ހައި ކޯޓުގެ 44 ވަނަ އަހަރީ ދުވަސް ފާހަގަ ކުރުމުގެ ގޮތުން މިރޭ ބާއްވާ ހަފުލާގައި އެ ކޯޓުގައި ހިދުމަތް ކުރެއްވި ހުރިހާ ފަނޑިޔާރުންގެ އަގުވަޒަން ކުރުމަށް އެވޯޑަކާއި ގައުނެއް ދޭން ނިންމައިފި އެވެ.

"އަދަދު" އަށް އެނގިފައިވާ ގޮތުގައި ހައި ކޯޓުގައި ހިދުމަތް ކުރެއްވި ހުރިހާ ފަނޑިޔާރުންނަށް އެވޯޑް ދިނުމަށް އެ ހުރިހާ ފަނޑިޔާރުންނަށް ވަނީ ދައުވަތު ވެސް ދެއްވައިފަ އެވެ. އޭގެ ތެރެއިން އަވަހާރަވެފައިވާ ފަނޑިޔާރުންގެ އާއިލާތަކަށް ވެސް ވަނީ ދައުވަތު ދެއްވައިފަ އެވެ.

އެނގިފައިވާ ގޮތުގައި އެވޯޑު ލިބިވަޑައިގަންނަވާ ބޭފުޅުންގެ ތެރޭގައި ރައީސް ޑރ. މުހައްމަދު މުއިއްޒުގެ ބައްޕާފުޅު އަލްމަރުހޫމް ޝައިހް ހުސެއިން އަބްދުއްރަހުމާން ވެސް ހިމެނިވަޑައިގަންނަވަ އެވެ.

އެ އެވޯޑް ހަވާލު ކުރައްވާނީ އިސްފަނޑިޔާރު ހުސެއިން ޝަހީދު ކަމަށް ވެސް ވަނީ މައުލޫމާތު ލިބިފަ އެވެ.

މިރޭ 8:00 ޖަހާއިރު އޮންނަ އެ ހަފްލާގައި ހައި ކޯޓުގެ އިސްތިރާޖީ އަމަލީ ތަދުބީރު ލޯންޗު ކުރެއްވުމަށް ވަނީ ހަމަޖެހިފަ އެވެ.

އޭގެ އިތުރުން، ހަފުލާގައި ދައުލަތަށް ހިދުމަތް ކުރުމުގައި ގައިމީ އިނާމު ލިބިފައިވާ ހައި ކޯޓުގެ މުވައްޒަފުންގެ އަގުވަޒަން ކުރުމުގެ ގޮތުން ހަނދާނީ ލިޔުމެއް ދިނުމަށް ވެސް ވަނީ ހަމަޖެހިފަ އެވެ. އަދި ގަޑި ނުޖެހި އެންމެ ގިނަ ދުވަހު ހާޒިރުވި ތިން މުވައްޒަފުންނަށް ލިޔުން ދިނުމަށް ވެސް ވަނީ ހަމަޖެހިފަ އެވެ.

އެ ހަލްފާގައި ޝަރުއީ ދާއިރާގައި މަސައްކަތް ކުރައްވާ އަދި މަސައްކަތް ކުރެއްވި ބޭފުޅުންނާއި ސަރުކާރުގެ އިސްވެރިން ބައިވެރިވެވަޑައިގަތުމަށް ވަނީ ހަމަޖެހިފަ އެވެ.