މޯލްޑިވްސް މީޑިއާ ކައުންސިލްގެ ރައީސްގެ މަގާމުގައި ހުންނެވި ޕަބްލިކް ސާވިސް މީޑިއާ (ޕީއެސްއެމް)ގެ އަހުމަދު މުސްތަފާ އެ ކުންފުނިން ވަކިކޮށްފި އެވެ.

މިކަމާ ގުޅިގެން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު ޔާމީން ރަޝީދުއާ ސުވާލު ކުރުމުން ސީދާ ޖަވާބެއް ދެއްވުމުގެ ބަދަލުގައި ވިދާޅުވީ ޒިންމާދާރު މަގާމެއްގައި ހުރި މުވައްޒަފަކާމެދު ފިޔަވަޅު އަޅަން މިއަދު ނިންމާފައިވާ ކަމަށެވެ.

އެ ނިންމުން ނިންމީ ޕީއެސްއެމްގެ ބޯޑުންނެވެ.

ޔާމީން ވިދާޅުވީ އެކަމާ ގުޅޭ ބަޔާނެއް ނެރޭނެ ކަމަށެވެ. ނަމަވެސް މުސްތަފާ ވަކިކުރިކަން ދޮގެއް ނުކުރައްވަ އެވެ.

ޕީއެސްއެމްއިން ނެރުނު ބަޔާނުގައި މުސްތަފާ ވަކިކުރިކަން ބަޔާންކޮށްފައި ނެތެވެ.

އެ ބަޔާނުގައި ބުނެފައި ވަނީ ޕީއެސްއެމްއަށް ކުރިން އެންގުމެއް ނެތި މީޑިއާ ކައުންސިލްގެ އިނާމު ދިނުމަށް ރޭ ބޭއްވި ހަފުލާގައި ކުއްލިއަކަށް ޕީއެސްއެމްގެ އެޑިޓޯރިއަލް ސިޔާސަތަށް ނުފެތޭ ވީޑިއޯ ދެއްކުމަކީ ގަސްތުގައި ދުރާލާ ރާވައިގެން މޯލްޑިވްސް މީޑިއާ ކައުންސިލް ކޮށްފައިވާ ކެމެއް ކަމަށް ދެކޭ ކަމަށެވެ.

އެ މައްސަލަ ރައްޔިތުންގެ މަޖިލީހުގެ އިދާރާއަށް ހުށަހަޅާފައިވާ ކަމަށް ބަޔާނުގައި ބުނެފައިވެ އެވެ.

ޕީއެސްއެމްގެ ބަޔާނުގައި އެ ބުނާ ވީޑިއޯއަކީ ރޭ އެވޯޑު ލިބުނު އަދަދު ނޫހުން ހެދި "ސްކީލާން" ޑޮއިކުމެންޓަރީއާ ބެހޭ ގޮތުން ދެއްކި ވީޑިއޯ ކްލިޕެވެ.

ޕީއެސްއެމްގެ ނިއުސް އޮފަރޭޝަން މެނޭޖަރުގެ މަގާމުގައި ހުންނެވި މުސްތަފާ އެ ކުންފުނީގައި ވަޒީފާ އަދާކުރައްވާތާ 30 އަހަރަށް ވުރެ ގިނަ ދުވަސް ވެފައިވާއިރު، ކުއްލި އަކަށް ވަޒީފާއިން ވަކިކުރަން ނިންމީ ސްކީލާންގެ ވީޑިއޯ ދެއްކި މައްސަަލައިގައި ކަމަށްވެ އެވެ.

ސްކީލާން ޑޮކިއުމެންޓަރީއަކީ ރައީސް ޑރ. މުހައްމަދު މުއިއްޒުގެ ދޮންމަންމަ، ސްރީ ލަންކާގެ ރައްޔިތެއް ކަމުގައިވާ ޖީ ސްކީލާން، ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒަށް ކުރާ ތުހުމަތުތަކުގެ މައްޗަށް ސެޕްޓެމްބަރު 2023 ގައި ތައްޔާރުކުރި ޑޮކިއުމެންޓަރީ އެކެވެ.

ރޭ ބޭއްވި އެމްއެމްސީގެ އެވޯޑު ނައިޓުގައި ސްކީލާން ޑޮކިއުމެންޓަރީ އަށް އެވޯޑު ލިބުނީ ތަހުގީގީ ނޫސްވެރިކަމުގެ ވީޑިއޯ ބައިންނެވެ.

ސްކީލާންއާ ގުޅޭ ބައެއް ލިޔުންތައް