއީ މާޒިޔާގެ އޭރިއާ ތެރެއިން ޑިފެންޑަރު އޭރޯން އީވަންސް ކުރި ފައުލަކާ ގުޅިގެން ރެފްރީ ދިން ޕެނަލްޓީ އަކުން އަޓާއި ޖެހި ގޯލެކެވެ.

މެޗު ނިމެން 10 މިނެޓަށްވެފައި ވަނިކޮށް އަބްދޭޝް ގެ ތިންވަނަ ލަނޑު އެ ޓީމަށް ޖަހާދިނީ އެމައުލް ޔަގާ އެވެ.

އޭގެ ފަހުން މާޒިޔާގެ ހަސަން ރާއިފް (ހަންނަ) އަށް ވަނީ ފަރަގު ހަނިކުރަން ހުސް ފުރުސަތެއް ލިބި ބޭކާރުވެފަ އެވެ. އަބްދޭޝްގެ އޭރިއާތެރޭގައި މުޅިން ހުސްކޮށް ހުރެ, ހަންނަ ފޮނުވާލި ހަމަލާ އަމާޒުވީ ކީޕަރު އަތަށެވެ.