އިސްލާހީ ހަރަކާތްތެރީން ދަލާއި ލޭ އޮހޮރުވައިގެން ހޯދި ޑިމޮކްރަސީ އާއި ހައްގުތަކާއި މިިނިވަންކަން ގެއްލޭ ގޮތަށް ބައެއް ގާނޫނުތަކަށް ބަދަލު ގެންނަން ރައީސް ޑރ. މުހައްމަދު މުއިއްޒު ހުށަހެޅުއްވުމުން އެކަމާ ދެކޮޅަށް އަޑު އުފުލަން، އެމްޑީޕީން އިންތިޒާމުކޮށްގެން މާދަމާ ހެނދުނު ރައްޔިތުންގެ މަޖިލީހުގެ އިދާރާ ކައިރީގައި މުޒާހަރާ ކުރަން ނިންމައިފި އެވެ.

އެ ޕާޓީން މުޒާހަރާކުރަން ނިންމައި އިއުލާނު ކުރީ އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ) ގެ މައްޗަށް ރައީސުލްޖުމްހޫރިއްޔާއަށް ނުފޫޒު ފޯރުވޭ ގޮތަށް, އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު މުށުތެރޭގައި ބޭއްވުމަށް ގާނޫނުތައް އިސްލާހު ކުރާތީ އެވެ.

އެކަންބޮޑުވުން ގިނަ ބަޔަކު ފާޅުކުރަމުން ދިޔުމާއި އެމްޑީޕީގެ މުޒާހަރާ މާދަމާ ހެނދުނު 9:30 ގައި މަޖިލީސް ކައިރީގައި އޮންނާނެކަން އިއުލާނު ކުރުމާއެކު، ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިހާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ މިއަދާ ހަމަޔަށްވެސް ކުރިކަމެއް ނޫން އަދި ކުރިޔަށް އޮތް ތާނގައިވެސް ކުރާނޭކަމެއް ނޫން ކަމަށެވެ.

މި މައްސަލައިގައި ސިޔާސީން ދަނީ މުއިއްޒަށް ވަރަށް ބޮޑަށް ފާޑުކިޔަމުންނެވެ.

މަދާމާގެ މުޒާހަރާގައި އެމްޑީޕީގެ ލީޑަޝިޕްގެ ވެރިން ބައިވެރިވާނެ ކަމަށްވެ އެވެ.

އީސީ ގާނޫނާއި އޭސީސީގެ ގާނޫނު އިސްލާހު ކުރަނީ ހުދުމުހުތާރު ވެރިކަމެއް ގާއިމުކުރަން ކަމަށް ބައެއް ފަރާތްތަކުން ދަނީ ބުނަމުންނެވެ.

މާދަމާ ހެނދުނު ބާއްވާ މުޒާހަރާ އަކީ، މިދިޔަ އަހަރު ނޮވެމްބަރުގައި ވެރިކަން ބަދަލުވެ، އެމްޑީޕީ އިދިކޮޅު ޕާޓީއަކަށް ވި ފަހުން އެ ޕާޓީން އިންތިޒާމުކޮށްގެން ބާއްވާ ފުރަތަމަ މުޒާހަރާ އެވެ.