ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންގެ މެދުގައި ކުރިއަށް ގެންދިޔަ ގުރުނެގުމާ ގުޅިގެން ގޯތި ލިބުނު ބައެއް މީހުން ޝަކުވާކޮށްފައި ވަނިކޮށް، ގުރު ނެގި ގޮތާ ގުޅޭ ގޮތުން އެއްވެސް ޝަކުވާއެއް އޮތްނަމަ ހުށަހެޅުމުގެ ފުރުސަތު މިއަދު ހުޅުވާލައިފި އެވެ.

ހައުސިން މިނިސްޓަރީން މިއަދު ގެޒެޓުކުރި އިއުލާނުގައި ބުނީ ޝަކުވާ ހުށަހެޅުމުގެ ފުރުސަތު މިއަދުން ފެށިގެން ނޮވެމްބަރު 7، ގެ މެންދުރުފަހު 2:00 އާ ހަމައަށް ހުޅުވާލާފައިވާ ކަމަށެވެ. ޝަކުވާ ހުށަހެޅޭނީ އެ މިނިސްޓަރީގެ ހިޔާވަހި ޕޯޓަލް މެދުވެރިކޮށެވެ. މިއަދުގެ ކުރި އިއުލާނާ އެކު ގުރުއަތުން ލިބުނު ޕްލޮޓު ނަންބަރުތަކާއި ފޯމު ނަންބަރުތައް ހިމެނޭ ލިސްޓެއް އާންމުކޮށްފައިވެ އެވެ.

ގުޅީފަޅުން ގޯތި ލިބުނު މީހުންނަށް އާ ޕްލޮޓްތައް ބަހަން ގުރުނެގުން ކުރިއަށް ގެންދިޔައީ މިދިޔަ އަންގާރަ ދުވަހުގެ ހެނދުނު 9:00 އިން ފެށިގެން ދަރުބާރުގޭގަ އެވެ. އެދުވަހު ގުރު ނެގުން ކުރިއަށް ގެންދިޔައީ ހައުސިން މިނިސްޓަރީގެ މުވައްޒަފުންނެވެ. އެކަމާ ގުޅިގެން ގޯތި ލިބުނު މީހުންގެ ޝަކުވާތަކެއް ވެސް އެދުވަހު ވެސް ހުއްޓެވެ.

ގުޅީފަޅާއި ގިރާވަރުފަޅުން ގޯތި ލިބުނު މީހުންގެ މެދުގައި އަލުން ގުރުއަތު ނަގަން ޖެހުނީ މިދިޔަ ސަރުކާރުން ފާސްކުރި ލޭންޑް ޔޫސް ޕްލޭންގެ ބަދަލުގައި އާ ޕްލޭންތަކެއް މި ސަރުކާރުން ފާސްކޮށް އާންމު ކުރުމުންނެވެ.

މި ސަރުކާރުން ފާސްކޮށް މި ހިނގާ އޮކްޓޯބަރު 16، ގައި އާންމުކުރި ލޭންޑް ޔޫސް ޕްލޭންތަކުގައި ކުޅިވަރު ކުޅެން ހާއްސަ ސަރަހައްދުތަކާއި މުނިސިޕަލް ހިދުމަތްތައް ދޭ ސަރަހައްދުތަކާއި ޓޫރިޒަމަށް ހާއްސަ ކޮށްފައިވާ ސަރަހައްދުތަކުގެ އިތުރުން އިންޑަސްޓްރިއަލް މަސައްކަތްތަކަށް ހާއްސަ ސަރަހައްދުތަކަށް އިތުރު ބިންތައް ކަނޑައަޅައިފަ އެެވެ.

އޭގެފަހުން ގުރުނެގުމަށް އެންމެ ދުވަހަކަށްވެފައި އޮއްވައި އޮކްޓޫބަރު 28، ގައި އަނެއްކާ ވެސް ހައުސިން މިނިސްޓަރީން ލޭންޑް ޔޫސް ޕްލޭނަށް ބަދަލުގެނެސްފައި ވެ އެވެ.

އަލަށް އެކުލަވާލި ޕްލޭނުގެ ދަށުން ގުޅީފަޅުގެ ބޮޑު ސަރަހައްދެއް ވަނީ އިންޑަސްޓްރިއަލް ޒޯނެއްގެ ގޮތުގައި ކަނޑައަޅާފަ އެވެ. ކުރީ ޕްލޭނުގައި އެ ސަރަހައްދުގައި 84 ގޯތި އޮތެވެ.