މީގެ 12 އަހަރު ކުރިން، 2012 ގައި ހުޅުވި ކޫއްޑޫ އެއާޕޯޓަކީ ގއ. އަތޮޅުގެ ރައްޔިތުންގެ ދަތުރުފަތުރަށް ލިބިގެންދިޔަ ފަސޭހައެކެވެ. ބާރަ އަހަރަށް ފަހު ކުއްލި ގޮތަކަށް، އޮކްޓޯބަރު 12 އިން ފެށިގެން މޯލްޑިވިއަންގެ ދަތުރުތައް އެ އެއާޕޯޓަށް ވަނީ ހުއްޓާލައިފަ އެވެ. ސަބަބަކީ ރަންވޭ ހަލާކުވެ، ބޯޓުތަކަށް ގެއްލުން ލިބެމުން ދިޔުން ކަމަށް އައިލެންޑް އޭވިއޭޝަނުން ބުނެ އެވެ.

މާސިންގާ ހުވަދު އަތޮޅުގައި އޮތީ ހަތަރު އެއާޕޯޓެވެ. އެއީ ގދ. އަތޮޅުގައި އޮންނަ މާވަރުލު އެއާޕޯޓާއި، ކާޑެއްދޫ އެއާޕޯޓު އަދި ފަރެސްމާތޮޑާ އެއާޕޯޓުގެ އިތުރުން ގއ. އަތޮޅުގައި އޮންނަ ހަމަ އެކަނި އެއާޕޯޓް ކަމަށްވާ ކޫއްޑޫ އެއާޕޯޓެވެ.

ކުއްލިއަކަށް ކޫއްޑޫ އެއާޕޯޓު ބަންދު ކުރުމުން ޒަރޫރީ ބޭނުމަށް މާލެއަށް ދާން ނުވަތަ މާލެއިން ގއ. އަތޮޅުގެ ރަށަކަށް އަންނަ ބޭނުންވި ނަމަވެސް، ކުރަން ޖެހޭ ހޭދަ އެތައް ގުނައެއް މިހާރު ވަނީ ބޮޑުވެފަ އެވެ. ގއ. އަތޮޅުގައި ހުރި ގެސްޓްހައުސްތަކާއި ރިސޯޓުތަކަށް ޓޫރިސްޓުން ގެންނަން ކުރަންޖެހޭ ހޭދަ އާއި ތަކުލީފު ވެސް ބޮޑެވެ.

ގއ. އަތޮޅުގެ ގިނަ ރަށްތަކުން ކޫއްޑޫ އަށް 350ރ އަށް ދަތުރު ކުރި ނަމަވަސް، ގދ. އަތޮޅުގެ އެއާޕޯޓުތަކަށް ދާން 6،000ރ. އާއި 9،000ރ. އަގެއް ނަގަ އެވެ.

"ވިލިނގިލި މީހުން މާވަރުލު އެއާޕޯޓަށް ދާން ދަތުރު ނަގަނީ 9،000ރ. އަށް. ކާޑެއްދޫއަށް ދަނީ 7،000ރ. އާއި 8،000ރ. އަށް. މީގެ ކުރިން ކޫއްޑޫއަކީ އެވްރެޖުކޮށް ހަތް ފްލައިޓު މަދުވެގެން ޖައްސާ ތަނެއް. އެތަން ބަންދުކުރީމަ ވިސްނާލާ ގއ. އަތޮޅުގެ ރައްޔިތުންނަށް ވާނެ އުނދަގޫ،" އޭނާ ބުންޏެވެ.

ބައެއް މީހުން އާރްޓީއެލް ފެރީން އެއާޕޯޓަށް ދިޔަ ނަމަވެސް، ޖާގަ ލިބުން އެހާ ދައްޗެވެ. އަދި ދަތުރު ވެސް ދިގެވެ.

"އަހަރެން މިދިޔަ ހަފުތާގައި ރަށަށް ދާންވެގެން މާލެއިން ކާޑެއްދު އަށް ދިޔައީ. ކާޑެއްދޫން އާރުޓީއެލް ނަގައިގެން ގދ. އަތޮޅުގެ ބައެއް ރަށްތަކުގައި ޖައްސާފައި ވިލިނގިއްޔަށް ދާއިރު ގާތްގަނޑަކަށް މުޅި ދުވަސް އޮންނަނީ ގޮސްފައި،" ގއ. މާމެންދު މީހަކު ބުންޏެވެ.

ފްލައިޓުން ޖާގަ ހޯދައިގެން އެއާޕޯޓު އޮންނަ ރަށުގައި އެއް ދުވަސް މަޑު ކުރަން ޖެހޭ ހާލަތު ވެސް އަންނަ ކަމާއި އޭގެ ސަބަބުން މާލެ ދާން ކުރަން ޖެހޭ ހަރަދު ޓިކެޓާއެކު ޖުމްލަ 12،000ރ. އަށް ވެސް އަރައިގެންދާ ބައެއް މީހުން ބުންޏެވެ.

މާމެންދޫ ކައުންސިލް މެންބަރު އަޝްރަފު އަލީ "އަދަދު" ނޫހަށް އަށް ވިދާޅުވީ އެއާޕޯޓު ބަންދު ކުރުމުން ބައެއް މީހުން މާލޭގައި ތާށިވި ކަމަށާއި އެންމެންނަކީ ލޯންޗަށް ބޮޑު އަގު ދީފައި ރަށަށް ފުރައިގެން ދެވޭނެ ފެންވަރު ހުރި މީހުން ނޫން ކަމަށެވެ.

"އެންމެންގެ ނުހުންނާނެ ފެންވަރެއް ގދ. އަތޮޅަށް ގޮސް ލޯންޗެއް ހިފައިގެން މާމެންދޫއަށް ދާކަށް. މަދުވެގެން 5،000ރ. ހަރަދުވާނެ. ކޫއްޑޫއަށް ދަތުރު ކުރަމުންދިޔައީ ދުވާލު 350ރ. އަށް އަދި ރޭގަނޑު 500ރ. އަށް. އެހެންވީމަ ރައްޔިތުން މިއޮތީ ވަރަށް ބޮޑު ހޭދައެއް ކުރަން ޖެހިފައި މިހާރު،" އަޝްރަފު ވިދާޅުވި އެވެ.

ގއ. އަތޮޅުގެ ގެސްޓު ހައުސްތަކުގެ އަގުތައް ހުރީ ކޫއްޑޫ އެއާޕޯޓުން ޓޫރިސްޓުން ގެންނަންޖެހޭ ނުވަތަ ފުރުވަންޖެހޭ ހަރަދަށް ބަލައިގެންނެވެ. ނަމަވެސް އެ އެއާޕޯޓު ބަންދުކުރުމުން ގެސްޓުހައުސްތަކަށް އަދި ރިސޯޓުތަކަށް ޓޫރިސްޓުން ގެނައުމާއި ފުރުވަން ކުރަންޖެހޭ ހޭދަ ބޮޑުވެ، ވިޔަފާރީގެ ފައިދާ ވަނީ ވަރަށް ބޮޑަށް ދަށަށް ގޮސްފައި ކަމަށް މި ނޫހާ ވާހަކަ ދެއްކި ބައެއް ވިޔަފާރިވެރިން ބުންޏެވެ.

ކުރިއަށް އޮތީ ގިނައިން ޓޫރިސްޓުން އަންނަ މޫސުމެވެ. ނަމަވެސް ކޫއްޑޫ އެއާޕޯޓު ރަނގަޅު ނުވުމަކީ ގއ. އަތޮޅުގެ ވިޔަފާރިވެރިންނަށް ވެސް ލިބޭނެ ބޮޑު ދެރައެކެވެ.

ކޫއްޑޫ އެއާޕޯޓު ހުޅުވާނެ ދުވަހެއް ނޭނގޭ

ކޫއްޑޫ އެއާޕޯޓް ތަރައްގީ ކުރީ ދިގުރަށް ކިޔާ ފަޅު ރަށެއްގައި ރިސޯޓެއް ތަރައްގީ ކުރުމަށް 50 އަހަރަށް ބޮނަވެއްޗާ މޯލްޑިވްސްއާ ހަވާލު ކޮށްގެންނެވެ. އެ އެއާޕޯޓު ތަރައްގީކޮށް އޮޕަރޭޓް ކުރަން އޭރު 25 އަހަރަށް ހަވާލުކުރީ ސިންގަޕޫރުގެ ކިއޮން ހޮންގް ކޮންސްޓްރަކްޝަނާއި އެލިސަން ކޮންސްޓްރަކްޝަން ކުންފުނީގެ ވެންޗާއެއް ކަމަށްވާ އޭއެޗްއޭ ކޮންސްޓްރަކްޝަންއާ އެވެ.

ކޫއްޑޫ އެއާޕޯޓް މިހާރު އޮޕަރޭޓް ކުރަމުންދަނީ ޕްރިސްޓަން އައިލެންޑް އިންވެސްޓްމަންޓުންނެވެ. އެއާޕޯޓް ހިންގާ ގޮތަށް، އެ ކުންފުންޏަށް ޕުލްމޫން މާމުޓާ ރިސޯޓުގެ އިތުރުން މާކިއޯ މޯލްޑިވްސް ކޫއްޑޫ ރިސޯޓު ދީފައިވެ އެވެ. އެ ދެ ރިސޯޓު ބަރާބަރަށް އޮޕަރޭޓްކުރާއިރު ކޫއްޑޫ އެއާޕޯޓު ތަރައްގީ ނުކޮށް ހަލާކުވާން ދޫކޮށްލާފައި އޮތުމަކީ އާންމުންގެ މެދުގައި އޮތް ބޮޑު ޝަކުވާއެކެވެ.

ކޫއްޑޫ އެއާޕޯޓު ތަރައްގީ ކުރުމަށްފަހު އެންމެ ފަހުން އެ އެއާޕޯޓު އިތުރަށް ތަރައްގީކުރީ 2017 ގައެވެ. އެފަހަރު ރައީސް އަބްދުﷲ ޔާމީންގެ ސަރުކާރުގައި އެއާޕޯޓު ތަރައްގީ ކުރީ ކުރިން އޮތް 1،200 މީޓަރުގެ ދިގު ރަންވޭ 1،800 މީޓަރަށް ދިގު ކުރުމަށެވެ. އޭގެއިތުރުން އެއާޕޯޓުގައި އާ ވީއައިޕީ ލައުންޖަކާއި، މުވައްޒަފުންގެ ދެ އެކޮމޮޑޭޝަން ބްލޮކް ވެސް ތަރައްގީ ކުރި އެވެ.

އެ ބަދަލާ އެކު އެއާޕޯޓަށް ކެޓަގަރީ 2 ސީގެ އެއާޕޯޓަކުން ކެޓަގަރީ 3 ސީ ގެ އެއާޕޯޓަކަށް ބަދަލުވެގެން ދިޔަ އެވެ. ނަމަވެސް އޭގެ ފަހުން އެއާޕޯޓަށް އެއްވެސް ތަރައްގީއެއް އައިސްފައި ނުވެ އެވެ. އެއާޕޯޓް އޮތީ ވީރާނާވާން ދޫކޮށްލާފައެއް ބުނުމުން ދޮގޮކަށް ނުވާނެ އެވެ. އެއާޕޯޓުގެ ރަންވޭ ހަލާކުވުމުގެ ސަބަބުން ވަރަށް ފަހުން މޯލްޑިވިއަންގެ ދެ ބޯޓެއް ހަލާކުވި އެވެ.

"މޯލްޑިވިއަން އިން ކޫއްޑޫއަށް ދަތުރުތައް ހުއްޓާލަން ނިންމީ ދިގުމުއްދަތެއްގައި އެއަރޕޯރޓް މެއިންޓެއިން ނުކުރެވި އަދި ރަންވޭގެ ޙާލަތުގެ ސަބަބުން، މޯލްޑިވިއަންގެ ދެ ބޯޓަކަށް ވީގެއްލުމާ ގުޅިގެން،" ޓްރާންސްޕޯޓް މިނިސްޓަރު މުހައްމަދު އަމީން އޮކްޓޯބަރު 12، ގައި ބުންޏެވެ.

އަމީން ވިދާޅުވީ މިނިސްޓްރީގެ އިސް ނެގުމާއެކު، ސިވިލް އޭވިއޭޝަން އޮތޯރިޓީއާއި، އެއާޕޯޓް އޮޕަރޭޓާ އަދި ގުޅުންހުރި ފަރާތްތަކާ ގުޅިގެން މައްސަލަ ހައްލުކުރުމުގެ މަސައްކަތް ފަށާފައިވާ ކަމަށާއި ވަރަށް އަވަހަށް މައްސަލަ ހައްލުކޮށް އެއާޕޯޓު އާންމު ހާލަތަށް ގެނެވޭނެ ކަމަށެވެ.

ނަމަވެސް މިނިސްޓަރު އަމީން ވަކި ދުވަހެއް ވިދާޅެއް ނުވެ އެވެ. އެނގިފައިވާ ގޮތުގައި ކޫއްޑޫ އެއާޕޯޓުގެ ރަންވޭ މަރާމާތު ކުރުމުގެ އިތުރުން އެހެން އިތުރު މަސައްކަތްތައް ވެސް ކުރަން ޖެހެ އެވެ.

އެއާޕޯޓެއްގައި ކުރަންޖެހޭ މަރާމާތު ނުކުރެވި، ބޯޓު ޖެއްސުން މެދުކަނޑާލަންޖެހޭ ހާލަތަށް ދިޔުމަކީ ޒިންމާއާ ހަވާލުވެފައިވާ ފަރާތްތަކުގެ އިހުމާލެވެ. ކޫއްޑޫ އެއާޕޯޓު ހާލަތު ގޯސްވަމުން ދިޔައީ އެންމެންގެ ލޯކުރިމަތީގަ އެވެ. އެތަން ރަނގަޅު ކުރަން އެންގުމުގެ ބާރު ސަރުކާރުގެ ކަމާބެހޭ އިދާރާތަކަށް ވެސް ލިބެ އެވެ. ނަމަވެސް އެންމެން އަތް އުރާލައިގެން ތިބުމުގެ އުނދަގުލާއި ގެއްލުން އުފުލަން ޖެހިފައި ވަނީ އާދައިގެ ރައްޔިތުންނެވެ.