ފައިނަލުގައި މުބާރާތް ބޭއްވި ގައުމު ކަމަށްވާ ނޭޕާލްގެ މައްޗަށް 2-1 އިން ކުރިހޯދައި، ބަންގްލަދޭޝް އިން ވަނީ ސާފް ވިމެންސް ޗެމްޕިއަންޝިޕްގެ ދިފާއުކޮށްފި އެވެ.

ސާފް ވިމެންސް ޗެމްޕިއަންޝިޕް ހަތް ފަހަރު ބޭއްވިއިރު، ފުރަތަަމަ ފަސް ފަހަރު ތަށި ހޯދީ އިންޑިއާ އިންނެވެ. ބަންގްލަދޭޝް އިން ދެ ފަހަރު ވެސް ތަށި ހޯދީ ފައިނަލުގައި ނޭޕާލްގެ މައްޗަށް ކުރިހޯދައިގެންނެވެ. އެ ގޮތުން، މީގެ ދެ އަހަރު ކުރިން، ކަތުމަންޑޫގައި ކުޅުނު ފައިނަލުގައި ނޭޕާލް އަތުން ބަންގްލަދޭޝް މޮޅުވީ 3-1 އިންނެވެ.

ނޭޕާލުގެ ދަސަރަތު ސްޓޭޑިއަމްގައި ކުޅުނު މި މެޗުގެ 52 ވަނަ މިިނިޓްގައި މޮނިކާ ޗަކްމާގެ ގޯލުން ބަންގްލަދޭޝް ލީޑުނެގިތާ ހަތަރު މިނިޓް ފަހުން ނޭޕާލަށް އެއްވަރުކޮށްދިނީ އަމީޝާ ކާކީ އެވެ. ބަންގްލަދޭޝް މޮޅުވި ލަނޑު ޖެހީ މެޗުގެ 81 ވަނަ މިނިޓްގައި ރިތޫ ޕޯރްނާ އެވެ. އޭނާ އަކީ މުުބާރާތުގެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިޔާ އަށް ދޭ ރަން ބޫޓު ހާސިލްކުރި ކުޅުންތެރިޔާ އެވެ.

ބަންގްލަދޭޝް އަތުން ސެމީ ފައިނަލުގައި 7-1 އިން ބަލިވި ބޫޓާން އަކީ މުބާރާތުގެ ފެއާ ޕްލޭ ޓީމެވެ. ނޭޕާލުން ވަނީ ސެމީ ފައިނަލުގައި މައްސަލަ ބޮޑުވި މެޗުން ޕެނަލްޓީ ޖަހައިގެން އިންޑިއާ ބަލިކޮށްފަ އެވެ.

މި ފަހަރުގެ މުބާރާތުގެ ގްރޫޕް ސްޓޭޖުން ރާއްޖެ ކެޓިއިރު، ކުޅުނު ތިން މެޗުން ވީ ބައްޔެވެ. ފުރަތަމަ މެޗުގައި ލަންކާ އަތުން 1-0 އިން ބަލިވިއިރު، ދެ ވަނަ މެޗުގައި ނޭޕާލް އަތުން 11-0 އިން އަދި ތިން ވަނަ މެޗުގައި ބޫޓާން އަތުން 13-0 އިން ބަލިވި އެވެ. ރާއްޖޭގައި އަންހެން ފުޓްބޯޅަ މުބާރާތެއް ނުބާއްވާތާ 10 އަހަރުވެފައިވާއިރު، ބައިނަލްއަގުވާމީ މުބާރާތްތަކަށްދާއިރު، ދިމާވަނީ ޑޮމެސްޓިކް މެޗުތައް ނުލިބޭ މައްސަލަ އެވެ.