މަސައްކަތްތެރިންގެ ޖަމިއްޔާތައް އުފެއްދުމާއި އެފަދަ ޖަމިއްޔާތަކުން ހިންގާ ހަރަކާތްތަކުގައި ބައިވެރިވުމުގެ ހައްގު ކަށަވަރުކޮށްދިނުމުގެ މަގުސަދުގައި އެކުލަވާލި އިންޑަސްޓްރިއަލް ރިލޭޝަންސް ބިލުގެ ދަށުން ރަޖިސްޓްރީ ކުރި ފުރަތަމަ ޔޫނިއަނަކަށް ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) ވެއްޖެ އެވެ.

ލޭބާ މިނިސްޓްރީން އިއްޔެ ވަނީ ޓީމްއަށް ޔޫނިއަންގެ ރެޖިސްޓްރޭޝަން ރަސްމީކޮށް ހަވާލުކޮށްފަ އެވެ. ޓީމްގެ ފަރާތުން ރަޖިސްޓްރޭޝަނާ ހަވާލުވީ ޖެނެރަލް ސެކްރެޓަރީ މައުރޫފް ޒާކިރު އެވެ.

"ރާއްޖޭގެ މަސައްކަތްތެރިންގެ މޫވްމަންޓަށް ތާރީހީ ދުވަހެއް. އިންޑަސްޓްރިއަލް ރިލޭޝަންސް ގާނޫނުގެ ދަށުން ފުރަތަމަ ޔޫނިއަން މިވަނީ ރަޖިސްޓްރީ ކުރެވިފައި. މި ކާމިޔާބީގެ ސަބަބުން ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުގެ އަޑު އެންމެން ގުޅިގެން ވަރުގަދަކޮށް، މަސައްކަތްތެރިންގެ ޙައްޤުތަކާއި އިންސާފުވެރި މުޖުތަމައުއަކަށް މުސްތަގުބަލުގައި މަގު ފަހިވެގެންދާނެ," ޓީމް އިން ބުނެފައިވެ އެވެ.

ޓީމްއަކީ ޔޫނިއަނެއްގެ ގޮތުގައި ރަސްމީކޮށް ރަޖިސްޓްރީ ކުރުމުގެ ކުރިން ވެސް ރާއްޖޭގެ ގާނޫނުތަކުން ލިބިފައިވާ ޖާގައިގެ ތެރެއިން ޓޫރިޒަމް ސިނާއަތުގައި މަސައްކަތް ކުރާ މަސައްކަތްތެރިންގެ ހައްގުތައް ހޯދައި ރައްކާތެރިކުރުމަށް ގިނަ މަސައްކަތްތަކެއް ކުރި ޖަމިއްޔާއެކެވެ. މަސައްކަތްތެރިންގެ ޔޫނިއަންއެއް ރަޖިސްޓްރީ ކުރަން މަދުވެގެން ހަތް މީހެއްގެ ސޮއި ބޭނުންވެ އެވެ.

މަސައްކަތްތެރިންގެ ޖަމިއްޔާތައް އުފެއްދުމާއި ބައިވެރިވުމާއި ހިންގުމަކީ ގާނޫނު އަސާސީން ކަށަވަރުކޮށްދިން ހައްގެކެވެ. ނަމަވެސް ޑިސެމްބަރު 18, 2023 ގައި މަޖިލީހުން އިންޑަސްޓްރިއަލް ރިލޭޝަންސް ބިލު ފާސްކުރުމާ ހަމައަށް ގާނޫނީ ބާރުވެރިކަން މަސައްކަތްތެރިންގެ ޔޫނިއަންތަކަށް ލިބޭނެ ގޮތެއް ނޯވެ އެވެ.