ކޫއްޑޫ އެއާޕޯޓުގެ ރަންވޭއަށް ފްލައިޓު ޖެއްސޭ ވަރަށް މަރާމާތުކޮށް ނިމުމުން، ގައުމީ އެއާލައިން މޯލްޑިވިއަންއިން އެތަނަށް ކުރާ ދަތުރުތައް އަލުން ފަށައިފި އެވެ.

މޯލްޑިވިއަންގެ ކޯޕަރޭޓް ސޭލްސް މުހައްމަދު ނަސީރު "އަދަދު" އަށް ވިދާޅުވީ ކޫއްޑޫއަށް އަލުން ކުރާ ދަތުރުތައް ފަށާފައިވާ ކަމަށާއި ދުވާލަކު ދެ ފްލައިޓް އަޅާނެ ކަމަށެވެ.

"ރަންވޭ ރަނގަޅު ކުރުމުން އަލުން ދަތުރުތައް ވަނީ ފަށާފައި. ދުވާލަކު ދެ ފްލައިޓް މިހާރު އަޅާނެ. ތަރުހީބަށް ބެލުމަށްފަހު ފްލައިޓްތައް އިތުރު ކުރަމުންދާނެ،" ނަސީރު ވިދާޅުވި އެވެ.

އޮކްޓޯބަރު، 12 ގައި މޯލްޑިވިއަންއިން ކޫއްޑޫއަށް ކުރާ ދަތުރުތައް ހުއްޓާލީ އެއާޕޯޓުގެ ރަންވޭގެ ފެންވަރު ދަށްވެ، މޯލްޑިވިއަންގެ ދެ ބޯޓެއް ގްރައުންޑުވުމާ ގުޅިގެންނެވެ. ކޫއްޑޫ އެއާޕޯޓު އޮޕަރޭޓް ކުރަމުންދަނީ މާކިއޯ މޯލްޑިވްސް ކޫއްޑޫ ރިސޯޓުންނެވެ.

"އަދަދު" އަށް އެނގިފައިވާ ގޮތުގައި އެއާޕޯޓް އަލުން އޮޕަރޭޝަނަށް ގެނެސްފައި ވަނީ ރަންވޭ މަރާމާތުކޮށް އެއްކޮށް ނުނިމެނީހެވެ. އެގޮތުން ރަންވޭ މަރާމާތު ކުރުމުގެ ބައެއް މަސައްކަތްތައް އަދިވެސް ދަނީ ކުރަމުންނެވެ.

އެއާޕޯޓުތަކުގެ ސޭފްޓީ އުސޫލު އޮންނަ ގޮތުން ރަންވޭގެ ފެންވަރު ދަށްވެ ނުވަތަ އެއާޕޯޓުގައި ހުންނަން ޖެހޭ ފެސިލިޓީތައް ނެތްނަމަ ފްލައިޓް އެޅުމަކީ މަނާ ކަމެކެވެ.

"ރަންވޭގެ މަސައްކަތް އެއްކޮށް ނުނިމޭ. ބައެއް މަސައްކަތްތައް އަދިވެސް ކުރިއަށް އެބަދޭ. ފްލައިޓް ޖެއްސޭ ވަރަށް ނިމުމުން އޮޕަރޭޝަނަށް ގެނައީ،" އެކަން އެނގޭ މީހަކު ބުންޏެވެ.

ކޫއްޑޫ އެއާޕޯޓު ބަންދު ކުރުމާ ގުޅިގެން ގއ. އަތޮޅުގެ ރައްޔިތުން ދަތުރު ކުރަމުންދިޔައީ މާވަރުލު އެއާޕޯޓާއި، ފަރެސްމާތޮޑާ އެއާޕޯޓުގެ އިތުރުން ކާޑެއްދޫ އެއާޕޯޓުންނެވެ.